探魚
用餐日期:2018/02/17
最近見大家到深圳,除左必定到訪喜茶外,探魚都係另一深圳名物,就算唔北上嘅人,都應該會聽過探魚吧。之前都算係個極級挑食嘅人,亦都唔願意嘗試。
深圳呢個對方,對於我飲食上有很多改變,其中一樣要數到,就係魚。因為鐘意食辣野,自從認識烤魚,就有少少欲擺不能
喺香港都食過唔少烤魚店,當然價錢比較貴啲,其實味道都好對辦,但次次人均都接近二、三百蚊,拍得住啲靚料邊爐。
探魚喺深圳都有好多分店,大部分位於商場入面,仲有部分分店係24小時營業,怕等位嘅咪避開繁忙時間。
東門店都比較多香港人幫襯,1234space商場都幾多熱門餐廳,裝潢充滿特色,標誌性嘅黑貓警長老是常出現,牆身都畫左唔少魚兒。
此店位置唔多,新年期間,唔需要等太耐,不過人手有點不足
餐牌同大部分烤魚店差不多,食品選擇唔會好多。魚分為草魚、凌波魚、清江魚、鮰魚、鱸魚等,定價RMB¥108-168。平價魚咪多啲骨。
鐘意食辣可選麻辣、豆豉泡椒、青椒等;唔鐘意食辣,仲有其他口味選擇,有酸菜、蒜香、蘿蔔等。
另有涼菜、配菜,以蔬菜類為主,金菇、豆腐、蘿蔔、寬粉,定價RMB¥6.5-13。人均消費大概係香港一半吧
前菜
重慶豆花烤魚 - 鮰魚 RMB¥168
原本都想點啲配料,但店員提醒我地呢款魚已經有大白菜、豆腐、百頁,份量不少,兩個人夠哂,於是我地直情慳番,只係追加左寬粉。
辣度不能自選,辣椒、辣醬係放喺魚嘅面頭,咁如果唔食得太辣嘅,可以預先將辣椒去掉,始終會愈食愈辣
辣度重手過香港好多,偏香辣,唔係十分麻,好啱口味。鮰魚size正常大小,已經拆起魚骨放喺旁邊,方便食用。
魚肉算幾滑,有彈性,計番都差不多200蚊,質素都唔太差,間中有一兩條肉眼可見嘅小骨。
配菜墊底,百頁、白菜超級吸汁,豆腐滑到不得了。喺深圳食嘅花生,點都唔夠香脆。
寬粉 RMB¥6.5、白飯 RMB¥3
寬粉明顯用滾水解凍,淥淋左,上枱時已經係一條條、軟熟。但如果放涼了,就會變左一餅野,痴到實哂,要煮好耐先會熟,最好準備要食嘅時候先點。
蒜泥青瓜 RMB¥9
雖然唔辣,但蒜味很重,加左好多麻油,青瓜爽脆。
飲品價格偏高,可樂、雪碧配檸檬 RMB¥9/杯。
食烤魚唔會好似打火鍋咁食咁多野,埋單二百零蚊人民幣,點都比香港食來得划算,加上喺呢邊食酸食辣,一般都不會令人失望。
探魚
地址:東門1234space商場五樓L511
Follow us:
Instagram: http://bit.ly/2g3ZtuS
Facebook: http://bit.ly/2gu1fIG
Blog: http://bit.ly/ywycarol
Contact us: mrmrsfoodhk@gmail.com
留言列表