再窮都要去旅行！

嘉樂冰廳

日期：2018/03/17

而家好多傳統或者舊式冰室都被受追捧，經常大排長龍，其中荃灣嘅嘉樂冰廳都有好耐歷史，可謂該區名物，一見到標誌性嘅蛋治、奄列都認得係佢地嘅出品

另一半就已經食過，而我呢個鄉下仔都係首訪。之前都有意無意經過行過都人頭湧湧，懶得排隊。搵左一日好得閒，專程兩再來。最終等左十零分鐘，可以接受。

客人都好守規矩，自動自覺喺門口列隊，並無派飛叫號，當有人結帳，收銀姐姐就會安排客人入座。

餐廳裝潢簡單，空間有限，一律卡座，屬舊式冰室嘅卡位，僅僅坐到兩人。

環顧四周客人點菜，就可以知道呢度招牌係乜，離不開奄列、蛋牛治、牛腩麵、炸雲吞、雞翼等。

食物份量偏大，兩人share足夠，變相消費都唔算好高。（見大部分情侶都係叫個麵加個蛋治分享）即時製作，就算係簡單嘅食材，起碼有心做

咸牛肉三文治烘底三文治 $31

一個字：大，三文治切成一半，極厚身，大量蛋煮成，咸牛肉薄薄一層。

雞蛋煎得夠香，有白有黃，唔會過老，都仲幾嫩咸牛肉較薄，又冇乜點煎過，蛋牛分離，個人就較喜歡煎香嘅咸牛，加蛋，更加正

至於烘底，我自己就唔太在意，冇特別為件事加分，呢兩蚊加唔加就睇個人喜好。

招牌火腿小奄列 $32

個名就叫小奄列，但份量一啲都唔小。最好蛋治同奄列二選一啦，始終性質都幾相似。

小奄列誇張之處係用左好多隻蛋，加厚身火腿條、一小片牛油麵包製成。

雞蛋面頭煎到脆脆地，裡面滑溜，蛋香濃郁；火腿粗身，唔係薄過乜嘅超市火腿，幾有誠意。明白點解喺招牌

當一般茶記嘅奄列毫無感情，突然有份三十蚊嘅奄列，有番咁上下功夫，都食得過。

豉油皇雞翼 $36

一份6隻，伴酸辣醬。巴西雞翼肥大，油份會重啲，雞翼脹卜卜，咬落有少少爆汁效果。

雞肉啱啱好熟，嫩滑唔鞋口，乾淨冇毛，豉油味唔算好重，唔會太鹹。

作為雞翼狂，如果唔係馬上要食晚飯，真係想追加多兩碟獨吞

牛腩麵 $30

比起一般牛腩麵約1.5倍份量，牛腩都有六、七件，就唔係切腩，係啲柱候牛腩燜過咁。

湯底濃得黎都唔算太鹹，麵底幼身，食落軟，好在唔腍。 牛腩大粒，仲俾左啲少少牛筋，口感唔韌，腍身入味。

以30蚊黎講，真係抵食囉

酥炸鮮蝦雲吞 $36

分鮮蝦同韭菜餡，可以半半混合。雲吞細細粒，即炸，皮薄硬脆，油份點都有啲。

裡面有明顯蝦肉，新鮮，一口size我最鐘意

西多士 $21

連個西多都好似特別巨型？賣相好似幾好食，煎得幾靚仔冇燶邊，可惜味道一般。

裡面百無，單靠蛋漿煎起，蛋漿冇味，加上麵包厚身，唔能夠完全吸收蛋漿。

西多士口感太厚，儘管狂倒糖漿、搽勻牛油都仲係好乾，根本係食緊麵包

阿華田奶昔 $29

阿華田味濃唔過甜，沙冰預料之內冰感重，但幾順滑冇冰碎，用幼身飲管已經可以

好立克奶昔 $29

相對阿華田奶昔，呢杯真係太甜

嘉樂冰廳

地址：荃灣新村街40B號地下

Follow us:

Instagram: http://bit.ly/2g3ZtuS

Facebook: http://bit.ly/2gu1fIG

Blog: http://bit.ly/ywycarol

Contact us: mrmrsfoodhk@gmail.com