靚湯水餃
用餐日期:2018/06/23
唔敢話自己好鐘意餃,但我幾沉迷湯,特別鐘意啲賣湯底嘅餃子店。位於大角咀嘅靚湯水餃好適合欠嘅湯水嘅朋友,餃子唔係食過最好食或者最啱我食,但湯底真係數二數三
餃店招牌靚湯底強調不含味精,逢星期一、三、四、五、日供應花膠螺片豬骨鮮椎山煲老雞湯;星期二、六就係野葛菜煲新鮮豬骨煲生魚湯。
餃子只有湯餃,有鮮肉搭配白菜香菇、韭菜、粟米、椰菜、雲耳或者雲吞,可加麵底、雙拼,另有客飯、小食等,價錢合理
鮮肉白菜香菇餃 $34/7隻
鮮肉韭菜餃拼粟米餃 $40/10隻
週六關係,點餃子跟野葛菜湯底,湯嘅份量多,唔係細細碗。油份唔重,完全冇味精感,比起我至愛美味餃,調味冇咁重手,住家得黎又唔會健康到淡茂茂,希望下次夾啱時間試埋另一款湯
餃子人手包製,我點嘅白菜餃原來用嘅係大白菜,唔係白菜仔,個人比較喜歡後者。
三款餃子大小適中,一口放得入,唔會好似餃子屋出品咁巨型。餃皮未至於超薄,當然亦唔係厚。
餃餡菜多肉少,唔會太鹹,可能剁得比較碎實,肉感低,十隻就啱啱好我係食肉獸,當然就偏好啲肉菜半半嘅餃,滿足啲
店內亦有供應麻辣醬,即係類似菜莆,大方自取,但豉油偏鹹,菜莆半身比較細碎,帶微微麻辣味,不至於令我有食唔停嘅衝動,冇特別加分
雞翼 $28/4隻
小食價錢就小貴,雞翼滷得唔夠入味,煮起一段時間再翻熱,食落偏乾。
整體而言,靚湯行先過水餃,湯底確係幾出色,飲哂成碗都冇口乾口渴,餃子不至於驚豔,但對得住個價錢,為左湯底一定再訪
靚湯水餃
Follow us:
Instagram: http://bit.ly/2g3ZtuS
Facebook:http://http://bit.ly/2gu1fIG
Blog: http://bit.ly/ywycarol
Contact us: mrmrsfoodhk@gmail.com
留言列表