鍋心粥底火鍋
用餐日期：2017/03/05
曾經喺鍋心剛開業不久嘅時候，同朋友黎過，當時覺得好抵食！期後再介紹唔同朋友再黎，都依然覺得好食。
週日唱完K打算要搵飯食，六點鐘先打過黎問下有冇位，都係搏住一試無妨嘅心態，因為平時即日打黎，一係話冇位，一係就要11pm後。
點知又咁好彩，店員覆8:30pm有位，即book！尤其佐敦店，想食記得預約。
於是，我同男朋友就四訪喇！同行仲有4位朋友係第一次食，大家都覺得唔錯，幾滿意，捧腹離開
價錢方面，基本收費係$198/位，冇加一，包括：
7款海鮮 + 5款配料 + 粥底、粟米粒、南瓜粒、芋頭粒，全部人頭份量，唔係任食，飲品另計。
如果覺得唔夠食，仲有收費追加配料。平時我地都有追加少量食物，但次次都會飽到傻
沙律（免費）
店內貼左唔少提示，都係建議先落海鮮，後加南瓜粒、芋頭粒等，然後食其他自選配料，最後加入粥底，等啲粥吸引精華。
以下為六人份
肉蟹
3隻蟹，size唔細，主要粥底味道源自蟹、肉類，所以蟹都要有咁上下新鮮
蟹肉鮮甜，肉都算多，好好食！
海蝦
蝦好生猛，每次黎都係扎扎跳，新鮮嘅蝦好難唔好食但每人兩隻，確係有點少。
活鮑魚 + 大蜆
之前黎過食嘅鮑魚就再新鮮啲，郁得好誇張，今次都有幾隻已經唔識郁。
鮑魚淥幾分鐘食得，留意時間，否則會老。
大蜆名符其實好大隻，而且鮮甜
紋蜆
我本身係個貝殼類怪，好鐘意食蜆、沙白。呢種紋蜆喺街市買都唔平，而且唔係成日有。
可惜，有沙啊…
沙白
沙白都有少量有沙，但情況冇紋蜆咁嚴重。
多寶魚
呢樣基本上係鐵膽，黎幾次都有，但係好得意，同唔同朋友黎都有呢個情況。
同枱會有人覺得好食，但又會有朋友覺得有草味…今次都唔例外。
蟶子 (追加 $10/隻)
店員話是日海鮮係蟶子，十蚊隻，見價錢唔係好貴，就加左。
個人認為普通啦，唔加冇損失。
食哂所有海鮮之後，就落粥底嘅配料，粟米件、南瓜粒、芋頭粒。
等以上材料淆一陣，我地就食其他配料。
自選配料方面，我地選得比較多肉類，留意，因為肉類多，通常之後碗粥會略鹹。
美國肥牛
我記得有次黎，店員就話當日有啲靚少少嘅牛，加一百蚊，我地覺得好食好多。
不過今次冇問我地，所以我地食番餐單上嘅肥牛，不過不失。
黑毛豬梅頭肉
朋友都讚呢款好食，豬肉腍身，有肉汁，而且唔會好肥膩
黑毛豬腩片
呢款都好食，相對梅頭豬冇咁腍身，有咬口
手打雞骨丸
推介！咬落好脆口我地有兩碟，即係人頭有3粒。
芝心獅子狗
食哂所有配料之後，店員就送上粥底、配料。
鮮甜不過由於我地肉類夠多，粥底稍鹹。
眼見都有唔少人食唔哂，打包架。
我地六個人，每人兩枝飲品，額外加左蟶子，人均240蚊左右，我認為係好抵食
可能驟眼睇會覺得冇任食火鍋呀、放題咁抵，但其實唔覺唔覺，都食得好飽！而且海鮮類都幾新鮮，配料又唔會俾得孤寒！
至於服務，好似好多人話一般，我自己就覺得算係咁，又冇收加一，又主動過黎收碟、倒殼、幫我地處理粥底。
而且我地食8點半，訂位已經講到明坐到11點，兩個幾鐘夠哂我地食了，旁邊嘅二人枱一早埋哂單。
環境方面就一般啦，我地坐二樓，又唔會話逼到傻仔。
鍋心粥底火鍋
地址：佐敦吳松街88-90號地下
Follow us:
Instagram:http://http://bit.ly/2g3ZtuS
Facebook: http://bit.ly/2gu1fIG
Blog: http://bit.ly/ywycarol
Contact us: mrmrsfoodhk@gmail.com
吃貨夫婦 (48)