四月初同幾位朋友去左澳門+珠海兩日一夜，今次選擇住珠海，一來因為我地週六、日出發，澳門嘅酒店一般會貴好多。二來因為我地共五個人，有一位朋友係單丁出黎。
考慮過價錢同各種原因，我地選擇左住珠海嘅酒店，遷就番單丁嘅朋友，我地都唔想揀太貴嘅酒店。
點知見到珠海粵海酒店有三房一廳嘅房型，啱哂我地！刨過評語同大部分照片，都覺得唔係太差，亦都符合預算，所以馬上預訂左
珠海粵海酒店：https://www.tripadvisor.com.hk/Hotel_Review-g297418-d302265-Reviews-Guang_Dong_Hotel_Zhuhai-Zhuhai_Guangdong.html
圖片以tripadvisor嘅最詳細、準確，接近真實。
週六、日入住，大概9百多元一晚，價錢合理，適合家庭或者一班朋友入住
公寓（三房/兩房一廳）位於酒店另一棟大樓，辦理手續後會有職員帶住客行路過去，唔係太遠。留意：押金會收取$500（港幣接受）
離拱北關口行路的話大概十分鐘，位置都算方便。（當然冇來魅力、Lhotel呢兩個方便到喺關口隔離啦）
酒店大堂、一般房間係有裝修過，但公寓大樓嘅房間比舊，我地入住三房一廳嘅房型，酒店職員服務都算唔錯。（當然唔能夠同澳門嘅相比）
三房一廳，大廳、房間都夠大，分別有雙人床 X2 +單人床 X1，其中一個房間有套廁、電視，另有廚房、大梳化。
雖然裝潢比較舊式，但都算乾淨、光猛、有wifi，水壓合格，枕頭都唔錯。
冷氣比較弱，夏天入住或者會熱啲。床褥比較硬，晚上會有蚊子咬。
整體都幾滿意啦，當然啦，如果情侶或者單人入住，唔會揀呢間酒店，所以推薦俾家庭或者一班朋友想一齊圍威喂，可以考慮。
我地上、下午都留左喺澳門玩，到旁晚時份先番去珠海check in、晚飯。休息左一陣之後，我地就出發去灣仔海鮮街食晚飯。問過酒店幫我地包車，要三百蚊人仔，當我地水魚咩…
可能旁晚時份，要截的士都有難度，結果有架白牌車兜搭，我地問清楚價錢就上車喇，由粵海酒店去到灣仔海鮮街係收我地 40RMB，抵搭
因為我地人多，而且感覺都坐左幾耐。
因為上次黎灣仔海鮮街已經係幾年前嘅事，印象深刻，記得好似三聖村咁，一條街賣海鮮，旁邊都係食店，自來海鮮加工。我仲記得食左好平！
事隔幾年再黎，好失望，唔會再黎。
依然都係好多海鮮檔，雖然都知道、預左要講價，但冇諗過係標價已經同香港差唔多價錢！（我記得早幾年黎冇咁誇張！）
我地唔係好鐘意講價，都焗講啦；有啲檔口心知肚明，就算我地唔開聲講，佢都自劈。例如我地本身見到啲花甲，標價56蚊斤，店主就自劈，劈到50蚊兩斤，好好玩咩？
眼見啲海鮮就唔係話特別新鮮
本來都滿心歡喜，但行左三轉都冇乜買到啲乜海鮮，我覺得呢度食海鮮仲貴過喺深圳、羅湖食好多。
最終我地買左一共 280RMB，有花竹蝦 ($100/斤)、花甲 ($50/2斤)、魷魚 ($50)、帶子 ($8/隻)。利申：我地並冇講價講得好誇張
當買好海鮮後，就直接喺附近揀一檔食店去加工，食店選擇好多，我地冇乜頭緒，盡量揀啲人多嘅（冇人幫襯肯定有原因）
有間真係好多人架，係全條街唯一一間有張唔知乜 A證書，但等位最少要半個鐘以上，海鮮都變死鮮啦…
每次行過啲餐廳，都有好多呀姐會向你招手，甲餐廳會話俾間房你坐、乙餐廳又會話送個湯你飲、丙餐廳又話免茶送啤酒，陳出不窮。
不過我地嘅準則係：wifi接收良好，因為男朋友要睇波…（雖然我買左電話卡，但只可以喺澳門用到）
最後揀左呢間行得比較尾嘅川林海鮮酒家，幾大間，未坐滿但有唔少客人。
川林海鮮酒家
用餐日期：2017/04/01
聽人講話呢條街嘅食店加工費間間都差唔多，我地問左三間，確係唔差好遠。
白灼花竹蝦（加工 5RMB/一斤內）
白灼冇難度，所以只係收幾蚊加工費。
竹蝦雖然size唔係好大隻，但肉質會比較爽口。不過都係嗰句，喺深圳食蝦平好多。
豉椒炒花甲（加工 28RMB/2斤內）
呢款花甲王個殼就幾大隻，但唔係好有肉地，幸好冇乜沙。不過50蚊兩斤…算啦。
豉椒炒都係冇難度，唔會難食。
沙姜炒八爪魚 （加工 28RMB/斤半內）
未試過呢種煮法食魷魚，味道唔錯！我諗呢間食店炒野比較拿手啲。
魷魚炒到出黎就唔係話好多，但都好爽口、彈牙。
蒜蓉粉絲蒸扇貝 （加工 25RMB/10隻）
極大量蒜蓉，好似唔洗錢咁…粉絲都唔係值錢野，所以都幾多。
可惜上碟冇加豉油，帶唔到鮮味，只係食到蒜味…扇貝蒸得有少少過火，帶韌。
清蒸水蛋 28RMB
我梗係唔會話你知我除左係雞翼控，仲係水蛋控啦。為左要撈幾碗飯，點左碟水蛋。
話說我冇喺國內食到過唔好食嘅蒸水蛋…今次食到喇
蛋蒸得老得滯，雖然裡面都夠滑，最致命係…完全冇味，又冇蛋味，又冇豉油味…
白切雞 48RMB/半隻
雞比較瘦，肉唔多。
咸蛋肉片芥菜湯 32RMB
我諗有9成嘅國內餐廳煲呢煲湯都可以好飲過佢…
咸蛋影都唔見，肉片鞋到乜咁。
蒜蓉炒菜心 32RMB
呢個喺大陸食碟炒菜，算貴架喇，蒜蓉炒咋。
油菜油菜，菜就油左少少，過得去啦…
大可樂 15RMB/枝
白飯 2RMB/碗
餐具 1RMB/位
茶位 2RMB/位
最終埋單95折後 263RMB，連埋海鮮除番開每位港幣百二蚊左右，係唔貴，但冇食到邊樣比較突出嘅野。
想食海鮮，又想平啲，唔怕遠嘅下次可以去白藤頭，冇咁遊客味。
如果喺香港，我地平時就會喺楊屋道街市買海鮮拎入三聖加工，計番三百零蚊位，已經食到魚蝦蟹蜆蟶子龍蝦乜乜。
川林酒家
地址：灣仔新海鲜街19號
Follow us:
Instagram: http://bit.ly/2g3ZtuS
Facebook: http://bit.ly/2gu1fIG
Blog: http://bit.ly/ywycarol
Contact us: mrmrsfoodhk@gmail.com
鮮芋仙招牌 RMB¥22
吃貨夫婦 (51)
