目前分類：搵食葵廣 (4)

瀏覽方式：標題列表簡短摘要

Jan 06 Mon 2020 22:18
【葵涌KCC美食】瓜破菓子店Patisserie Uriwari：網店轉營實體店系列

瓜破菓子店Patisserie Uriwari

開蛋糕店、咖啡店可能是很多人的夢想，但香港租金高昂，要負擔一個鋪位都不容易。先經營網店令少數人可以踏出第一步，累積經驗，再一步一步朝夢想向前。

去年中Patisserie Uriwari 瓜破成功在葵涌新商場開設實體門市，除了可以方便原先客戶交收，亦可以推出更多產品，讓更多人認識品牌

據店方介紹，店名「瓜破」取自大阪一個小社區，二字特別、又帶和風味道。由於網店已經營一段日子，累積熟客，所以當瓜破開設實體店初期，已經有不少到訪。

小店選址葵涌新商場KCC，店面不大，原本只有5個座位，開放形式，近日到訪，已增設多數個座位堂食。

凍櫃中展示當日供應的多款件裝蛋糕及原個蛋糕，每日新鮮製作，件裝蛋糕約十款，的的骰骰，賣相精緻，定價$42-50。

蛋糕取名特別，配合和風感覺，例如「結」、「真」、「桃」等。

堂食有兩款套餐，自選一件蛋糕加一杯飲品定價$78。

另一款為抹茶卷蛋配抹茶拿鐵/焙茶卷蛋配焙茶拿鐵的組合，定價$128。

抹茶卷蛋、焙茶拿鐵 (跟餐原本配抹茶拿鐵) $128

即場見到店員將卷蛋「變裝」，卷蛋唧有北海道忌廉，加上寒天、抹茶凍、蜜漬紅豆、柚子皮、金箔，並附上一杯抹茶漿。

卷蛋皮滑溜，濕潤度高，看起來有4寸，非常厚身，有飽腹感。裡頭有抹茶忌廉，賣點是有層次、多口感

卷蛋茶味不算好濃，主要靠忌廉帶出茶香，忌廉濃度足夠，還細心配上少量茶粉。

如果喜歡甜一點的，可以添加抹茶漿，視乎個人喜好

最後還有兩塊抹茶曲奇可以淺嚐呢。

焙茶拿鐵

焙茶拿鐵畫花好可愛、細緻，相機食先難免會令茶粉沉澱，飲用前最好先輕輕攪拌。

「結」、72%朱古力特飲 $78

選了名為「結」的件裝蛋糕，高知柚子製作，味道清爽帶微酸，裡頭加有少許咖啡朱古力增添口感，只是略嫌蛋糕底稍乾一點。

72%朱古力特飲

朱古力順滑，味道稍為單一。

可能因為設最低消費，令堂食的客人不多，可以靜靜的歇歇。

除了蛋糕，店內還有售其他手作產品。

瓜破菓子店 Patisserie Uriwari

地址：葵涌葵昌路72-76號活@KCC 4樓409號舖

Instagram: http://bit.ly/2g3ZtuS

Facebook: http://bit.ly/2gu1fIG

Blog: http://bit.ly/ywycarol

I'm Carol 發表在痞客邦留言(0) 人氣()

個人分類：搵食葵廣

▲top

Feb 02 Thu 2017 11:40
【搵食葵廣】葵涌廣埸掃街（三）

【搵食葵廣】葵涌廣埸掃街2樓：http://bit.ly/2h2a4tG
【搵食葵廣】葵涌廣埸掃街3樓：http://bit.ly/2hzeV4N

葵廣好特別，每次去都會搵到啲新野食，上個月某日放假又去左搵食。

阿佳拌麵就喺3樓，但我見份量都幾大，所以今次試住魚蛋先。

麻辣魚蛋 $15/12粒
本來見到啲魚蛋喺個兜度好似一潭死水，唔多吸引，但基於我真係好想食魚蛋，所以都買黎試試。估唔到又幾好食。

魚蛋有魚味，雖然稱唔上超彈牙，但都合格有餘。
麻辣醬唔算好辣，只係帶少少麻，算過下癮。整體唔錯，價錢亦都唔算貴。
下次黎有興趣試埋拌麵，因為都見幾多人食~

阿佳拌麵

地址：葵芳葵富路7-11號葵涌廣場3樓303F號舖

去到葵廣當然唔會淨係篤魚蛋，咁見到有唔少人都食過呢杯雪糕，又有部分人叫呢杯雪糕做「平民Godiva」。

Kiss the Icecream 嘅雪糕單睇價錢，的確係平過Godiva一截，廿零蚊左右有交易，雪糕嘅味道都有啲選擇。比較熱門嘅係意大利松露朱古力，不過就怕伏。

意大利濃朱古力雪糕 $16（加$5花生朱古力邊）

雪糕筒除左普通餅乾款，仲可以加錢轉：花生朱古力邊、濃朱古力邊、彩針朱古力邊。

雪糕賣相都唔錯，叫呃得下人。味道方面，朱古力味確係幾濃，稱唔上香，但至少都冇平價朱古力味雪糕嘅感覺。

雪糕質地唔算滑，沙沙地；雪糕筒比較厚身，一般脆

至於加錢嘅花生朱古力邊最影響整體印象，因為花生粒粗大，味道一般，好似新年呀婆買果啲平價花生… 成件事downgrade左，感覺廉價。

整體而言，單單以一杯濃味朱古力雪糕黎講就16蚊就唔算話貴，只可以一試，但非常唔建議加花生筒。

Kiss Ice-cream

地址：葵芳葵富路7號葵涌廣場3樓85A舖

阿佳拌麵食左，朱古力雪糕都食埋，本來諗住去食卷之屋嘅手卷，唔明點解我同呢間手卷咁冇緣，一時就因為搵唔到，一時就因為冇開門

卷之屋斜對面就係呢間五代同糖，新新地，老闆話就係舊時甜品嘅五代同糖，以前成日收工都喺mk食糖水，但無端端執哂。而家叫做係換個形象，再喺葵廣開店，加入小食軍團。

五代同堂 $56（試食）
呢個五代同堂嘅概念就類似牛扒杯，上層就係小食，下層就係飲品。呢份小食份量唔野小，兩個人食都飽到乜咁，算幾抵食，裡面包括炸多士、炸薯角、司華力腸、洋蔥圈、芝士春卷+一款飲品

老闆話menu會轉，所以價錢只能夠作為參考。

炸多士同芝士春卷都係自家製，前者炸到脆一脆，裡面有紅豆餡，唔係太甜，不過幾大舊下，如果可以整成一口size更方便；芝士春卷我覺得最好食，芝士超多，而且春卷新鮮熱辣，好夾。

洋蔥圈炸粉唔厚，好脆口，好食。

炸薯角千島醬好好食，除左千島醬，仲有茄汁、BBQ醬同辣醬，全部可以自行添加~

司華力腸overcooked左少少，所以有啲乾乾地。

雖然成兜野都係炸物，不過好在感覺唔算太油膩~ 而且用左少少生菜墊底，記得食哂唔好嘥！同一時間下層係藍柑荔枝梳打，食完熱氣野點都會口渴，所以杯梳打我幾啖飲哂！

店家仲有番五代同糖嘅招牌：

雞蛋布丁，除左原味，仲要抹茶、士多啤梨、朱古力，價錢：$12/1隻，$20/2隻，$50/6隻

原味唔洗多講啦，又滑又有蛋味。抹茶係4款入面我最鐘意的，抹茶味道雖然唔算超濃郁，始終仲有蛋味，但食得出唔係下價嘅抹茶粉。

士多啤梨味唔會太甜，不過個人認為朱古力布丁嘅口感比較實。老闆話想方便唔係即食嘅客人，唔怕布丁會散。

最後試埋呢個造型可愛嘅玻璃奶樽飲品

藍蝶地桃 $22

玻璃奶樽嘅造型都幾有誠意，不過飲完記得環保啲帶番個樽番屋企，唔係叫你拎黎當奶樽用，不過我自己就當花樽，放左札乾花~

呢種大熱嘅漸層飲品記得搖勻先好飲，因為蝶豆花本身並冇味道，主要用黎調色，所以呢枝就係水蜜桃味~

老實講，幾廿歲人要啜住奶樽飲野都有少少尷尬XD 見到隔離妹妹到手之後個樣好滿足。撇除老尷呢樣野，水蜜桃味都濃，不過個人認為稍甜。

啜左幾啖，相機食完之後，都決定用番飲管飲。

整體黎講，都係間唔錯幾有heart嘅小食店，即叫即做~相信要喺葵廣搵訂企都唔難~

五代同糖
地址：葵芳葵富路7號葵涌廣場3樓3069-T 16-17號舖

葵廣2樓有好幾間小食都已經食過，全記經過好幾次，但都冇乜意慾想食，一來見到掛住B仔雞翼個朵，驚期望大會失望 (本人係B仔雞翼尖粉絲，可以個人KO 3份)二來食雞翼尖點都要坐喺度食或者外賣，比較唔方便~
全記裝修得幾特別，帶懷舊小食檔嘅感覺，有幾個位可以等客人坐低食。今次經過見到冇客人食緊，即係有位坐啦，所以就決定試下。

雞翼尖~$12(細)、$20(大)

點左大份，店員好好人，准我地辣同唔辣佔一半~廿蚊黎講，覺得稍為細份左少少。

味道方面，雞翼尖炆得夠稔，稔得黎又唔會話蓉蓉爛爛，基本上好容易離骨。唔知係咪我地叫左一半(上面唔辣，下面辣)，所以影響左個辣度，因為我見人地嘅評語係話好辣~
個人認為唔夠辣，特別如果你叫得做B仔雞翼尖，一定要夠辣。食得出有蒜味，但唔會好似B仔咁肉眼都見到一粒粒蒜~
就咁嘅，單單針對雞翼尖，其實係幾好食！如果我經過都會買番屋企食，不會點辣，唔要半半。

但同B仔雞翼尖絕對係兩回事，無謂再用呢個名，令人有不必要嘅比較。
呀姐好細心，俾張紙我地墊住啲骨，始終食雞翼尖都好怕整污糟人地張枱，本來都預備要拎張紙巾出黎。

全記

地址：葵芳葵富路7號葵涌廣場2樓潮流廊2007號舖

Instagram: http://bit.ly/2g3ZtuS

Facebook: http://bit.ly/2gu1fIG

Blog:http://http://bit.ly/ywycarol

I'm Carol 發表在痞客邦留言(0) 人氣()

個人分類：搵食葵廣

▲top

Sep 19 Mon 2016 20:51
【搵食葵廣】葵涌廣埸掃街2樓

新店都集中左喺2樓，所以呢度成日都車水馬龍，週末黎嘅話會逼到爆，平日會好少少。

🔸1830s Marcaron

Cookie Monster Macaron $38

少女心就梗係想試下美少女戰士嗰款呃下like，可惜冇哂。

揀左個macaron款式+1款雪糕+2款toppings
一心可能預左得個樣要黎吸睛，哈但又比想像中好喎。荔枝味雪糕唔錯似gelato，不過餅底唔係太甜嗰種，但係比較硬身似食餅乾，同埋$38是有點點貴喇。

🔸避暑山莊

七彩沙冰 $25

買macaron之前當然見到隔離鋪排到爆哂啦，原來就係呢個沙冰避暑山莊，雖然人龍就好長但都係等左10分鐘，反正等緊macaron。
呢個沙冰貴就唔係話好貴，影相就幾靚嘅。味道又唔係話好特別，唔難飲嘅！但係飲落都唔係話好分到係乜味。

🔸撈撈雞 $40

A 雞翼3枚+配菜3份
B 雞胸+配菜3份
C 雞脾+配菜3份
配菜選擇都幾funny：蘋果、哈蜜瓜、蕃茄、芋絲、青瓜、魚蛋等等

（額外每份要$5）
製作需時，我都專登叫左個C先至去買其他野食。配菜我揀左好安全嘅菜同木耳。因為一定係夾佢嗰隻辣。雖然四十蚊樣野喺葵廣算幾高消費，但其實幾好食似d前菜開胃。男朋友最愛！

雞脾肉比較少，可能叫雞胸會好d？配菜都屬平野，話哂高消費，希望雞同配料可以多d。大大話話食過4、5次，基本上揀邊款配菜都冇死，不過有時會撈得鹹左d。

🔸告白果屋 $28 - $48

食完撈撈雞就殺埋入告白果屋，賣點係冇溝野嘅果汁。小店裝修得幾有心機，實在係為一班相機食先之友設。乾花、木製品、玻璃樽、蠟燭等等點影都靚！
Smoothies 28-48蚊（果昔名都幾搞笑）
鮮果牛奶 18蚊
慢磨鮮榨果汁 18-30蚊

或者正正係佢地標榜無添加，味道就冇平時飲嘅奶昔咁濃糖味，青青地嘅蜜瓜、淡淡嘅香蕉味，飲完係完全唔口渴。食完d鹹呀、辣呀濃味野解解渴
原價要$42係貴左少少。所以buy1get1點都要飲啦！

🔸Yummy Yummy $20

一食就知難怪冇乜人排隊，新鮮出爐點都係熱辣辣就唔會話難食嘅。雞蛋仔都算脆口，朱古力味欠奉唔係好濃，星星都係gimmick野，冇乜實際加強味道，亦都唔脆。

🔸摩芽雞蛋仔 $40

等候時間係大概15分鐘左右，不過的確係店員慢手慢腳咁，所以嗰次星期日黎居然話要等45分鐘係crazy！

香芋星星雞蛋仔+雪糕2枚 $40
上面喺yummyyummy 嗰邊食左朱古力味，呢度嘅香芋味又係紫色咁吸睛，於是自己攞黎衰の揀左香芋味，可惜味道並唔濃空有顏色。
唔係好知自己食緊乜味嘅野，只係甜甜地，但係呢邊嘅雞蛋仔係脆好多，粒粒都好完整，仲有d星星起碼仲食到係脆。都係勝過嗰邊嘅原因。或者我下次試下聞說比較濃嘅朱古力味！

至於有一點係覺得自己7左，因為本來呢底雞蛋仔係25蚊，佢買任何一款雞蛋仔加雪糕係40蚊，咁我咪用左15蚊買左兩球雪糕？
雖然唔係話細球，但唔值！我地揀左士多啤梨味同豆腐味，前者係食唔到有味後者好d 都有豆腐味。但撈埋d雞蛋仔食完全唔知乜事，而且放左喺個杯度，表面上係可以一啖雪糕一啖雞蛋仔，實際卻食得非常呢hea，天一半地一半。

整體黎講，比yummy yummy好食，下次再食嘅話，食番朱古力味，唔會再加雪糕，或者去其他分店唔洗等咁耐！