再窮都要去旅行！

餐牌以電子形式顯示，但落單依然係要同店員講嘅。

甜品以班戟為主，另有梳乎厘、可麗餅、窩夫、燉蛋等，定價合理。但當中有幾款人氣限定款式，係over $75。

除左甜品，見佢地仲有晚市套餐、沙律、主菜等，不過今日旨在食甜品，就冇詳加留意。

唔係專登夾時間食，但見呢款係「星期五限定」，都點一份試試，製作時間要3、40分鐘為免喺度齋坐等食，另外一份我地點左唔洗等太耐嘅窩夫及飲品。

 水果茶 $42

水果茶都幾足料，飲落都係以百香果味道較突出，茶味薄弱點，解渴還可以。

迷人的普羅旺斯 $65

奇妙窩夫共4款，定價 $65-75。窩夫賣相不俗，製成籃子造型，裡面加有梨、蜜糖、杏仁、藍莓、雪糕

可能窩夫做起微溫，雪糕上枱已經係溶化狀態，食起上黎都有少少狼狽。

梨口感軟腍，清甜，連埋適量蜜糖，唔會過甜，杏仁片增添口感

主角窩夫唔屬於外脆內軟嗰種，食落煙韌，蛋香突出 

唯獨呢款以薰衣草調味，精油感明顯，唔太自然。

巨人班戟 $98（限時供應）

梳乎厘班戟最近老是常出現，呢份暫時係食過最昂貴，我諗我試一次就夠，唔係因為味道唔好，而係未好到要接近百元。

即叫即烘，落單計真係等左35分鐘有多，賣相接近日本食到嘅動L班戟。

始終係小店，人手、空間有限，但每枱點一份，分分鐘等位超過兩粒鐘，等唔等自己諗。

班戟厚身3層，上枱有少少傾斜，附上雪糕及野莓醬。

梳乎厘班戟口感鬆軟，氣孔平均，食落唔會似一陣風，入口蛋味香濃出眾，同三十蚊件嘅梳乎厘有明顯分別

烘焗時間掌握有待改善，有幾口食落未熟咁，稍糊。

配上嘅野莓醬酸酸甜甜，士多啤梨鮮甜，加上雪糕，整體出色，係食過比較好食嘅梳乎厘