再窮都要去旅行！

樸悅間

用餐日期：2017/07/08

來自樸悅間呢個烘焙品牌上年喺深圳海岸城開設門店，有別於大熱嘅奈雪の茶，呢邊係主打歐包，兼賣茶飲，暫時喺深圳只有兩家分店，另一間喺連城新天地。

麵包店位於網紅喜茶附近，能夠喺國內見到店名保留用繁體字，很有親切感，後來知道店內嘅麵包師係台灣人。(雖然餐牌依然係簡體)

本來「發現生活，發酵愛」呢個標語頗有感覺，但見到英文寫成 "Pretty Yummy, Pretty You"，瞬間…囧了

裝潢樸實，以木質為主調，木枱木櫈、木托盤、木質麵包櫃等，偏黃燈光，帶點日本、台灣風格。

店面面積非常大，中庭設置麵包櫃，右邊有冷飲櫃，近門口位置有三、四張枱可堂食。店內最遠處一塊大玻璃，可以見到麵包師製作過程。

明顯跟奈雪の茶嘅風格唔同，前者感覺似cafe，樸悅間係一間提供座位嘅麵包店，環境較寧靜舒適。

店內供應多款軟歐包，以天然酵母技術製作，強調低糖、低油、少蛋，比較健康，有抹茶、朱古力、蔓越莓、榴槤等口味，定價 RMB¥16-35。

同時供應飲品，比較特別有台灣冬瓜茶飲料，另外有水果茶、冰沙、冷泡茶、奶蓋等，選擇唔算多，定價  RMB¥16-32。

雖然以出售麵包為主，但推出飲品亦係大勢所趨，唔通眼白白睇住客人買包，但跑到旁邊買喜茶咩。

當然我認為兩者飲品質素有差，如果你喺度買包而又口渴，我依然建議你跑去其他茶店買飲品 (笑)

皇冠 RMB¥35

花多眼亂，加上價錢比奈雪高出少少而令我掙扎好一會先揀到兩款麵包。「皇冠」由5個手心大小嘅小包組成，用上奶油芝士餡，與其以皇冠為名但又唔多似皇冠，不如好似奈雪咁，叫番做花朵

全麥製成嘅麵團表面金黃色，灑有糖霜，麵包鬆軟但煙韌，空氣感唔強。奶油芝士餡料都叫做填滿麵包，但未至於湧出黎，口感似溶化牛油，不甜不膩。

雖然好飽肚，但呢款圍番都要成40蚊港仔，抵唔抵食見仁見智

農夫紫薯  RMB¥20

個樣就唔似紫薯麵包，因為切開先見到紫薯餡，另外加入乳酪，店員都話呢款都幾受歡迎。

麵包質感大致相同，都係鬆軟，包面有奶酥，碎碎碎碎，沙沙口感，食得有點狼狽。即場食的話，店員都可以幫忙切開。

紫薯餡比想像中稀少，本以為係好澎湃的，食落帶奶味，紫薯味道較薄弱，而且偏甜

莫尼火龍果   RMB¥28

水果茶有四款，分別係檸檬、鳳梨、火龍果、玫瑰，定價  RMB¥22-32，價錢唔平，但重點唔係特別好飲。

「莫尼」係我飲過之後先知應該係指「茉莉」，點嘅係火龍果茶，此外加入檸檬、青檸，凍飲唔夠凍，好傷心。

火龍果同茉莉比例各半，火龍果雖然係紅肉，份量太少甜度不足，基本上俾檸檬青檸蓋過，仲好奇怪地飲落有國內嘅廁所清新劑味…

茉莉花奶蓋茶  RMB¥18

奶蓋定價統一，相對水果茶價錢唔貴，質素一般。

茉莉茶味係有，但奶蓋打得較稀身，唔夠濃稠，剛沖好不久已經開始同花茶融合。味道亦唔夠香濃，唔鐘意鹹奶蓋嘅可能會喜歡。

另外供應四款冷泡茶，分別係茉莉花冷泡茶、日出印象冷泡茶、四季春冷泡茶、玫瑰烏龍冷泡茶，定價 RMB¥22。

想要外帶嘅客人，店員可以幫忙切包，並且有個幾「得體」嘅紙袋裝住。

樸悅間環境舒適，行到入去節奏都會慢人一拍，歐包嘅味道中規中矩，驟眼睇麵包款式、外形同奈雪の茶有9成相似，不過定價比奈雪高出少少。

但如果你係麵包控，又點會忍得住試左一間，唔試埋呢間呢

飲品方面較為失色，不試也罷。口渴可以去隔離排下喜茶；唔想排嘅可以去對面買台蓋；又或者直接去奈雪の茶食包同飲野 (笑)。

其他深圳嘅飲品店介紹：

【深圳一日遊】奈雪の茶 http://bit.ly/2k5ntDO

【深圳一日遊】喜茶 - 超級網紅店 http://bit.ly/2iXC3ts

喜茶嘅其他ins帖文：http://bit.ly/2AaOZpc

樸悅間   

地址：深圳濱海大道軟件基地4棟D座一層

地址：深圳市南區天利名城二期二樓211（喜茶、日日香旁邊）：此分店已結業

Follow us:

Instagram: http://bit.ly/2g3ZtuS

Facebook: http://bit.ly/2gu1fIG

Blog: http://bit.ly/ywycarol

Contact us: mrmrsfoodhk@gmail.com