Pizza Maru
用餐日期:2017/11/30
位於銅鑼灣希慎廣場嘅Pizza Maru原來係韓國品牌啊,早幾年喺韓風好流行時已經開過黎香港,主要原材料都會由韓國進口,保持正宗嘅味道。
以健康為概念,佢地嘅麵團配方居然有專利啊薄餅有綠茶成份之餘,仲加入左亞麻籽、小球藻、大麥第健康殼物,製成嘅薄餅甚有特色。
餐廳裝潢簡約,韓式快餐風格,枱與枱間空間不多,一路聽住kpop。平日晚上,客人都非常多,基本上我地離開時都仲等緊位,客人以年輕人為主
餐牌供應多款薄餅,有牛肉、蒜香雞、泡菜、薯角等接近十款,分為9寸、12寸,更具彈性,即使人少少都唔怕食唔哂,定價$117/168。
鐘意食芝士嘅不能錯過,佢地有三款手工批邊可升級,包括金芝邊、摩卡邊、雙芝邊。
另外仲有芝加哥薄餅、黑米長批、炸雞、意粉、炒飯、拌飯、沙律、扒類、炸物小食、炒年糕、湯等,價錢唔算話好貴,難怪平日都人流不斷。
韓式海陸 9" $133 (+$24雙芝邊)
呢個韓式海陸裡面有鮮蝦、牛肉、薯角、蘑菇、青椒、洋蔥,配料都幾多,而且我地仲加左雙芝邊,類似芝心批嘅意思。
薄餅以香辣醬、酸忌廉醬、馬蘇里拉芝士調味,非常惹味。呢度嘅薄餅有少少似麵包,餅底較軟腍,麵粉感唔重。
每小件薄餅都有一隻蝦、牛肉,蝦仁彈牙;牛肉類似韓式做法,煎過,唔會太肥膩,但又有少少油份,所以成份薄餅食落都唔會乾 加上其他大量配料,口感豐富。
如果鐘意脆底嘅人未必會鐘意,但我地兩個都幾鐘意,而且完全唔覺得飽滯。加錢配嘅雙芝邊令口感提升,芝味都幾濃
韓國烤肉芝加哥 $176
薄餅上枱時已經切好哂,材料用處馬蘇拉芝士、芝士條、牛小排、臘肉腸、蕃茄、巴馬臣芝士、糖霜等製成,非常豐富。
薄餅嘅芝士香濃,拉絲效果出眾。自己都曾經喺尖沙咀食過類似嘅薄餅,相對之下,呢份嘅芝味更突出。
薄餅外層好香脆,而可能加左啲糖霜嘅關係,食落帶點甜,粉感唔重,不膩口。
每件薄餅有一塊烤牛小排同幾片臘肉腸,烤牛肉都幾香口,切成條狀,如果每份再多少少性價比會高啲整體呢份薄餅係非常好食,香口惹味。
蜂蜜牛油秘製炸雞 $98/6件 ($183/12件)
原味炸雞 $98/6件
炸雞份量彈性,好似我地咁人少,怕食唔哂可以選半份,個人最欣賞呢種做法,因為太多韓國餐廳嘅炸雞只有全隻,一食就十幾件,唔太適合人少食用。
半份六件啱啱好,雞脾、雞胸、雞翼都有。炸雞款式多,有蒜香甜辣、原味、火辣、蜂蜜牛油、洋蔥、芝士、蜂蜜蒜泥、紫蘇等。
比起醬炸雞,我比較鐘意呢種乾身嘅炸雞,雖然睇個樣有啲似快餐店雞,外皮炸到脆卜卜,完全唔會油膩,新鮮熱辣 雞脾肉嫩滑,保留雞嘅油份,食落唔乾唔鞋。
雞胸肉相對較大件,同埋口感冇咁滑。蜂蜜牛油味幾香口,主要係調味粉,唔會有好飽滯嘅感覺。至於原味相對之下,當然較為失色
(個人口味,都係比較欣賞Goobne chicken嘅烤雞!)
火焰海鮮湯意粉 $96
揀呢個因為我地都比較鐘意啲香辣野,剛好見到有辣湯意粉,即管一試。湯底唔算好辣,容易入口,質地帶稠身,會比較容易掛汁。
意粉腍身,加上有啲蕃茄,酸酸辣辣,幾惹味海鮮就唔多,有四隻青口、少量魷魚圈。
青口不錯,雖然細細隻,但質地軟腍,唔會有雪藏青口硬到不行嘅感覺。魷魚圈則略嫌太幼身,煮得有點耐,比較乾韌
辣味魷魚烤蛋拌飯 $98
旁邊圍住有烤蛋,唔係好厚身,加左燈籠椒同辣醬去炒,食落香香辣辣,裡面仲有魷魚、椰菜、紫菜,份量唔算好多,不過簡單美味
Maru紫蘇炸魷魚圈 $73
魷魚圈係當中比較失望的,約有十件,中間一坨沙律菜。食落感覺唔係即時炸起,炸漿厚身,口感偏硬實,而非香脆。魷魚都係比較硬實,冇乜彈牙感覺
Pizza Maru嘅薄餅相當出色,我地就食厭左連鎖餐廳嘅薄餅,事隔一段時間,先重拾對薄餅嘅興趣。而且款式夠多,唔怕冇選擇啊。
Pizza Maru
地址:銅鑼灣軒尼詩道500號希慎廣場13樓1302舖
Follow us:
Instagram: http://bit.ly/2g3ZtuS
Facebook: http://bit.ly/2gu1fIG
Blog: http://bit.ly/ywycarol
Contact us: mrmrsfoodhk@gmail.com
留言列表