再窮都要去旅行！

樂丘廚房

用餐日期：2017/12/20

第四日嘅行程基本上以「吃」為主，除左喺下午時間會去到動漫彩繪村走走，咁我地一早食過簡單蛋餅早餐後，就黎到口袋名單另一間餐廳 - 樂丘廚房。

樂丘廚房喺台中有兩店，一間喺東海大學附近，聽聞都係唔少學生嘅愛店，既有主食，又有甜品，價格不高；後來喺一中街開左分店，對好多當地人而言，都係喜訊，起碼唔洗跑咁遠

我地喺第三日亦有到東海大學走走，但由於時間太趕，未能安排喺附近用膳，於是過擇最後一日黎到比較方便嘅一中店。

作為一個頗有準備嘅旅行，能夠預先訂位嘅店，我地都訂左，避免黎到先遇上冇位或者要等位會浪費時間嘅情況。此店開放電話訂位，我地預約左12點，店家一開門我地就到左。

樂丘廚房位於一中街 I Plaza愛廣場嘅2樓，樂丘廚房嘅對面就正正係海賊王主題餐廳及專賣店。附近都幾熱鬧，以食店為主，地下更有少少似美食廣場，有不少小店、小食。

而相信係其中一間最火熱嘅茶飲店 - 老虎堂，就喺商場地下，好誇張嘅人龍，未開門已經排左廿幾人，我嚇到調頭走嚕，畢竟我都年紀大，冇咁好腳骨力。(笑)

餐廳裝潢都幾有心思，燈光偏暗一點，用大量乾燥花裝飾天花，牆上掛嘅霓虹燈牌，都係好多美女打卡嘅背景。(可能只有我覺得好難拍得美）

店中央係高身長枱，一邊係梳化位，反而枱面就冇飾品。位置頗多，但平日下午都好快坐滿，所以如果想喺呢度用餐，先行預約係最正確嘅事

餐牌供應套餐，有齊沙律、麵包、湯、主菜、飲品等，單點有前菜、烤豬肋排、鬆餅漢堡、意大利粉、意大利飯等，甜品有招牌嘅舒芙蕾鬆餅、窩夫等，定價合理。

設最低消費，每人NT200，另收加一服務費，用餐時間1.5小時。

餐廳採取半自助形式，自行到收銀點餐，由店員送餐。因為我地已經食左早餐，加上我主要係為舒芙蕾而來，，所以隨便點多鬆鬆餅漢堡達到低消費費就算。

歐姆蛋起司純牛堡 NT248

用上鬆餅皮取代漢堡包，附上一份薯條，如果有需要亦可以將牛肉換成雞肉。入面有生菜、蕃茄、洋蔥、酸黃瓜，店員有提醒，佢地嘅漢堡份量有點大。

其實佢係將啲材料用竹籤串起，歐姆蛋加左芝士炒成，蛋香十足，又夠滑溜鬆餅皮都夠鬆軟，但你話係咪好特別，又唔係囉。

牛肉較為失色，口感紮實，略乾，配埋歐姆蛋食會較好。生菜係巨型，好似有半棵咁，唔知有冇人可以一口食呢個漢堡，自問都算係大口仔，結果都係要拆散哂咁食

薯條係好傳統嘅台式薯條，沾粉即時炸，十分香脆，都唔會差得去邊。

另一份係我比較期待嘅舒芙蕾鬆餅，一共有幾款口味，當日供應珍珠奶茶、玫瑰仙子、抹茶紅豆麻糬、提拉米蘇等，定價 NT180-220。

原本我都對珍珠奶茶口味幾有興趣，直頭喺鬆餅上面加珍珠，比較少見；但我最終都係好似老少女般揀左粉嫩粉嫩嘅玫瑰味

玫瑰仙子 NT220

等左大約20分鐘，上枱時店員都幾貼心，先問我地需唔需要影相，等我地準備好再打開蓋子，如果鐘意呢個乾冰效果就要點玫瑰口味了，得呢個口味先有的。

鬆餅顏色幾fancy，面頭仲灑左玫瑰花瓣，賣相就滿分，都幾夢幻旁邊附上雲呢拿雪糕，乾冰煙霧抹續一陣子，足夠又影相又拍片，以價錢黎計，定價相宜

鬆餅嘅size比一般食嘅大塊啲啲，厚度適中，形狀保持得完整，未有空氣感，不會下塌。食落唔算鬆軟，口感綿密，類似蛋糕，蛋香一般，有點過熟，底同面有啲燶燶地，同香港食到嘅差不多。

面頭嘅乳酪加上玫瑰花瓣酸酸甜甜，至少令鬆餅不至於膩口。可能我期望有點太高喇，質素未算理想

總括黎講，呢間餐廳嘅環境不錯，食物味道中規中矩，兩份餐點連服務費共 NT515，挺公道，聞說佢地家嘅意粉不錯，可惜今次肚子空間有限。

我地係第一輪入座，上菜需時，但由於太人氣，就有限用餐時間，我地都只好睇住店員眼色，一食完自動自覺離開。

樂丘廚房 一中店 

地址：北區一中街96號 I PLAZA愛廣場2樓

檢視較大的地圖

電話預約：（04）2222-0330

粉專：https://www.facebook.com/LEOCHIU02/ 

餐單：http://www.leochiutw.com/menu.html

Follow us:

Instagram:http://http://bit.ly/2g3ZtuS

Facebook:http://http://bit.ly/2gu1fIG

Blog: http://bit.ly/ywycarol

Contact us: mrmrsfoodhk@gmail.com