再窮都要去旅行！

Dreamix

用餐日期：2017/05/06

無可否認，一向都覺得食tea set有種平野冇好野嘅概念，食過百幾二百蚊嘅下午茶，就算賣相唔錯，食物都係一般水準，食一次都未必會想番轉頭。

但要我俾三幾百蚊食個酒店tea，我又唔捨得

週六喺觀塘工廈食左一set高質下午茶，本來見到位處工廈，都冇乜期待，結果相當驚喜，鹹、甜點質素平均，兩位唔洗五百蚊，性價比高。 

平時我地都經常去工廈食野，唔知點解當日一出lift門已經聞到好大陣異味 (垃圾味?!)

轉個彎就見到Dreamix嘅招牌，好在餐廳裡面不受影響。門面走文青風，裡面裝潢都幾有心思。

一入門口會見到廚房，乾淨整齊，另一係擺放自家製產品，例如蝴蝶酥、曲奇等。

餐廳位置都幾大，但座位唔算多，空間感足。一律用長枱，放上簡單擺設。

下午茶時間光線充足，配合大玻璃窗，採光一流，影相實靚

晚上以私房菜形式食分子料理為主，下午茶一般於週末1pm-4:30pm供應 (可以留意餐廳 fb/ig)，座位有限，而且鹹甜點都由廚師每日新鮮製作，所以一律不接受walk in，要預早訂位！

見到今次試嘅款式同四月份嘅唔同，就算食過，都一樣有新鮮感。

Tea Park $260/位；$480/2位 (冇加一)

下午茶一共有4款鹹點，5款甜點，配熱茶。

上菜後，廚師會逐樣食物簡單介紹，賣相好精緻。相機食一流，人食都一樣滿意

鹹點

芝士煙肉muffin：

呢度嘅muffin比較特別，以鹹點形式呈現。外型有少少似卷蛋，煙肉味突出，有飽腹感。

煙三文魚忌廉芝士酸包：

都係好多時食tea會遇到嘅鹹點之一，煙三文魚唔會太鹹，酸包帶點硬脆，好食

蟹肉龍蝦蘆荀撻：

每人有兩小件，以蟹肉加上龍蝦汁、蘆荀做成。蟹肉味道突出，唔會被撻皮嘅牛油味蓋過，而且撻皮脆口。

伯爵紅茶牛角酥：

牛角酥係店家招牌之一，裡面加入伯爵紅茶餡，切開都幾流心架，味道唔算好濃，唔會甜膩。

牛角酥果然出色，鬆化

食左幾款鹹點，感覺到廚師對食物嘅用心，唔會覺得好似平時喺餐廳流水作業嘅下午茶。

香檳熱情果芒果蛋糕：

我覺得最好食係呢件蛋糕，有高級餅店食到嘅水準。以下午茶以言，咁大件夠大方。

香檳夾心，味道突出，熱情果、芒果做成嘅慕絲蛋糕香滑，層次豐富，配合得宜。賣相靚得黎又好食

玫瑰紅莓芝士蛋糕：

以紅莓做出蛋糕嘅顏色，強調冇色素、冇香精嘅芝士蛋糕。

味道天然，甜度適中，芝士味較弱，質地都唔係好芝士蛋糕，加上size唔細，食多幾啖會有飽滯感。

草莓石榴乳酪：

以玫瑰紅莓做成蛋白餅，煙韌清新、唔甜，番石榴乳酪較流質，普通。

蜜柑檸檬馬卡龍：

馬卡龍裡面有蜜柑、檸檬夾心，煙煙韌韌，略甜。

青瓜豆腐雪芭：

以分子料理手法做出菊花味嘅泡泡，食落都係泡啦。青瓜味嘅冰沙，配合打成漿嘅豆腐，作為最後一味甜點，清新解膩

熱茉莉花茶：

都係普通茶包，但又鹹又甜一輪，其實飲杯茶都唔錯。

餐廳環境就唔係少女味粉紅fancy嗰種，但坐得舒適，味道整體有水準，有樣有內涵（好過俾百幾蚊食垃圾架。）

下午茶餐牌：

Cafe Siam

用餐日期：2017/04/24 

Cafe Siam一聽個名就知道係泰國菜餐廳，中環店開業多時，最近喺堅尼地城開設分店，位置更加方便。

聽到港島區，加上係打住米芝蓮旗號嘅食府，會以為價位都堅離地嗎？又唔係喎，反而定價都接近一般嘅泰國菜館。

來自泰國嘅廚師團隊更喺菜單中加入唔少新菜式，食物水準有保證，服務都相當唔錯，值得推薦

有別於中環店，新店係地鋪，裝潢帶少少懷舊味道，環境寬敞，坐得更舒適。

餐廳面積唔算十分之大，但用上木枱、木凳襯托灰色牆身、色調和營諧，營造空間感。

因為有唔少人都喜歡喺飯前飲杯酒，餐廳亦設有吧枱，每逢假日特別多客人黎過一個悠閒下午。

餐單選擇豐富，有泰式小食、沙律、湯、咖喱、海鮮、肉類、蔬菜、飯麵、甜品等。

 青檸蝶豆花特調 $38 (原價$48/新張優惠)

賣相好靚嘅飲品，大玩漸層顏色，蝶豆花本身冇味道，所以呢杯其實就係青檸梳打，可按個人喜好添加糖水，中和酸味。

 泰式奶茶 $48

茶味較淡，飲落有少少雲呢拿味，同港式奶茶好唔同。

 冬蔭蝦湯 $80

睇個賣相以為一般？但好好飲啊，份量大概有兩碗半，真材實料！

裡面有兩隻新鮮大蝦，蝦肉爽口彈牙，加上磨菇，值回票價；香茅味唔會過重，飲落唔會太鹹，適合港人口味。

 泰式單骨雞翼 (冬蔭) $68

單骨雞翼係西環店限定，雞翼切開一半，方便食用，冬蔭味道唔算好強烈。

單骨雞翼一般比較乾身，所以配合泰式醬會更好食。

 燒豬頸肉伴酸子醬 $92

豬頸肉燒得剛好，外皮微脆，肉質保持腍嫩，而且份量頗多。

附上酸子醬中和，食落完全唔會油膩，反而更惹味，推薦！

 香芒牛柳粒 $158

賣相非常吸引，牛柳粒煎得腍身，完全唔韌，而且冇筋；芒果肉香甜，加上炒過嘅洋蔥，配合得宜。

比想像中味道好，唯份量唔算好多，性價比唔高。

 椰汁焗飯$108 (雞肉/豬肉/牛肉/蔬菜/蝦+$20)

椰汁焗飯好有驚喜！店員表示，椰青係泰國直送，印上店家名字，增添獨有特色。

以新鮮開嘅椰青，椰青水，再加上椰漿焗製而成。一上枱已經聞到清香椰子味，有別於一般泰國菜館食到嘅椰青飯，唔會有過多椰油，食落清新不膩。

我地選擇雞肉，雞肉份量唔多，稱唔上嫩滑；面頭有少量肉鬆、腰果，加上飯中椰子肉，增添口感，但唔蓋過椰香；米飯加入適量椰漿，食落唔會過黏。

整體黎講係水準之作！相信如果點蝦肉，會更鮮味。

   蒜香椒絲炒椰苗 $76

椰菜苗纖維高，有助消化，而且一般要喺泰國餐廳先食到，所以我地必點椰菜苗。

椰菜苗新鮮葉嫩，食落唔苦，以蒜蓉椒絲輕炒，並冇過多油份，屬健康之選。

甜品方面有布甸、黑白糯米、雪芭、果盤、泰式糕點等，我地試左兩款。

 香芒黑白糯米 $68

推介之選！糯米、紫糯米都非常軟熟，微暖，芒果肉熟透，甜而不膩，加上適量椰奶，果然係店家招牌！

而且份量頗多，兩至三人分享剛好，特別食完幾款鹹食，以甜品作結，非常滿足！

 菠蘿雪芭 $68

以迷你菠蘿造型呈上，令平凡嘅雪芭帶點不平凡。

菠蘿味道天然唔假，食落清涼解膩，帶少少甜味。另一款椰子雪芭相信都唔錯呢！

整體黎講，Cafe Siam環境舒適，食物有水準，用料新鮮，特別推薦冬蔭公湯、椰汁焗飯及香芒黑白糯米。

西環分店喺週末下午更加推出"all-you-can-eat brunch"，價錢都幾吸引架。