再窮都要去旅行！

喺建大行左一陣之後，就決定食個午餐先。忽然醒起好似幾日來都未有試過韓國嘅拌飯，見到呢間餐餐廳有得食就試下。

門外貼住中文店員availbale，加上有中文menu，所以點餐冇難度。裡面都有本地人食緊，應該係學生，仲聽到佢地猛話「맛있다」！好食好食！

石鍋拌飯 7000won

呢個拌飯不錯吃，雖然材料簡單，不過價錢合理，芝麻同紫菜配搭飯食真係幾香口！

涮鍋 10000won/2人份 (蔬菜、麵條、炒飯、牛肉)

聽到後面學生就係讚呢個鍋好食！一萬圜有咁嘅份量嘅野食真係好抵食，特別係諗起香港食嘅韓國菜，貴嘅都未必整得好食。

先上辣鍋，講真係幾辣架，不過之後慢慢加水會好啲。

裡面已有啲蔬菜，例如菇類，入哂味。阿豬媽唔知點解催我地落牛肉，所以都盡快食左啲牛肉先。

雖然個鍋好平，不過啲牛肉都未至於核突，又唔肥又唔係紙皮牛。

麵條嘅份量都唔少，本身話個鍋係2人份，但問心我地3個都食唔哂~

食完碗麵，仲有個炒飯！

個炒飯都幾搞笑，因為用番同一個鍋炒，所以要等你確認食哂唔再加野先會幫你炒架。

同埋店員唔喺你面前炒，會將個鍋同飯拎埋一邊炒唔知係咪有啲獨門炒飯秘方。

個人認為應該有加好重嘅調味，因為個炒飯都幾鹹~

整體黎講，都算食到餐平平地嘅家常韓國料理，3個人埋單30000won~

不過由於唔見佢有中文店名，冇辦法提供作為參考呀。

Follow us:

Instagram: http://bit.ly/2g3ZtuS

Facebook: http://bit.ly/2gu1fIG

Blog: http://bit.ly/ywycarol

Contact us: mrmrsfoodhk@gmail.com

土俗村蔘雞湯

Day4因為租左韓服玩下，預約時間11點半，韓服店比較近景福宮。

雖然本身並唔喜好蔘味，但黎到韓國好似點都要搵餐蔘雞試下，於是早餐選定景福宮附近嘅土俗村蔘雞湯。

網上睇就話有個總統好鐘意食，所以就紅左，通常都要等位。週日早上10點半左右到，雖然客人都幾多，但都有位，而且鋪頭好大，就算要等都唔會好耐。

每枱都有白菜泡菜同蘿蔔泡菜，任夾，自己招呼自己，呢度嘅泡菜係幾好食。至於送上嘅人蔘酒我就頂唔順，同行朋友就幾鐘意。

土俗村蔘雞湯 16000won
預計大家都唔會太鐘意強勁蔘味，純粹當乜都試下，怕山蔘味道重，所以只係點最普通嘅蔘雞湯。聞落蔘味唔算好勁，接受到，可惜主角係老雞，唔嫩唔滑，冇諗過韓國會食到唔嫩嘅雞

我估如果想食滑啲，可能要點烏雞~

蔘雞湯裡面仲有啲粥，粥唔係韓國綿綿嗰種，比較接近廣東粥，一粒粒米，個人黎講食粥多過食雞…

電烤雞 15000won
以為蔘雞老啦，真係低處未算低…呢隻電烤雞真係老到冇朋友

皮硬，肉乾柴，仲要冇味… 好在佢地有鹽同胡椒粉點下

海鮮蔥餅 15000won
我地塊蔥餅煎得唔均勻，一邊燶一邊冇咁燶，呢塊煎得唔算厚，唔算油~但由於喺南怡島食過太好食嘅蔥餅，呢件都好普通。

整體黎講，呢個早餐輕微中伏，好在因為要著韓服，冇叫太多款式。

土俗村蔘雞湯
地址：鍾路區紫霞門路5街5(地鐵3號線景福宮站2號出口)

Follow us:
Instagram: http://bit.ly/2g3ZtuS
Facebook: http://bit.ly/2gu1fIG
Blog: http://bit.ly/ywycarol
Contact us: http://mrmrsfoodhk@gmail.com