FireBird
用餐日期：2017/10/29
位於銅鑼灣邊寧頓街嘅FireBird係一間日式居酒屋，以串燒為主，同時供應多款日式料理，消費不高，食材例如雞蛋、和牛、鮮魚日本直送，由日本師傅主理，質素有保証。
餐廳位置唔多，一邊係吧枱，有少少酒吧格局，面前就正係開放式廚房，如果鐘意坐吧枱，較有氣氛的話，建議預約位置；另一邊係高枱高櫈，但都唔會覺得不舒適。
餐牌供應沙律、前菜、刺身、壽司、炸物、串燒、日本料理、鍋物、茶漬飯、甜品，選擇豐富，定價合理。
前菜盛合 (6點) $88參考懷石料理嘅概念，前菜六小碟，佐酒不錯。分別有玉子燒、日本蒜頭、蟹籽蘿蔔蓉、瑩光魷魚、日本蘆笋、芝士鰻魚組成。
作為前菜，幾開胃。玉子燒香甜；芝士鰻魚嘅芝士粒creamy；日本蒜頭好特別，蒜味唔重鹹鹹地，口感爽脆
唯獨瑩光魷魚比較腥，唔啱口味
明太子芝士椰菜燒餅 $68一次過可以試到兩款味道嘅燒餅，左邊係燒汁，右邊係芝士明太子，各有特色，滿滿蛋汁同柔軟嘅雞蛋，裡面加有椰菜絲，口感豐富。
山盛! 芥末脆脆薯條 $58薯條新鮮炸起，熱辣辣，調味唔會太鹹，份量頗多，兩個人食極都食唔完。
珍寶海老天婦羅盛合 $158除左珍寶蝦，另搭配茄子、蕃薯、紫蘇葉，非常豐富。我都係第一次食咁大隻天婦羅蝦呢，一共兩隻，性價比幾高嘅炸物，畢竟隻蝦有一隻筷子咁長啊
天婦羅炸漿唔厚，香脆鬆化，蝦肉彈牙鮮味，實在大滿足
鹿兒島霜降A4橫濱風和牛燒2人前 $298鹿兒島出產嘅和牛油脂分佈平均，和牛肉呈嫩紅色，一場黎到，都要試試。一份約左十件，配上野菜，例如洋蔥、雜菌、茄子，伴味噌汁。
店員首先用和牛油脂燒熱個爐，然後輕輕炒熱野菜，再加入和牛，翻兩三下，最後加入味噌汁食得，十分期待
和牛粒肥美，肉質嫩滑，以味噌調味，唔會太嗆。茄子、洋蔥、椰菜等都煮得香甜。
鮭魚茶漬飯 $78享用和牛途中上左一份茶漬飯，我地都無瑕欣賞。
飯團燒至微脆，帶飯焦感，面頭係燒鮭魚，附上微溫嘅湯汁，食嘅時候先加入。飯焦香口，鮭魚略乾略鹹，幸好湯汁清淡。
富士雪山布甸 $58吸睛度高嘅甜品，店員以火槍加熱棉花糖，待棉花糖慢慢溶化後就會見到甜品嘅真身，原來係雪糕、布甸
面頭微脆，雪糕小小一球，配合布甸食冇咁甜膩。布甸質感稍實，奶味重，而且見到裡面有雲呢拿籽呢。
Frozen Grapefruit Cocktail $68帶清新水果香，柚子、燒酒加上梳打水做成，酒味唔會太濃烈，容易入口。
Lava Flow $78賣相吸引，以士多啤梨、菠蘿為主嘅飲品，忌廉細滑，飲落香甜唔假。
FireBird
地址：銅鑼灣邊寧頓街13號隆堡柏寧頓酒店地下
Follow us:
Instagram:http://http://bit.ly/2g3ZtuS
Facebook: http://bit.ly/2gu1fIG
Blog: http://bit.ly/ywycarol
Contact us: mrmrsfoodhk@gmail.com
吃貨夫婦 (51)
