日期：2016/12/1 - 12/6
地點：首爾，出發！
酒店：Wons Ville Myeongdong（5晚酒店$25XX）酒店介紹可參考前一文章：
航班：HK Express 早上7:25；回程晚上9:55（兩位機票$25XX左右，連去20kg，回40kg行李）
天氣：由於事前有N個朋友講話好凍好凍好凍，呢6日大概0度至7度，但冇想像中咁凍，亦都好傷心，最終冇雪落
值得一提係，雖然好乾燥，但無論我搽乜都好吸收，難怪啲韓妹皮膚咁好(?) 妝都keep得耐啲
電話卡：（想highlight一下，所以先說）
在旺角買的，一般旅遊個人黎講唔喜歡租 WiFi egg，第一我機不離手，隨時upload照片，相信好快會冇電；第二同行仲有其他朋友，冇錯租一隻蛋share用係好便宜，但變相我地行程冇彈性，唔能夠各有各行，分開左要搵番大家就唔方便，所以一向我都係買電話卡。因為第一次去韓國唔知邊張sim卡好，事前上過唔同forum睇過其他達人分享，但發現張張都有人話好有人話唔好…
所以最終都係隨便買~
最緊要揀左兩款唔需要預先登記嘅，我怕煩。
上面係和記嘅韓國sim卡
$80/7日/2GB，收網絡係SKT，一插即用，APN都唔需要改，好方便！雖然得2GB，但朋友不停share、send相都夠用，而且接收良好，大部分時間上下載有幾MB。
下面係用到燥底嘅MORE sim卡
$100/8日/5GB，網絡同樣係SKT（就唔明，明明相同網絡，點解呢張收得差咁多！）APN有少少setting，但唔複雜。聲稱有4G，但長時間只有3GB，仲要係龜速3G，同一個地方，朋友上網send相冇問題，我呢張就往往收唔到！
好激氣，俾5GB都冇用，因為根本收唔到！
本來由機場去番明洞市中心，可以選坐舒服啲嘅巴士（15000won/位，60min左右），不過想節儉啲，反正去程行李唔算太重，就算要行樓梯都唔會話超辛苦，所以選擇左地鐵。
首先坐直通車（18000/3位）轉4號線去明洞，總數係7250won/位，50min左右到達，由於酒店喺10號出口，總數行左兩次樓梯~
直通車有劃位，而且有 WiFi，雖然冇景睇，但都好快到左。
上車前喺便利店買左 bananajiu嘅蕉奶飲，原來係幾好飲的~
事後我決定每日飲一枝，試下幾個味道，之後嘅post會繼續出現。
香蕉奶 1000won 機場便利店
機場便利店買1000won，出到明洞1300won。
真係幾好飲，呀 一飲就醒起明治馬騮仔嗰香蕉朱古力
第一站：明洞大使館
check in左之後同大部分嘅人一樣，我地都係去明洞大使館換錢，當日係1:150，由於住明洞，差唔多都會經過呢度，所以並冇一次過換哂所有錢~
第二站：Isaac Toast
暑假去澳門時食過Isaac Toast，當時覺得非常好食 ，決定黎韓國一定要喪食！
佢地嘅分店都好多， 差唔多有20間(?)，就算唔喺明洞，都總有一間喺左近。
明洞呢間只提供外賣 ，就喺明洞5號出口附近，雖然事先上網睇過話3號出口那間會比較少人，不過覺得大遠！週四下午時間呢間都冇見人龍，而且店員快手快腳，唔會等好耐。
火腿奶酪吐司 2200won
火辣煎肉mvp吐司3200won
辣味雞肉mvp吐司 3000won
點了最基本嘅款式，加上兩款mvp吐司。店員先用奶油烤麵包，加上甜甜嘅煎雞蛋、芝士（咁嘅配搭好難唔好食啦？）特別覺得辣味雞肉果款好食，惹味非常！
Isaac Toast
地址：首爾特別市中區忠武路1街24-41(明洞no.5出口)
第三站：小食
食多士當然未飽，見到明洞有檔小食就開始韓國第一串魚糕，韓國嘅魚糕簡直係我大愛！
魚糕 2000won
炒年糕 3000won
食左魚糕，飲啖湯，驚覺原來魚糕咁好食！可能平時香港食嗰啲太垃圾
不過呢間嘅炒年糕太辣，同埋好鬼大舊，粗身，比較推介魚糕！
地址：明洞Savoy Hotel直行右轉
第四站：Osulloc Tea House
之後打算去南山，晚餐大約喺8點，所以再去埋綠茶專門店Osulloc潮聖
明洞呢種商業區入面有樓高3層嘅cafe都幾誇張，行到攰攰地，唔存在搵唔到位hea嘅問題 ，至少香港唔會見到，稍為好啲嘅cafe都排哂隊~
呢度底層就有手信代表綠茶醬、茶葉、茶具出售。
綠茶雪糕奶昔 7000won
雖然聲稱想坐低飲杯熱野暖下，奈何而家嘅天氣 ，店鋪頭都開暖氣，變相又想飲凍野
綠茶雪糕綠茶味香，食落有所謂嘅回甘，綠茶奶昔，奶味偏重，帶淡淡綠茶香
柚子綠茶沙冰 6500won
加左柚子嘅綠茶沙冰，味道基本上被柚子蓋過，雖然搞匀左， 綠茶味相對薄弱，沙冰打得唔算好碎。
綠茶芝士Tiramisu 5000won
呢件tiramisu好好食難怪係人氣產品！綠茶係4款中最濃郁，相信係因為面頭嘅綠茶粉。
芝士既滑 味道且濃，而且唔會蓋過綠茶，配搭融洽，推介呢件！
綠茶蛋卷 4500won
食左tiramisu再食呢舊蛋卷，呢件顯得非常普通，蛋糕都係鬆軟，但綠茶味偏淡，雖然裡面奶油都算滑，但成件蛋卷感覺較乾口。
Osulloc Tea House
地址：明洞1街47-1 (2號線乙支路入口站5、6號出口間)
第四站：小食
食完甜品 大概5點鐘 明洞嘅小食都陸續開檔，行過又想食左烤扇貝（之後整理好會獨立一篇明洞小食，方便閱讀）
烤扇貝 8000won
即場烤熱再溶芝士，扇貝都比想像中大粒 ，雖然燒成咁都冇乜鮮味可言，不過扇貝肉都唔老！
另外芝士味濃郁，熱辣辣食係爽 計一計，大佬成50蚊隻
地址：明洞大街
第五站：南山 / N首爾塔
因為早機嘅關係，怕去到首爾會攰 ，而且第二日參加左one day tour唔想太chur，所以Day1只安排左一個景點 - 南山
行上南山途中嘅景都幾靚，所以一路行一路影，都好快黃昏。
話明新手遊首爾，兼遊客mode啟動，點都要去南山留低幾條腳毛
就好似黎香港要上大佛不過漏左一樣遊客做的事，冇整番個心鎖
去南山可以坐巴士或者坐䌫車，見後者唔係太貴，來回8500won，所以坐下。
平日所以唔洗點等 距離好短，架車都行得幾快~
每晚7-12點會加入燈光效果，塔身會著燈兼轉色，都值得黎一次嘅~
天氣凍比較容易口乾，所以我地落山前都喺便利店買左野飲，結果中伏了！
檸檬燈泡飲品 1700won
好難飲…雖然係檸檬飲品，但甜得過份…
If White Grape Juice
本來喺香港都飲過呢個牌子嘅椰子汁，都心諗應該好穩陣，所以先買。中伏呀…
好甜！甜到會糖尿…完全唔想飲
冇買到架，見咁可愛拎黎影下相。
去啦，比卡超！
南山
地址：地鐵4號線明洞站3號出口
第六站：LINE Friends Store Myeongdong
本身唔係熊大粉絲，不過呢間LINE Store都係迷你景點 (?) 咁啱喺旁邊食姜虎東燒肉，所以都有入去行下。
門口呢隻熊大都幾無敵，唔洗排隊緊係港女mode，影番幾張。
1樓主要係文具、公仔 2樓會有啲家居用品、衫。
而且2樓都仲有幾個影相位，唔買都可以入去影下，夠大方。
不過老實說啲野好貴
見到有啲小朋友帽幾得意但唔會捨得買…
除左明洞 新村、新沙、弘大都有LINE Store，不過LINE cafe就新沙、板橋、梨泰苑先有。
LINE Friends Store
地址：서울특별시 중구 명동8나길 9 (明洞6號出口)
第七站：姜虎東白丁烤肉（之後會獨立發文再詳細啲）
燒肉方面編行程心目中都係姜虎東或者haha（MC當然首選劉大神）所以佢係姜虎東定姜東虎燒肉，我都有多少亂
都唔記得咩原因食呢間~
明洞東大門都有分店，我地食呢間喺Line Store隔離，本來想搵個地址，但發現搵黎搵去都搵唔到…相信去到LINE store會見到，因為樓下放左姜生嘅紙牌。
由於係平日 客人唔算多，普通話店員都ready~
雖然部分肉類店員會幫手燒，韓國店員整體唔會覺得特別有禮，偶然仲會感覺佢地係有多少不滿(?)
反而呢度嘅中國店員算比較有服務，作為第一餐晚餐 5人除開百五蚊唔洗都算係咁，香港嘅韓國燒肉真係太貴
地址：LINE Friends Store旁邊서울특별시 중구 명동8나길 9 (明洞6號出口)
第八站：小食
魚糕
因為仲想食啲小食，所以晚餐我地故意冇瘋狂食，留番少少quota再掃下街。
個人黎講覺得呢串魚糕最好食
士多啤梨鮮果汁 4000won
佢地仲有其他生果，不過唯獨士多啤梨要加一千圜，可惜士多啤梨唔濃，睇住佢加水加糖水，但都冇乜味，唔甜唔酸。
香蕉朱古力crepe 4000won
用嘅係nutella朱古力醬，冇得輸啦(?) 除左面頭有醬，裡面都有揸到。包好香蕉，再加入粟米片。
份量都多，而且會有口感，塊皮多少有啲厚，始終要裝住咁多料，不過30蚊唔洗，都算食得過~仲好想買個醬。
士多啤梨 12000won
明洞大街是但一檔有賣一萬圜亦都有賣萬二圜，我地買左後者聲稱有機 後來諗番相信冇分別…
問心有啲失望，即時食唔係好甜，食唔哂雪左一晚，男朋友就話甜啲。但心理同實際上都覺得朋友啲手信好鬼甜
士多啤梨大福 2500won/個
唔知係咪同一檔，所以都覺得士多啤梨唔夠甜…糯米皮厚到痴線，同大阪食到嘅大福完全唔同
裡面雖然仲加左紅荳蓉…但冇提升味道…
主要就係食為主…而且我嘅行程冇乜參考價值，所以參考下食左啲乜可能好啲
Day 1：
Isaac Toast > 小食 > Osulloc Tea House > 小食 > 南山/N首爾塔 > LINE Friends Store > 姜虎東白丁烤肉 > 小食
Follow us:
Instagram: http://bit.ly/2g3ZtuS
Facebook: http://bit.ly/2gu1fIG
Blog: http://bit.ly/ywycarol
Contact us: mrmrsfoodhk@gmail.com
吃貨夫婦 (51)
