再窮都要去旅行！

BORA 咖啡步拏

整個行程其中一家我期待嘅食店，正是呢間Bora！事前見過太多太多關於呢度嘅美美甜品相片同食評~超期待。

所以Day4 離開景福宮之後就直接過黎呢邊食甜品，食完亦都可以方便我地行下附近嘅韓屋村。

BORA位於三清洞嘅小巷入面，不過巷外放左幾塊banner，所以唔會難搵。

見過有文章介紹，原來店名보라（音：bora） ，韓文就係解作紫色~

菜單除左最有名嘅紫薯甜品，仲有各式各樣嘅雪糕、刨冰、飲品、包等等。

成間cafe位置唔多，裝潢簡約，感覺有多少日本風格。

甜品嘅價格比想像中便宜！食完之後更加覺得可以有呢個質素實在太值得推介了！

搵到位置後，要去櫃枱點餐，點餐後都係叫飛自己去取餐，食完都記得要將托盤放番去櫃枱喔！

（店員好有要求的，見到有其他客人，嘗試想拎開托盤，直接將甜品放喺枱上，店員係會要求要將甜品放番喺托盤上的，唔知係怕整污糟定點？）

紫薯雪糕 3500won

見到客人有9成都會點呢款的！造型就係一舊屎，就算係屎，都係一督可愛的屎。

一上枱，大家都被驚豔了！賣相一百分，而且聽講店家用嘅都係自然嘅材料~

面對呢隻粉紫色，加上上面一顆咁有心思嘅小鮮花，我嘅少女心完全爆發！

淡淡紫薯香，一啲都唔人造味，再加上香濃牛奶味，真係好正！食完呢舊，簡直令我愛上韓國呢種便便造型嘅雪糕！

雪糕嘅質地唔屬於細滑，有點沙沙的，但入口即溶。

冇辦法唔愛上呀！而且係眾多我地點嘅食物當中最出色，最令人難忘嘅！

紫薯刨冰 6500won

繼續「紫」落去~又一個可愛嘅造型！呢度嘅刨價錢唔貴，但當然份量都係小小一份，一個人食一份冇難度。

凡點刨冰系列，都會贈送核桃仁及紫薯片，紫薯片味道香濃，唔會過甜，而且比較厚同硬，超有口感，脆卜卜！（紫薯片有提供禮盒裝，可以買走，文末會再講）

由於食過紫薯雪糕，相對之下呢個刨冰就味道冇咁濃，如果只能二選一，會揀雪糕。如果可以點哂兩樣就當然最好

不得不提，店家非常細心，紫薯薯嘅醬如圖片所見係比較杰身，所以喺紫薯片嘅下面一格，裝有額外嘅紫薯醬呢！唔夠的話，可以自行添加。

呢度嘅泡冰帶微微牛奶味，唔會覺得好甜。

綠茶刨冰 6500won

本來店家有名嘅係紫薯，都唔會特別期待佢地嘅綠茶，反而有驚喜！我地5個都覺得幾好食~

除此之外，綠茶刨冰仲貼心地附上紅豆蓉，可以混合食~

綠茶味香濃，唔甜，微微苦澀帶甘~友人讚不絕口！

紅豆刨冰 6000won

紅豆刨冰嘅造型比較平淡，並冇預先加上紅豆醬，而係另外用小瓶裝起，由客人自行添加。

牛奶冰嘅牛奶味比前面嘅紫薯冰突出，明明就係同樣的冰(?)

紅豆蓉味道唔算太甜，剛剛好，但食過紫薯刨冰同綠茶刨冰，呢個相對最普通。都係推介前面兩堆款~

飲品方面分別點左4杯：紫薯拿鐵、綠茶拿鐵（熱+凍）4800won

飲品毫無賣相可言，對比起前面嘅甜品，令人無乜心機。雖然價錢唔貴，大概30蚊港幣。

熱飲同凍飲用嘅都係外賣杯，初時會諗如果熱飲用耳仔杯裝，紫薯、綠茶呢兩隻味道都可以期待一下賣相；可惜只係用白色紙杯盛載。

凍飲如圖中所見就係用一般嘅外賣膠杯。

味道方面，紫薯味道比較淡，牛奶味道較突出，熱飲還好，凍飲的話，冰太多，基本上愈飲愈淡。

綠茶味道都相對較濃，甜度較低，而且唔會飲到綠茶粉，不過整體冇乜特別。

Cafe BORA

首爾鐘路區栗谷路3街 75-3(地鐵3號線安國站1號出口)

Follow us:
Instagram: http://bit.ly/2g3ZtuS
Facebook: http://bit.ly/2gu1fIG
Blog: http://bit.ly/ywycarol
Contact us: mrmrsfoodhk@gmail.com