再窮都要去旅行！

Hanbok plus

之前去大阪都有租過和服玩下，今次去韓國都有見到韓服出租，睇過網上資料，一般就分外出租借同室內拍攝，前者只提供韓服，客人自行外出搵景點拍攝，價錢較便宜（比起著和服，簡直便宜幾倍）；後者除左有韓服提供，一般會有場景可以拍攝，部分套餐仲會包埋攝影師，有便宜亦都有較貴的。我今次揀嘅係一般嘅韓服出租，並冇帶攝影師（太貴），雖然天氣有啲凍，不過都想去戶外拍攝，場景拍攝怎麼看都會幾分假。

因為初次去韓國，怕唔熟路程，所以一心都準備去比較熱門、方便嘅景福宮影，定好目的地，我就開始搵韓服喇。原本網上比較多評語嘅似係：one day hanbok，最後冇揀有幾個原因：第一，網上大部分係「試用文」，店家邀請blogger們去試玩的，我怕評語比較一面倒，第二因為打算喺景福宮影，one day hanbok位置喺安國站（店家已搬遷往北村），路程唔算遠，但有機會都要坐車，總會怕礙眼不過，其實佢地家嘅韓服都真係幾靚的~而且有懂普通話嘅店員，唔怕溝通唔到。

One day Hanbok：http://www.onedayhanbok.com/

後黎再搵第二間，睇下會唔會有近啲景福宮嘅，就搵到呢間：Hanbok Plus

上店家facebook同instagram睇過之後，一睇愛上，就決定喺呢間租！

店家的網站：http://hanbokplus.modoo.at/?link=0ahrvg72

店家的facebook：https://www.facebook.com/jina.lee.756412?lst=666210733%3A100003991316893%3A1481690787 

（預約可發訊息聯絡店家，雖然預約左，但店家當日並冇確認，大概就算walk in都會接受的，不過穩陣起見都可以先預約）

店家的instagram：https://www.instagram.com/hanbokplus/

Creatrip的優惠：https://www.creatrip.net/blog/309/ （此優惠我當時冇用，所以唔清楚work唔work的）

美吧？！

〔店家圖片〕

揀Hanbok Plus除左因為佢地嘅韓服夠靚之外，仲有以下幾點：

大部分款式都連「燈罩」（內裙），即是裙擺裡面嘅魚骨，會比較挺身，而且去到景福宮見到各式各樣嘅韓服，發現帶燈罩韓服靚好多，比較華麗（冇內裙搞不好會似宮女）

呢間係搵過資料小數會包編髮（不另收費），個人手殘，有人搞埋頭髮，當然係一流

地點方便，就喺景福宮附近兩個街口左右，避開要坐車嘅礙眼度

價格方面，其實每間相約，當日去到景福宮附近見到其他韓服出租都差唔多價錢~

Hanbok Plus：（男、女）基本上列得好清楚

〔官網圖片〕

當日週日，本來預約時間係11:30am，但因為早餐吃得較早，所以就早少少到 Hanbok Plus睇睇。

平日我唔敢講，但週日一大早都已經有唔少客人！所以強烈建議預約早少少，唔係怕人多，係怕想要嘅款式冇哂仲會冇locker！

〔其他客人〕

店家喺景福宮2號出口，上到去果然好小一間…（同和服嘅規模唔能夠相比）而且已經有好多遊客揀緊衫。由於係小資經營，只有兩三個店員，但由於換韓服唔會好耐，所以都唔怕等嘅時間長。

雖然人好多，但韓服嘅數量都係唔少的，只係有部分顏色會比較受歡迎，而我心目中一早選定款式，所以只需要專注搵就可以了。

如果有睇過韓劇，都略略會知道邊種款式比較好睇，可以避免宮女、路人甲嘅款式

年輕嘅可以選比較粉色，想顯成熟除左深藍色，亦都有黑金嘅款式~

呢度嘅韓服都算保存得好，不過偶然有啲裙擺會掉線，所以選擇嘅時候，如果介意可以檢查裙擺；我個人就冇所謂，反正影相唔會影裙邊。

〔雖然友人覺得粉色比較襯我，但我都係一心喜歡旁邊嘅深藍色款〕

揀好裙之後，就去旁邊嘅架，揀埋上衣~上衣都有標籤住尺碼的。

12月初天氣都有啲凍，所以我一早預備左打底衣，記得要著白色的！否則會透出黎；下身方面由於裙長，所以我都著左厚絲襪，唔會露出黎，可以放心。再加上兩三個暖包同一條披巾，基本上已經唔會凍。（再凍啲就唔敢講，哈哈）

更衣室有3格，揀好記得企喺門外示意，阿豬媽會招呼一下，先叫你著「魚骨」，之後套上裙，再著上衣，幫你縛好，佢只會講韓文，但太約都估得到佢嘅意思，都係問下會否太緊呢種問題，最後仲會用珠針固定上衣同內裙。

著好衫之後，外面有梳妝台，坐低叫店員幫手編髮，真係幾秒鐘就綁好，叫我自己搞，怎麼可能？

最後揀埋頭箍/髮飾，有小物品例如電話，可以借小提包，不過小提包有點舊，要好認真揀先揀到完好無缺的。

著韓服係唔會提供鞋子嘅，而且呢種款式都唔露鞋，我當日著嘅係白色波鞋。

男士方面！款式當然冇女裝咁多，所以三兩下就選好。男朋友之前去日本都唔肯陪我著和服，嫌貴，又話係道士、武士；今次見平平地，佢都肯陪我顛下。

老實講都係幾值得一試嘅，旅行嘛，做下遊客做的事，不好嗎？

我呢套就係「高檔韓服」，價錢20000won/4小時。左邊嘅係男朋友，款式係20000won那種，聲稱自己係皇世子。右邊嘅係友人，佢呢套係15000won，配上帽子，一共係17000won。

如果有同行朋友一齊玩，一齊影相的話，都記得要留意配色，否則撞色會冇咁好睇~

寄存好個人物品，老闆娘叫我地簽個字，俾錢就可以走得。

兩個街口左右就會到景福宮，景福宮入場費係3000won/位，著韓服嘅人可以免費入場，但依然都要去售票處位置拎張飛仔。

週日景福宮嘅遊宮都幾多，但由於面積大，都可以影唔到其他人嘅~

金色都幾有氣勢，而且呢度嘅裙款繡花都好細緻，上衣短身可以睇到腰帶，呢套都算係熱門款式，同埋熱門配襯方法，只係下身嘅裙唔同顏色而已。

都重申一次，帶「燈罩」嘅裙同在場其他韓服比較，的確係較突出。

〔穿越中的我，既戴住眼鏡，亦都拎住電話〕

景福宮嘅拍攝位置都幾多，畢竟比較大。

但如果覺得景福宮比較「濫」的話，都可以去附近嘅昌德宮，甚至有部分人會著去北村韓屋村。

不過我地只租左4小時，唔想去太遠嘅地方，又要預時間歸還韓服，所以大概喺景福宮影左兩三個鐘左右就直接番去還韓服，咁樣行程比較順。

呢個唔知條咩景點，好多人聚集，我地都唔執輸影番幾張。

因為唔係靚，所以費事露個樣出黎喇，就post呢種後面同側面嘅相。

剛好即將要離開嘅時候見到呢個儀式。

整體黎講，都好滿意 Hanboko Plus嘅韓服~

不過唔好期待會有日本和服果種超有禮嘅對待，畢竟價錢平好多，而且店家真係一間小店而已。

Hanbok Plus： 서울특별시 종로구 자하문로7 （景福宮站2號出口，Ediya cafe上面2/F）

景福宮： 鐘路區社稷路161（福宫站5號出口） 

Follow us:
Instagram: http://bit.ly/2g3ZtuS
Facebook: http://bit.ly/2gu1fIG
Blog: http://bit.ly/ywycarol
Contact us: mrmrsfoodhk@gmail.com