close
三家村水產
用餐日期：2017/11/09
浜燒係日本沿海居民嘅飲食文化，會將捕獲嘅海產喺碼頭即燒即食，香港嘅鯉魚門最近都開左一家主打浜燒嘅日本料理， 佔地三千幾呎，每日供應多款由日本、本灣等各地引入嘅新鮮海產，以最原始嘅方法浜燒黎食。
裝潢方面，都係落足本，甚有日式風味，令人諗起日本嘅浜燒店。因為餐廳位於三家村碼頭旁，黃昏時候前往，更有機會一邊用餐，一邊睇到海景、日落景色
餐廳位於碼頭，位置闊落，近門口位置可以見到擺放魚缸同冰櫃，擺放當日新鮮運到嘅海產，菲律賓石蟹、花金鼓、池魚、日本生蠔、花竹蝦、各款貝殼類等。
客人可以親自去揀選，明碼實價，食得放心
（豐儉由人）
裝潢方面花過唔少心思，用上木、竹等元素，具日式風味。人多嘅可以考慮預訂房間，更近海邊，不過我地就冇問及房間最低收費。
餐牌供應沙律、前菜、時令海產、刺身、壽司、丼飯、烏冬、燒物、炸物、甜品等，定價中上。
季節刺身特上選拼盤 $888/8種
由師傅揀選當日新鮮嘅海產砌成賣相極吸引嘅刺身拼盤，有拖羅、金槍、油甘魚、海膽、帆立貝、章紅魚、金目鯛等。
海膽鮮甜冇腥味，口感綿滑，夾埋脆口紫菜，連平時唔好海膽嘅我都食唔停口
帆立貝、油甘魚柔軟鮮味，基本上對呢八款刺身嘅新鮮度無需懷疑
壽司：海膽軍艦 $70/件、香蔥吞拿魚腩軍艦 $45/件、蟹籽軍艦 $35/件、黃金魷魚軍艦 $35/件吞魚腩好滑溜，入口即溶；海膽味道濃厚；蟹籽、黃金魷魚軍艦屬正常水平，份量大方，只係定價略高。
壽司飯口感煙韌，但紫菜唔夠香脆，略腍。
天婦羅海老卷 $160一共四件，壽司飯比較大件，海老爽口，加上芝麻同沙律醬，係好食，但個人認為其他食物會比較划算。
揀選左四款作為濱燒淺嚐：生蠔、中蝦、帆立貝、馬刀貝。
生蠔 $40/隻日本生蠔都幾大隻，蠔身燒到脹卜卜，軟滑多汁，鐘意食蠔嘅朋友不能錯過，定價合理
帆立貝 (浜燒) $98/隻帆立貝好大隻，剪開燒會比較易熟啲，為免帆立貝太乾身，一邊燒一邊可以加入木魚水。
即時剪開左，每份依然係好大隻，一口放入，口感豐滿，貝身軟腍，不過就冇想像中鮮味相對之下，生蠔更加抵食。
相對之下，生蠔更加抵食。
中蝦 (浜燒) $168/4隻同樣地，蝦嘅size都唔細，肉質爽口，頗有水準。
馬刀貝 (浜燒) $118/4隻唔係太大隻，肉質爽口，不過性價比唔高。
燒油甘魚骹 $120
雖然平時唔係好鐘意食魚頭、魚骹，但十分推介呢款油甘骹，簡單鹽燒已經好香，魚骹冇細骨，而且魚肉好嫩滑，魚油豐富，完全唔乾
清酒蝴蝶蚌 $188/8隻 蝴蝶蚌感覺比平時食到嘅再大隻啲，粒粒脹卜卜，肉厚多汁，乾淨冇沙，加上淡淡清酒味，更顯鮮甜。
炸白飯魚乾 $48入口脆身，薄薄一片，又香口。
岩鹽枝豆 $45
今晚於三家村水產進餐，甚有風味，正宗嘅浜燒都係第一次食，除左刺身、海鮮新鮮不在話下，但全晚令我印象最深刻嘅卻係燒油甘魚骹，十分回味，值得試試。
三家村水產
地址：油塘鯉魚門崇信街三家村渡輪碼頭東翼
Follow us:
Instagram: http://bit.ly/2g3ZtuS
Facebook: http://bit.ly/2gu1fIG
Blog: http://bit.ly/ywycarol
Contact us: mrmrsfoodhk@gmail.com
文章標籤
全站熱搜
留言列表
吃貨夫婦 (51)
