再窮都要去旅行！

I Love You dessert bar

用餐日期：2017/11/25

食甜品 以前多數淨係會點心太軟，梳乎厘眼尾都唔望下，自從出現一樣叫梳化厘班戟嘅野，我有少少著迷感

熱潮唔知幾時會消退，但至少而家好多甜品店，即使唔係專門做梳乎厘，都一樣有供應。

白布街嘅班戟店，喺新開嘅時候食過一次，賣$28份，排哂長龍，當時食過，覺得以價錢黎計 算中規中矩，唯獨口感像風一般，唔係我鐘意嘅類型。

銅鑼灣分店其實都開左 一段時間，礙於唔太鐘意食風，一直未訪。由於我冇再去過旺角店，所以唔清楚兩邊供應嘅款式有否唔同。

但選址銅鑼灣，設堂食，定價比旺角只有企街食高一半，分店位置唔多，冇乜特別嘅裝潢，相對用個紙兜企街食，我寧願俾多一半，用玻璃碟鐵叉 ，加有個位坐，所以並唔覺得特別貴

餐牌供應10款梳乎厘班戟，底蘊都係嗰件戟，在於味道、配料不同；另有拿破崙班戟，目測係疊起左嘅班戟，甜品定價$42-59。

設最低消費每人$35，唔食班戟，點杯熱飲就到數。

日本紫薯梳乎厘班戟 配甜薯、豆腐雪糕 $59

我諗呢份梳乎厘並非即製，因為前後十鐘就上枱，加上只係好微溫。班戟依然係原味，只係面頭灑上少量紫薯粉，所以並唔會有好重紫薯味。

班戟明顯同旺角店食嘅不同，因為嗰個一陣風嘅感覺太強烈，記憶猶新。 呢份空氣感唔會太重，帶點實在感，但又唔會似食紙杯蛋糕。

唔知係咪並非即製，蛋香稍弱， 但伴著帶甜嘅滑忌廉食，頗有驚喜

伴碟嘅紫薯蓉質地比較粗糙，入口香而不甜，甜薯片脆口。豆腐雪糕旁灑有木糠，豆腐味濃郁，唔會好快溶，不錯食。

為滿足最低消費，我地食到咁上下，就多點一份班戟，第二份冇失望呢

揀左自覺較特別嘅流心奶皇嗰款，店員話需時等候，大概係因為要營造流心效果，而冇法一早整定。那麼更好，因為我時間多的是，唔怕等。 

事實證明我食兩左份，即時做嗰份係好食得多 (等左30分鐘有多)。

流心奶皇梳乎厘班戟 配豆腐雪糕、蓮蓉馬卡龍 $56

梳乎厘上枱時脹卜卜，厚身飽滿，而到食完一刻都未有下塌同漏氣。用力擠壓下，見到梳乎厘嘅輕盈鬆軟，蛋味香，比第一份出色

空氣感唔會太重，有點實在，但又唔會似食紙杯蛋糕。 

第一件班戟並冇流心，有啲似奶皇包餡，食到中間會有小小蛋黃；第二件切開依然冇流心，但有少少蛋黃汁咇出黎，鹹香同班戟幾夾，口感會較濕潤

馬卡龍脆身，但個人口味覺得蓮蓉呢件事太中式，唔多夾而且有點甜

由於我對件戟本身幾滿意，就唔苛刻流唔流心呢一點喇

唔知係咪冇抱期望入黎，又覺得幾好味喎！今次第一次黎銅鑼灣店，未知水準能否喺我下次再訪時保持