再窮都要去旅行！

101手工涮涮鍋

用餐日期：2017/11/29

最近麻辣鍋大行其道，但多食都冇乜新鮮感，最近試過位於銅鑼灣金朝陽中心嘅101手工涮涮鍋，主打台式火鍋，好評甚多，所以都幾有信心，定價中上。

比較適合大胃口嘅人士，畢竟呢個價錢仍然有好多選擇。

餐廳位於大廈29樓，店內位置非常大，有卡位、梳化位，亦有房間供應，落地大玻璃，居高臨下，景觀一流，人多可以預先訂位。

另外設有戶外位置，方便吸煙嘅客人，又或者唔吸煙嘅客人也大可出去吹吹風，飲杯野，隱約望到過對面海，加上微微涼風，幾舒適

餐牌供應【無限時任飲任食套餐】，基本係包括前菜、鍋底(2-6人選一款鍋)、肉類(每兩位一碟)，另有手工火鍋拼盤(人頭份)或台灣夜市拼盤、一份手工炸響鈴卷及炸魚皮、飲品任飲、甜品(人頭份)。

另外有精選火鍋配料超過30款可無限追加，有肉類、魚腩、丸餃類、蔬菜、麵食等。

如果鐘意食海鮮嘅可以每位另加$58有五款海鮮拼盤。

醬料 $15/位 (基本嘅都有齊，個人特別喜歡XO醬，夠哂香辣)

前菜 (麻辣醬手撕雞、麻辣木耳)

前菜無限追加，兩款都好食，木耳夠哂爽脆，帶微微麻辣，夠哂入味。手撕雞更容易入口，唔會好麻辣

台式香辣三杯卜卜蜆涮涮鍋

鍋底有10款選擇，以雞、卜卜蜆配唔同嘅味道為主，例如冬蔭公/冬瓜/酸菜/香辣三杯卜卜蜆，香辣三杯雞、麻辣雞、沙茶雞，另有紅燒牛肉鍋同酸菜白肉鍋等。

我地四位可以選一款，揀左香辣三杯卜卜蜆鍋，因為同行朋友唔係好食得辣，選左少辣。

鍋底都幾多配料，有卜卜蜆，其實係沙白嘅大小，豬紅、娃娃菜、洋蔥、蕃茄、墨魚丸、蘿蔔等，雖然揀左少辣，但都幾惹味，鍋底香辣唔油膩，怕辣嘅應該都食到。

蜆肉份量唔算好多，乾淨冇沙；豬紅軟腍，墨魚丸都明顯食到有墨魚粒。點呢個湯底基本上唔需要醬料都好入味。

海鮮拼盤 +$58/位 (人頭份量)

考慮到有啲朋友未必鐘意食海鮮，做法比較有彈性，可選擇個別追加與否。咁我地見陣容咁吸引，四個都追加左。

拼盤有珍寶美國桶蠔、鮑魚、大海蝦、馬刀貝、蜆，按人頭份量上。除左蜆之外，每人一份。

桶蠔真係好大隻，冇雪感，淥完都冇乜野縮水，回味。大蝦、馬刀貝新鮮爽口，而鮑魚則比較腍身，蜆就係卜卜蜆嘅size，較為普通。

肉類 (每兩位選一碟)

手切安格斯prime grade牛頸脊肥牛片/西班牙伊比利亞黑毛豬肉片/西班牙伊比利亞玫瑰黑毛豬頸肉，我地揀左肥牛片同豬肉片。

牛肉肥脂平均，牛味重而腍身；豬肉片薄片，唔需要淥好耐，入口夠腍唔柴

101特選手工火鍋拼盤 (人頭份量)

有墨魚汁鳥結糖、黑松露蟹籽海鮮軍艦、太極冬菇、黑松露蟹肉餃、安格斯牛丸、黑松露芝士豚肉餃、三重芝士鮮蝦丸、三重芝士鮮墨魚丸。

非常豐富，擺盤精美。幾丸類基本上都好新鮮彈牙，蝦丸同墨魚丸都有明顯流心；蟹肉餃味道唔算太突出，餃皮薄身餡唔易散；豚肉餃皮比較厚，我自己就麻麻地鐘意食。

太極冬菇釀左墨魚滑，都幾爽爽口；鳥結糖比較少見，墨魚汁味道頗濃，口感煙韌。

手工即炸響鈴拼手工即炸魚皮

兩者都係即時炸起，口感香脆，響鈴size巨型，加上香辣湯底，特別入味。

台灣沙茶滑牛片、八寸長鱈場蟹棒、午餐肉、日式芝士竹輪卷、冬瓜、豆腐

其實食哂佢套餐入面嘅野，都已經好飽肚。但見有張配料紙任點，我地就點少少野試下啦。

相對套餐入面嘅食材，呢啲就比較正常，係一般火鍋店食到嘅質素。其中沙茶滑牛，朋友就讚幾濃味，幾好食。

其實仲有好多款配料都係任食，自問都算大食，但都冇本事試哂，哈哈。

甜品：木槺珍珠奶茶布丁

布丁質地較為流質，都幾重奶茶味，可惜面頭嘅木槺粉有點格格不入

飲品

好誇張，呢度同其他火鍋店其中一個最大分別，就在於飲品，亦係台式二字展現之處，一般喺火鍋店點飲品都唔平啦，更何況幾有誠意

超過20款台式飲品都係任飲，而且味道都唔差，不過留意，會比較大杯，可能會飽肚。分別有倒插沙冰、水果冰茶、盆栽奶茶、汽水、咖啡等都係任飲。

奶茶系列幾有驚喜，珍珠亦都幾煙韌。不過朋友點嘅兩杯愛文芒都一般，唔推薦

柑桔檸檬沙冰、青蘋果水果茶、愛文芒水果茶、蜂蜜水果茶、盆裁珍珠奶茶、盆栽香芋珍珠、盆栽特濃朱古力珍珠

週一至週四定價$398/位，星期五、六日、假期前每位加$30。加埋海鮮、醬油、服務費，人均差唔多500蚊有多，但好處係無限時，而食物都幾有水準，我地四個都覺得值回票價。

101手工涮涮鍋

地址： 銅鑼灣登龍街1-29號金朝陽中心2期29樓全層

檢視較大的地圖

Follow us:

Instagram: http://bit.ly/2g3ZtuS

Facebook: http://bit.ly/2gu1fIG

Blog: http://bit.ly/ywycarol

Contact us: mrmrsfoodhk@gmail.com