【2017台中打卡點】沙鹿區一日遊 - 沙鹿夢想街、好好聚落(彩色貨櫃)、美仁里彩繪村(復古、地道彩繪)－再窮都要去旅行！

近呢幾年旅遊嘅模式有點啲改變左，就以我自己為例，以往總係訂完機票酒店後，要到書局買本旅遊書，出發前刨定文，做定功課，睇下食乜，去邊啲景點。

而家反而傾向於搵啲所謂「打卡點」，呢啲點通常當地人亦會去，簡單上上facebook、ig等已經可以搵到，而通常旅遊書未必有詳細介紹。等如人地黎香港旅遊，都唔再局限於山頂同主題公園。

我地今次台中遊有點可惜，未有安排到好似清境啊、日月潭呢啲大自然景色，主要花時間去一啲網美點影下相，其中沙鹿區可以花上大半日時間。

建議行程：高美濕地、沙鹿夢想街、好好聚落、美仁里彩繪村

沙鹿夢想街

夢想街位於靜宜大學附近，我地喺科博館站坐公車，去到靜宜大學站約45分鐘，由於公車上落車嘟嘟悠悠卡，首10公里係免費的，是次車費只需NT9

早上11點左右去到，估唔到平日早上都有比我想像中多人，哈哈。同埋感覺上唔淨止遊客，都有唔少係本地人，亦見到學生哥影畢業相。

夢想街其實就係一條街，以「夢想」、「堅持」、「態度」作為概念，主要係利用店鋪閘門嘅塗鴉、彩繪，以及一啲空間裝置作為照片背景，花45分鐘至1小時可以簡單影完。

而家仍未有很多商店、食店進駐，當日只見到豆花店、甲子園居酒屋同一間小食店營業，如果日後有多啲食店，一定更熱鬧。

呢度實際環境冇照片上睇起黎咁靚，咁精緻但如果鐘意影相、打卡裝逼還可以，加上沙鹿區仲有幾個景點，可以安排作個一日遊。但如果為行街、食野就唔太適合。

街口嘅「夢想」二字，除左拍照外，有否都令你想起什麼呢

小時候夢想好大好大，要做乜乜師、乜乜專業人士，而家嘅夢想好細好細，每日過得開心便好

愛心鞦韆

天空籃球場

彩虹巴士

地板至牆身彩繪

天使、蝴蝶翅膀彩繪，令我諗起韓國嘅壁畫村。

其他彩繪 (還有氣球那個幾靚的，只可惜有我嘜頭就唔放上來了，大家大可到IG睇睇，有好多照片可以參考的)

打卡位例如「籃球」，約莫11點半鐘已經有條小人龍，可以到IG參考下別人嘅照片，影相要快，因為面前會有排隊影相嘅人，很多眼睛望住你啊

甲子園居酒屋

夢想街內食店：

貨櫃咖啡屋：Dream St. Coffee、日式居酒屋：甲子園居酒屋、豆花店：小巷子豆花、飛鏢酒吧：Final&21、便當店：FUN飯

沙鹿夢想街

地址：台中市沙鹿區晉文路3巷

園區開放時間：9am - 7pm

粉專：https://www.facebook.com/dreamstreetshalu/

檢視較大的地圖

好好聚落文創園區

第二日到沙鹿區幾個點影相，包括係夢想街、好好聚落，順道影埋美仁里彩繪。有部分人會加插高美濕地嘅行程，只係我地仲要留番啲時間番市區食，就冇去到喇。

離開沙鹿夢想街，挑戰一下腳骨力，步行到好好聚落，邊行邊影下相，時間過去不知不覺。行左30分鐘左右，依著地圖標示，去到永福巷一直搵唔到路。

後來有駕車嘅當地人本想問我地路，原來佢帶幾個新加坡朋友到好好聚落，得知大家係同一目的地後，佢好熱情邀請我地上車，仲要約實我地可以一齊離開，送我地出番去美仁里。

呢兩程順風車係旅途上嘅小確幸，相信人生冇幾多次，所以心裡面係很感激至少喺香港係「不可能任務」，既冇人會車你，亦都冇人會俾人車。

沙鹿區呢邊唔多遊人會到，而且園區位置唔算太方便，有點難搵，之所以興起，全靠當地網美捐窿捐罅搵出黎，形成所謂一大堆網美景點。

好好聚落文創園區主要以彩色貨櫃屋嘅裝置藝術打造成，之前有好瓦小館喺旁邊可以用餐，以用餐費抵入場券，但因為經營問題喺11月暫時歇業，於是好好聚落直接轉換為收取入場費，就可以入去影相。

門票：NT50/位，如果要暫時離開園區，職員會喺手臂蓋印仔，即日內可以再入場。(所以記得保存收據)

入場費都好抵玩，雖然網上見到有啲文章建議逗留時間係45分鐘，不過我地喺人流唔多嘅情況下都影左超過1個半小時，哈哈，我地影左一堆照片。

彩色貨櫃屋

彩色椅子

文青字句

為左方便遊人影相，大部分位置都設有小腳架，方便冇自備腳架嘅朋友都一樣可以輕鬆自拍不求人而腳架係流動嘅，方便調較位置，一般手機同細部嘅DC仔都放得入，非常貼心。(大機當然不行)

鐘意影相、鐘意fancy野、鐘意貨櫃屋嘅朋友可以一遊；但如果唔鐘意影相，只會覺得好無聊，只係一堆粉嫩粉嫩嘅貨櫃，自己考慮清楚。

後記：揸車黎好好聚落會比較方便，然後我地真係好感恩遇上咁好心嘅當地人送我地順風車，佢地人真好，仲約實我地可以一齊離開，送我地出番去沙鹿車站。

亦提議我地可以去埋美仁里彩繪村影下相。途中我地都有聊到相互嘅行程，又睇左佢地去高美濕地嘅照片，氣氛歡愉，唔止當地人熱情好心，其實連同車嘅新加玻旅客都一樣好nice

好好聚落文創園區

地址：台中市沙鹿區鎮南路永福巷7號

開放時間：10AM - 5PM (週二公休)

檢視較大的地圖

美仁里彩繪村

有好多朋友黎到沙鹿區，都會順道「探訪」美仁里彩繪村，呢度嘅彩繪同其他地方唔同，走復古、懷舊、地道風情，好寫實嘅一類，水果店、旗袍店、茶室、公共電話、郵筒等描繪50年前嘅台灣景色。位於沙鹿光位於光綜合醫院對面，目前共有5幅彩繪牆，地方唔大，大約20分鐘行得哂。除左喺度影下相，都可以從中睇到台灣以往嘅景象。