再窮都要去旅行！

逢甲夜市

前往日期：2017/12/19

其實酒店附近都有個一中夜市，不過位置唔係太大，食物唔係十分之對胃口；台中呢邊最多人提、話必定要去嘅相信就係逢甲夜市喇，咁黎到台灣冇理由唔行夜市，於是Day3我地安排去逢甲，諗住掃街仔

由於上午食嘅以甜點輕食為主，實際落肚嘅正餐唔多，想試下喺夜市食飽飽。我地六點鐘黎到，平日都幾多人，不過前後左右都係廣東話，遊客佔大部分

其實事前都有上網搵過啲懶人包、必食推介，有記下來，不過喺夜市人多車多，好難跟到足，所以都係求其見到咩啱食就試下。見人排乜，又排埋一份啦，所以某啲店人龍係特別長

起司章魚燒 (原味美奶滋) NT100

近路口位一檔有幾個人排隊，可以望到製作過程，同日本嘅章魚燒唔同，店員將原粒細細隻章魚，放入蛋漿，唔會封口做成波型，成形係半粒。

口味可以自選，本來想揀海鹽蔥味，但哥仔話賣哂，咁我地喺海鹽基礎底下，叫佢加左啲蛋黃醬。即時製作，等左超過15分鐘

只有6粒，其實係半粒，份量唔多，雖然sell原粒八爪魚，但都係好細隻嘅啫。奶漿中加入芝士，外層都幾香脆，章魚燒比想像中唔熱，原粒入口都係暖暖地。

味道都唔差，好有芝士味，不過有點貴

自問都算係台灣腸控，黎到台灣諗住大量吸入，但台灣腸是咪out左(?)喺一中同逢甲都搵唔到台腸(嗚)，係好簡單咁烤嗰種台灣腸。

見呢間原本賣大腸包小腸嘅官芝霖，都有人介紹過嘅，因為太想食腸，即管問下可否齋要腸兒，店員話可以。

台灣腸 NT25

腸兒較瘦身，都算烤得幾脆，可惜本身腸兒嘅肥膏較多，口感較腍。但由於我地太想食腸，頂住檔都可以。

烤香腸 NT40

行行下又見到烤香腸，呢檔賣香腸波，NT8粒，最少要買5粒。 

香腸唔會太肥太瘦，肉汁必出黎，又唔會好油膩。雖然貴啲，但好食過頭先嘅平價腸。

行黎行去都唔覺冇啲咩啱食，都揀唔啱，可能太多人，冇乜心機。又行番去入口，章魚燒對面有間炭烤胡椒餅，介紹就話係咩澳門米芝蓮乜乜，見到店員即時包胡椒餅，對餡、皮都好認真，粒粒都秤重。

反正冇咩啱食就試下，點知一等就等到花兒都謝了，排第三都等左30分鐘。胡椒餅即時用炭爐烤，等候時間長，每轉出貨唔多，愈排愈多人，條隊足足廿幾人

炭烤胡椒餅 NT40/個；NT150/4個

即時炭烤完，熱辣辣，可能我地影相一輪，入口又冇想像中咁熱。餅皮唔算好厚，帶少少炭香，而且有芝麻，外皮酥脆，味道都可以

肉餡份量不少，有點肉汁，頭幾口唔算好大陣胡椒味，食到尾尾會較突出。但要等咁耐太誇張，好食都變成一般。

醬烤牛肋條 (椒鹽) NT150/兩份

喺台灣見過唔少骰子牛，上年旅遊時幫襯過一次，但燒到好濃，份量又隨心今到見到牛肋條，問清楚店員，一份NT100，兩份就NT150，一份講到明係原條

計番都係40蚊，唔錯啊，幾抵食睇住店員由全生烤到熟，大約十分鐘，共有燒汁、海鹽、辣粉、椒鹽等口味。

牛肋條表面烤到微脆，牛肉食落好腍，又有牛味、肉汁，用生洋蔥墊底，所以底下嘅牛肉又會沾上點生洋蔥嘅味，辣辣地，幾過癮，推

烤魷魚 NT150/隻

牛肋條哥哥旁邊見到呢檔烤魷魚，原隻大大隻，又試下，魷魚醃過，以烤爐烤成，等左十分鐘。

魷魚軟熟，又有嚼勁，抵食過章魚燒啦，我地要左少少辣，醬汁唔會好鹹，幾鮮。 

網上爬過文，逢甲夜市必食嘅，我地都冇食到(笑)。逢甲面積都幾大，除左小食，仲有唔少餐廳，都算係台中必到之地

逢甲夜市

地址：台中市西屯區文華路

檢視較大的地圖