再窮都要去旅行！

兩草

用餐日期：2018/12/16

前段時間經常被位於大坑嘅兩草洗版，收藏已久，早大半個月前，某日晚上要喺灣仔睇演唱會，流連港島，唔想食到太豐富，飯氣攻心，造就機會光顧。

小店較鄰近天后，我地由銅鑼灣行過去變相有點遠，門面綠色，好顯眼易找。見過舊評論話要背貼背坐，可能我每次都等到人地過氣先到訪啦，當晚客人唔多，未覺逼狹。

餐牌選擇唔多，貴精不貴多，兩款飯、肉骨茶、數款小食，價錢親民貼地，呼應店名兩草，廿蚊起有交易嘅意思，睇番只有小食係兩草野，梗係啦，唔洗搵食咩。

一人點左一客飯，外加咖央多士。埋單100蚊唔洗，夠食唔會爆肚嗰種。好多人會試肉骨茶，我本身唔係特別喜好，就無謂試喇。餐點即點即製，約十分鐘上枱

香煎脆邊蛋肉餅飯 $30

滑蛋叉燒飯 $30

新鮮豬肉餅煎香，冚上燶邊太陽蛋，淋上豉油、加蔥，賣相靚仔，見相都認得係出自兩草。飯量唔多略濕，一般飯碗大啲咁。

肉餅入口鬆軟，輕輕煎脆，肥瘦適中。太陽蛋名符其實燶邊，蛋黃流心，即製食物好少過唔到我關

叉燒切條，當然冇成塊食咁爽，配埋啱啱熟嘅炒蛋，中規中矩。

斑蘭咖央西多士 $20

多士一片開二，薄片香脆度高，自製咖央醬適量，冇甜膩感，味道同以前親朋戚友帶手信番黎嘅椰子糖一樣。

食材簡單，屋企都煎得到嘅肉餅、蛋，唔係複雜野，勝在價錢唔貴。快食又唔洗太飽黎講都可以，味道家常，諗得到嘅味道，唔好講驚喜。

兩草

地址：銅鑼灣銅鑼灣道126號

Follow us:

Instagram: http://bit.ly/2g3ZtuS

Facebook: http://bit.ly/2gu1fIG

Blog: http://bit.ly/ywycarol

Contact us: mrmrsfoodhk@gmail.com