再窮都要去旅行！

榮華冰室

用餐日期：2017/02/05

懷舊呢個兩個字近年愈黎愈值錢，有唔少餐廳都以呢兩個字為題，喺裝潢、菜式花唔少心思，令食客感受嗰種懷舊氣息，但比起有故事嘅老冰室硬係爭少少野。

講到「真懷舊」都唔少得榮華冰室，佢未必係人生必食嘅餐廳，卻係歷史嘅見證，買少見少。

有唔少城市人都會襯假期鑽窿鑽罅尋找美食，唔怕遠嘅可以一試呢間經營幾十年嘅老冰室。

由油塘出發，可以喺藍田鐵路站，坐小巴23C前往，幾分鐘就到茶果嶺村，會見到有個小公園設施，直行轉右便是。

選擇步行亦可，經麗港城，沿茶果嶺道進入村內，大概15-20分鐘。

個人而言，對懷舊味興趣唔係特別大，平時亦都唔會故意去搵呢類冰室光顧，因為我由細到大都住喺村屋，屋企嘅陳設基本上同懷舊冰室無異。

我地都係咁啱去到油塘，先順道過黎食個下午茶，落車後都搵左一陣，特別多謝有街坊見我地唔係村內人，加上一副疑惑，主動問係咪要去榮華，再指出方向，足見冰室名氣。

由於係週日，客人不少，相信有部分都係專程過黎，都舉住相機影過不停。

由門外鐵閘、天花吊扇、木椅木凳、褪色海報、手寫白板餐牌，或許對老一輩而言，滿滿回憶。

見我拎起手機影相，老闆娘都問我係咪好有特色，我笑笑回應佢，我都係某村村民，不過唔係茶果嶺村啫，哈哈。

五香肉丁麵 $16

榮華冰室一律採用出前一丁麵，無需額外加錢，淨係呢樣野已經絕哂種啦！

肉丁都係用靚野，仲要料多，成碗麵咁靚仔，我仲有咩要求？

魚片餐肉麵 $16

魚片、餐肉輕輕煎過，香口啲但唔會燶，冇鍋撈，一樣係丁麵，結合價錢，又係無得輸

雞翼尖 $13

作為雞翼尖控，見到雞翼尖係必點的。

雞翼尖用鹵水燜煮，好腍身，入味，入口離骨。唔係味精，仲食到姜蓉味，好突出！

呢個似阿媽煮嘅餸，十三蚊，一碟唔夠喉，要encore。

西多士 14

眼見每枱都會點，住家做法，冇花巧可言，西多唔會太厚身，已經切開成九宮格，方便即食，加上牛油、煉奶，即叫即做。

香口，唔膩，又唔會太甜，好抵食

凍奶茶 $11

凍檸檬茶 $11

比較普通，茶味單一，偏淡，可能因為小本經營，唔會用上好幾種茶葉去混合做茶胆，凍檸茶比奶茶好喝，檸檬份量足夠，令我不期然諗起平時啲茶記少得可憐、揸乾水嘅檸檬片…

另外留意到佢地嘅冰全部自製，唔係乾冰，一般茶室真係啋你都有味。

龍門居掃街系列

屯門友想掃街我都只係諗起龍門居，上週六冇乜野做，就過左去掃街當晚餐~

泰式串燒（腸仔兩串($6)、墨魚丸($10)、牛肉($11)、豬頸肉($13)）

我地買左幾串啫！因為加左泰式醬，番到屋企都未至於冇哂味道！

秘製蒜香雞翼尖($18)

蒜香唔夠啦，我最近辣上腦，所以要外加少少辣粉，我覺得呢款好食過喺另一檔買嘅鐵板雞翼尖~

店名：齊齊串泰式小食

牛柳粒 $30 (大)

香港食呢種牛柳粒好搵笨，尤其是工展會美食節嗰啲，同一價錢呢度食到嘅份量多十倍…

不過始終唔係即食，點都會影響味道，牛柳粒部分會冇咁腍身，不過蒜味依然好重，好食！

店名： 蒜爆王

勁辣魚蛋 

魚蛋係實的的嗰種，並冇勁辣，滿足唔到魚蛋控。

店名：健記美食

鐵板雞翼尖 $22

我同一日內已經食第三份雞翼尖，瘋狂程度好難形容…

鐵板雞翼尖其實都炒得好入味，不過我拎到番屋企都凍凍地，所以雞翼尖有少少難離骨。

店名：味緣

芝士磨菇手抓餅 $24

同一日內嘅第二份手抓餅，明顯呢份好食過悅湖嗰間好多！

手抓餅煎得香脆，冇油膩感，磨菇份量多，芝士係一整塊，我下次會即場食，肯定仲正~

\

水蜜桃綠茶 $12

幫襯埋佢杯飲品，不過好難飲…既冇水蜜桃味，又冇綠茶味，類似飲緊甜冰水…

店名：5℃手抓餅專門店

芋圓一號 $25 (紅豆沙，小丸子、珍珠)

台灣嘅芋圓唔知點解近排hit起來，呢間都唔錯，食完咁多重口味野 都要買定糖水潤一潤。

紅豆沙唔會太甜，份量好多芋圓、小丸子都煙韌整體好食！

尤其有啲小丸子，好似許留山嗰種，真係可以好難食。

店名： 摩登士丹里

唔止講過一次，其實掃街分分鐘貴過食正餐！不過就係咁衰，抽起條筋就想食下垃圾食物…埋單連埋的士兩舊幾，食得好滿足！