再窮都要去旅行！

霸嗎拉麵

用餐日期：2017/01/02

上次去登龍街見到霸嗎拉麵都想食，但等位嘅人唔少所以放棄，假日日上三竿 去到尖沙咀分店，都三點鐘，客人雖多，但店內位置頗多，所以唔洗等就直入。

睇過好多文案都有提過，霸嗎拉麵黎自廣島，最有名就係豚骨湯底、厚切叉燒~ 今日一試，都頗為滿意。

呢度拉麵款式唔多 主要集中分豚骨湯、雞白湯、辛辣味，但出奇地拉麵外嘅選擇挺多，居然有石鍋飯…餃子、炸雞、啤酒、日本飲品、甜品都有供應~

同大部分拉麵店一樣 麵質、湯底油度可以自由選擇。

炙燒豚肉味玉拉麵 $88

中間少少一點豆瓣醬，即時諗起一蘭。

豚骨湯底夠濃，有豬骨味，唔會太油；麵質滑身，選適中剛好，掛湯能力中上！

辛辣炙燒豚肉味玉拉麵 $93 (中辛、少油)

至於我一樣係例牌揀辛辣味，湯底濃厚，但個人認為唔夠辣，如果再食可能要點大辣~仲有一點，唔係好喜歡呢款麵聞起來有好重麻油味！

係食過最重麻油味嘅辛辣拉麵，感覺有啲奇怪 (矇住眼會以為面前有碗出前一丁麻油麵) 如果你鐘意麻油麵，相信會喜歡。

炙燒豚肉厚身，超大塊，而且香口！唔係紙皮叉燒，肥瘦適中，咬下有滿足感。

溏心蛋原隻上，起初擔心會失望…點知一咬開有驚喜！蛋黃湧出黎，流心效果出色，如果追加都係10蚊，抵俾~

雖然價位中上，但整體滿意，對得住價錢，質素屬中上水平，可以回頭~

霸嗎拉麵

地址：尖沙咀金巴利道26號地舖

Follow us:

Instagram: http://bit.ly/2g3ZtuS

Facebook: http://bit.ly/2gu1fIG

Blog: http://bit.ly/ywycarol

Contact us: mrmrsfoodhk@gmail.com

漢發麵家

用餐日期：2016/11/26

出發去韓國前，打算去鴨寮街買電話卡，男朋友乘機提出要去食佢至愛膶牛麵。

我大鄉里第一次黎，週日都等左一陣先有位。雖然座無虛席，不過翻桌夠快。
另外我覺得環境比我想像中企理、空間感足，雖然搭枱係基本，都唔會覺得又逼又狹。

而且店員全部都好有禮，老闆老闆娘都係落手落腳做的。

所以有時唔係話出左名就有資格有道理態度差嘅，至少呢次我對漢發印象好好。

豬膶炒牛麵  $39

男朋友認為好食過維記~豬膶保持到滑身，同一時間又係好爽口，唔韌，仲成塊餐肉咁厚！冇腥臭味再加上香濃薑汁味~識食仲一定要加兩蚊要炒牛，牛肉更香口~

法蘭西多士 $32

貴就貴左少少，但真係好食！現場製作，需時等候。落單時可以選擇要煉奶定糖漿~蛋漿充足，加上一大片牛油，表面炸得好鬆軟！

比起瑞記嘅西多爭好遠~呢份好食得多！（價錢不過差$10，抵俾）

油菜$18

油菜純滿足我地無飯夫婦少食菜嘅慾望，普通菜一碟，冇特別。

凍檸茶$16

凍奶茶$16

凍檸茶凍奶茶，茶味足，而且夠大杯！

出左名嘅食店都維持到食物質素同服務，長期咁好生意有原因。另外豬扒、鳳爪都值得一試~