茶私蜜

用餐日期：2017/07/06

喺深圳海岸城附近接連有幾個商場，包括保利文化廣場、OKmall，主要以食店為主，而且種類多元化。

茶私蜜係一間新開張嘅甜品店，店內一幅花牆非常吸睛，十分適合影相據說老闆娘曾經喺海外留學，難怪小店驟眼睇亦唔似國內食肆。

未知是否因為定價相對附近食店高，暫時人流唔多，但以其裝潢氛圍，要成為打卡熱點都唔難。

如果從深圳灣口岸出發，可以坐M299號巴士到海岸城站，其他口岸可選搭地鐵，於后海站E出口較近。

本來今次一日遊並冇安排到訪此甜品店，但剛巧走到門口，見到小店咁有少女味嘅裝潢，相信好多女士都不能抗拒，加上勢似要落大雨，我地順便歇一歇避避雨。

餐廳空間其實唔大，就十多個位置，但因為剛開業，客人不多，影相一流。裝潢簡單，帶英式甜品店風格，門口位置一幅小花牆，不落俗套，正是吸引我入黎嘅原因。

花牆、吊燈、布椅、雲石枱面，假花裝飾、加上四圍嘅佈置，完全為相機食先而生。

餐廳主要供應甜品，以蛋糕類為主，例如抹茶凍蛋糕卷、檸檬撻、玫瑰鮮花戚風、芒果抹茶慕絲等，定價 RMB¥28-36。

飲品方面有紅茶、烏龍茶、綠茶，可選杯裝或壺裝，亦有數款梳打、水果茶飲品，定價  RMB¥28-52，價格都唔平，難怪客人不多，我都係純粹被環境吸引入黎。

但碰巧有試業優惠，打個八折，個人認為行到攰入黎坐下影下相食件cake都還可以

店內設有餅房，客人可以直接望到入面，乾淨衛生。

玫瑰香草紅茶   RMB¥52

小店所用嘅餐具好雅緻，基本上全套連貫。店員推薦佢地嘅玫瑰茶，用嘅係自家茶包，玫瑰味道唔會太假，以紅茶味更濃烈，中規中矩。

桃子伯爵慕絲  RMB¥28

店家強調甜品來源於法國MOF大師原配方重組改造而成，不過國內嘅野，信則是，不信則不是，我就冇去深究。

甜品賣相唔錯，層次感豐富，有忌廉、慕絲、蛋糕。粉色部分都係慕絲，質地較濕軟，我都係影左張相就開吃，以免蛋糕塌落黎。

慕絲質地比較粗糙，奶油忌廉夠滑，桃子味道較突出，伯爵茶味無影無蹤，可惜同大部分國內甜品一樣，整體偏甜，普普通通

茶私蜜嘅環境以國內食店黎計，我地會俾十分，甜品方面我地只係試左一件，普普通通，未見驚喜。

但如果黎到海岸城附近，姊妹們想食個tea、影下相，都係個唔錯嘅地方。

茶私蜜

地址： 后海文心六路A2-19 (韓客菜對面)

Follow us:

Instagram: http://bit.ly/2g3ZtuS

Facebook: http://bit.ly/2gu1fIG

Blog: http://bit.ly/ywycarol

Contact us: mrmrsfoodhk@gmail.com

全壘打

用餐日期：2017/07/06

近深圳灣口岸嘅南山區發展成熟，單單係海岸城都已經大到行都行唔哂，除左有Line Cafe，周邊連接幾個商埸，有戲院、唱K，輕鬆消磨一日。

當中以食肆為主，有小店，有連鎖食店，消費彈性大十幾蚊食碗地道粉麵又得，幾百蚊食西餐、日本菜亦得，豐儉由人。

由深圳灣口岸過關，非常方便，坐M299號巴士可以直達海岸城站或坐地鐵到后海站也可。不過國內地方大，唔同商圈都有類似規模，加上地鐵線非常方便，日後有機會再繼續發掘。

喺保利文化廣埸有條食街，一條巷全部小店，有泰菜、印度菜、川菜等，其中全壘打係一間日式灼飯店，名字跟棒球有關，壽司會做成波形，都係呢度嘅招牌菜。

全壘打初期開業人氣十足，聽聞經常大排長龍，都屬於網紅店。而家熱潮稍退，但因為鋪面唔大，不足二十個位，平日過左午飯時間，人流會較少。

店內裝潢簡單，以國內食店而言，乾淨企理。至於所謂嘅棒球為主題，只係見到寥寥可數嘅棒球喺椅背後及作為吊飾。

入座後店員好快就送上熱茶，所用係玫瑰茶，收取茶位費RMB¥3/位。

餐牌選擇唔算好多，主要供應蓋飯、灼飯、炙燒波波壽司、手卷、卷物、沙律等，定價唔算好貴。

蓋飯所指為魚生飯，可以自選食材，刺身約二十款由RMB¥9- ¥59不等，例如三文魚刺身RMB¥18/2片、甜蝦RMB¥29/8隻，其實同香港嘅平價刺身飯差唔多價錢。

不過喺國內好流行團購，小店都有參與供應優惠，如果啱食不妨買團購券，價錢會平啲。但我地唔打食好多款，所以只係單點。

鴨胸沙律  RMB¥22

沙律菜新鮮，混有麻醬，鴨胸共五小片，食落唔鞋唔老，略嫌少鹹。

卧虎藏龍蓋飯  配熟蛋、原味芝士汁RMB¥69

灼飯相信係小店招牌，配料有生有熟，例如三文魚、海膽等刺身飯、雞扒、鴨胸蓋飯。

但做法係先點款式，選擇所需醬汁，最後由店員即場以火槍炙燒，喺香港就真係冇食過呢種飯…

我地揀嘅係【卧虎藏龍蓋飯】，配料有三文魚、八爪魚、金槍魚、帆立貝、熟蝦、蟹柳，雞蛋可選溫泉蛋或熟蛋，我地選擇後者。

醬汁方面，共有六款，分別有綠茶芝士汁、原味芝士汁、黑椒汁、榴槤芝士汁、照燒汁、明太子醬，部分頗為特別，但我就唔係太敢嘗試。

當然啦，並唔係每款灼飯都適合配個別醬汁，所以店家喺餐牌都有列明。

原味芝士汁份量頗多，店員熟手完成炙燒過程，老實講，灼飯嘅賣相認真一般，配料一律埋喺醬汁之下，幸好味道都可以。

用火槍燒過嘅芝士味道都幾香，標示用上意大利芝士、淡奶油製成，質地較稀身，唔會有拉絲效果，所以獨自食一份都唔會太膩。

配料由於燒過，加上大量芝士，基本上已經失去各自本身嘅鮮味，其實就同平時食火炙壽司飯一樣，質素中規中矩。

豪華升級版波波壽司拼盤 RMB¥69/9球

呢份就係我地喺網上睇到圖片後，決定要黎小店一試嘅菜式，當然啦實物係預料之內冇圖片咁靚。其實味道真係冇乜特別，純造型取勝。

單點壽司都係波波型，不過我地想試到唔同款式，只好點個拼盤。壽司飯已預先混入蟹籽，不過份量唔多，無助口感。

一共九球，有三文魚、鰻魚、蟹籽魚籽、北寄貝、牛油果等，同灼飯做法一樣，波波壽司面頭平均唧上芝士，店員會即場炙燒，淨係呢個過程都幾夠創意。

基本上刺身太薄身，炙燒過後冇甚麼鮮味可言，壽司做成一口份量，女士輕鬆食，不知不覺食左九件。

雖然餐廳嘅食物無驚無喜，不過不失，但相信大家都唔反對，相機食先係一流，貪得意嘅朋友可以一試。

其實店面唔大，但店員頗多，招呼都做得好足，加上冇收取服務費，依然係一次愉快嘅用餐體驗。

 全壘打

地址：海岸城文心五路保利文化廣場2層

Follow us:

Instagram: http://bit.ly/2g3ZtuS

Facebook: http://bit.ly/2gu1fIG

Blog: http://bit.ly/ywycarol

Contact us: mrmrsfoodhk@gmail.com

Line Friends Cafe & Store

用餐日期：2017/05/30

各位熊大嘅粉絲相信都知道，除左韓國、日本有Line Friends Cafe & Store之外，其實近近地深圳海岸城都已經有分店。

5月尾有幾日連續假期，因為想去呢間Line Cafe一段時間，所以紅日當日我地就北上食野、揼骨。

自問唔係熊大粉絲，但呢間Line Cafe都幾值得去呢，女孩子鐘意影下相、打卡，都應該會鐘意。

如果係粉絲，就更加唔洗講啦，起碼唔洗搭飛機去韓國，而且呢間仲要係正貨 (笑)

我地喺深圳灣口岸過關，然後坐M299號巴士喺海岸城站落車，相當方便。

但如果你喺其他口岸出發，可以選搭地鐵，1號線喺車公廟站轉乘11號線喺后海站D1出口，距離不遠。

Line Cafe都幾大，場內場外都有好多Line擺設，好多影相位，就算唔食野，都可以入內影相或者購物

我地影影下食埋野我地都玩左兩個鐘。

（店內影相嘅位置，特別係門口位嘅熊大妹妹，並冇特別安排店員管理，所以都會少少混亂情況，當然裡面有唔少小朋友，禮讓有時就不太管用。）

一場黎到，我地都食埋野先離開。

餐牌選擇都算多，價格比平時大陸食野點都高少少，始終係主題餐廳。但比起香港嘅主題餐廳，其實已經唔算特別貴，而且味道比想像中好

本來以為只有輕食、甜品，但原來都有供應沙律、熱狗 (RMB¥30) 、披薩 (RMB¥55)、意粉、飯、小食等，當黎食正餐都冇問題。

餐廳採用自助形式，客人喺收銀處點單，牌子振動後自行取餐，自行搵位。

不過並唔係個個入黎都會食野，加上位置不少，其實都唔需要特別等候或者排隊

海鮮蕃茄意麵  RMB¥58

意粉份量唔算多，一人剛好，裡面有兩隻蝦、青口，配上半塊印有熊大臉嘅麵包。

意粉掛滿醬汁，較為粗身，煮得略腍，蕃茄醬味道香濃，唔會太酸，蝦、青口不過不失啦，食落唔臭唔霉。麵包烘過，唔係平日食嘅多士，偏硬身，咬落「確確聲」。

喺大陸黎講，可能平時食個意粉就二三十蚊港幣啦，雖然呢份double price，但味道合格有餘

甜品方面有馬卡龍、杯子蛋糕、奶凍、瑞士卷、麻糬、布丁、朱古力棒、雪糕、布朗尼等，定價相對輕食高，不過甜品靚啲吸睛啲嘛。

一律供應3款造型，分別係熊大、莎莉、兔兔，韓國基本上都係呢啲款式，如果約多幾個朋友黎，可以試多幾款呢！

布丁奶凍 RMB¥48

揀左兔兔造型，代表草莓口味。奶凍都幾大件，而且真係幾可愛嘅，少女上身。

底層係蛋糕，濕濕笠笠，中間係草莓醬夾心，味道唔明顯，酸酸甜甜。

奶凍較挺身，有別於平時香港嘅布丁/奶凍，有慕絲口感，食完會有飽滯感。好好食就真係稱唔上，但唔係伏。

喺布丁、酸奶杯、雪糕當中我都係揀左雪糕，哈哈，我對屎造型嘅雪糕冇抵抗力，加上當日天氣頗熱，希望消消暑。

鮮奶冰淇淋 RMB¥23

文案話係來自韓國，真正嘅鮮奶冰淇淋，我揀嘅係熊大杯。

喺韓國食嘅雪糕真係唧成「一督屎」形狀，呢杯實物並冇圖片睇起上黎咁堅挺，但味道好接近。

雪糕溶點非常低，影相要快，食落奶味香濃，質地唔係好滑身嗰種，面頭有一塊小曲奇，整體係幾好食

飲品方面有咖啡、茶、樽裝拿鐵、果汁汽水、冰沙，定價  RMB¥23-38。

另外呢間Line Cafe同時係輕酒吧，客人亦都可以點啤酒，有4款係用不鏽鋼樽裝 (RMB¥48)，貼有Line人物貼紙，個樽可以帶走，幾靚架。

奶蓋伯爵茶  (忘記實際價錢，大約係RMB¥32)

奶蓋滑身，伯爵茶味道突出，個人認為味道不錯。

以主題餐廳而言，食物都合格，相對平時國內消費，呢度頗高，要食飽飽嘅話人均過百，不過作為老左嘅少女，黎到都好開心，不停影相。

對於我地黎講，去深圳灣非常近，車費平過出九龍，消磨下時間，喺香港食一日都差唔多價錢啦。

其他嘅深圳cafe介紹：

【我在38樓看風景】KONG 空    http://bit.ly/2BuQf54

【深圳一日遊】初代抹茶   http://bit.ly/2zMSQtF

【深圳一日遊】Dreamiya  http://bit.ly/2jtKcoT

Line Friends Cafe & Store深圳店
地址：深圳南山區文心五路33號海岸城購物中心二層203-205舖（地鐵1號線車公廟站下車，轉乘11號線，后海站D1出口）

Follow us:

Instagram: http://bit.ly/2g3ZtuS

Facebook: http://bit.ly/2gu1fIG

Blog: http://bit.ly/ywycarol

Contact us: mrmrsfoodhk@gmail.com

喜茶 HEYTEA

用餐日期：2017/05/30

一場北上，都要試埋網紅喜茶。去完Line Cafe，海岸城附近已經有喜茶分店，好方便。

下晝時間店面人頭湧湧，都係排隊買飛 / 等飲品嘅人…

排到去門口，有十幾人，好在我都算係隊頭（聽過最初要等幾粒鐘，又話有市有炒價）笑…

店面闊落，提供座位，裝潢清新，冇大陸味。店員手腳速度都算快，分工合作，見呢個形勢，我都等得放心啲

根據店內告示，喜茶係原皇茶改名， 因為皇茶太多山寨，佢地被逼放棄原名，真假我就唔知喇…

供應茗茶、混合茶，可配芝士 / 低脂，另有純茶、奶茶、水果茶、拿鐵、咖啡等，定價 RMB¥16-28。

最終等左10分鐘落單，再等10零分鐘就到手，唔算好耐。

芝士桂花烏龍混合茶  RMB¥20

杯蓋做成開合式，方便飲用，打開杯蓋已經好香芝士味，奶蓋佔1/3，口感綿密濃郁，但唔鹹，聽講係冇用奶蓋粉末做出，用嘅係新鮮芝士

飲到中間，鼻哥聞到芝士香，但飲落口係茶味，層次豐富

桂花味清香，茶就唔太濃，稍為被桂花蓋過。

 

超級水果四季春 RMB¥25

水果茶有7款， 驟眼睇名稱同溪羽之茶相似 (笑)

鐘意食生果 (係食) 先好點呢杯， 附上一枝叉仔可以食水果，裡面有百香果、西瓜、橙等， 全部冇打碎，切片沖茶 。

果茶味道以百香果最突出 ，飲落酸酸甜甜。 水果份量多茶少，好快飲哂… 但我買飲品， 唔係想食生果， 哈

 

至於我只係等左20分鐘，加上係室內，可以接受，再耐啲真係唔踩佢。

只可以講喜茶嘅營銷相當成功呢如果真係口渴，都唔會等咁長時間啦， 海岸城閒閒地有五、六間呢類飲品店。值唔值得等，見仁見智。

（但試多左幾間奶蓋、芝士奶蓋後就會發現喜茶真係比人出色）

其他深圳嘅飲品店介紹：

【深圳一日遊】奈雪の茶 http://bit.ly/2k5ntDO

【深圳一日遊 - 歐包熱】樸悅間 http://bit.ly/2iZDyY2

喜茶嘅其他ins帖文：http://bit.ly/2AaOZpc

---

喜茶 HEYTEA

地址：深圳南區天利名城露天商場2樓 (海岸城gaga鮮語對面)

---

Follow us:

Instagram: http://bit.ly/2g3ZtuS

Facebook: http://bit.ly/2gu1fIG

Blog: http://bit.ly/ywycarol

Contact us: mrmrsfoodhk@gmail.com

鮮芋仙

用餐日期：2017/04/10

上次去珠海玩嘅時候，第一次試到鮮芋仙，真係覺得好好食！所以今次去深圳一日遊，晚飯之後我地都決定要食埋甜品先番香港。

鮮芋仙由兩個來自台中豐原的人開設，主要是出品芋圓、仙草、豆花等甜品，強調不添加防腐劑，新鮮現做。

東門分店位置闊落，位於商場入面，乾淨企理。平日晚上客人唔多，店面頗大，乾淨企理。客人先喺收銀處點單，牌子振動後自己取餐。

甜品選擇豐富，有芋圓、仙草系列、豆花、布丁、冰品、紫米粥等，定價合理。

芋圓4號  RMB¥20（加雪糕RMB¥5）

共有5款，有綠豆/粉粿/紅豆/珍珠/花生/薏仁/地瓜/花豆等，定價全部一樣，甜品一律可以加錢要其他配料。
選的依然係4號（上次喺珠海亦都揀左呢款）

有芋頭、紅豆、珍珠，不過剛好遇上珍珠已經賣哂，所以店員提議我地轉換其他款式配料。

由於佢地嘅芋圓質素不俗，所以我地換成小芋圓，加上天氣熱，再外加一球雪糕。份量好多，以此價錢真係十分抵食！

芋圓雖然味道唔突出，但口感Q彈實在帶韌性，芋頭粉糯，刨冰粗糙，配上甜度適中嘅黑糖漿，消暑一流

仙草4號 RMB¥25

芋圓系列同仙草系列相同號數配料係一樣，只係一個冰底，一個仙草底。因為佢地嘅仙草都係非常出色，所以另一份揀左仙草4號。

所以配料依然係芋頭、紅豆、珍珠，我地就將珍珠換成翡翠粉粿。

仙草味道香濃清幽，完全唔係涼粉嘅死甜，口感超滑溜，可按個人喜好再加入鮮奶油。  份量多，好抵食。

想喺香港搵到啱口味嘅芋圓、仙草唔容易，因為我地比較怕甜膩，芋圓太實唔喜歡，仙草太似涼粉又唔喜歡，係麻煩鬼。

國內食飯有樣好，人家地方大，基本上任得你坐，有幾何遇到催催貢嘅情況，點一份冰歇歇腳非常好。

木屋燒烤

用餐日期：2017/04/10

由於太耐冇北上，都有一段時間冇食過大陸嘅燒烤，以往我地都係去皇崗村嘅街邊檔食，今次決定食番有唔少分店嘅木屋燒烤。

木屋燒烤相對街邊檔定價稍高，當然啦，比起香港唔合理嘅串燒價位，我諗喺呢度食到撐爆肚都唔洗好多錢

而且提供堂食，較乾淨企理，比較有規模，強調「食材好是良心」，生蠔、元貝等唔賣隔夜貨。

呢間分店喺東門，位置闊落，有室內、室外座位。不過大部分國內人都唔係好怕熱（?）可能要食煙，所以佢地好多都坐室外。

我地坐室內，都唔會覺得好嘈雜

餐牌印刷精美，圖文並茂，有前菜、羊肉、雞肉、牛肉、海鮮、烤魚、蔬菜、飯麵等，落單時可向店員提出辣度。基本上要食嘅串燒都有架喇，而且喺大陸食，基本上唔洗睇價錢。

因為點左唔少串燒，並冇每樣都影哂相，就隨便挑幾款簡介。

丹東蜆子王  RMB¥28/12隻

由於比較大粒，就原諒佢貴啲啲，粒粒脹卜卜，冇沙係基本

烤雞脆骨  RMB¥28/10串

部分串燒唔係逐串計錢，例如雞脆骨係一份有10串，怕食唔哂嘅都容許點半份。

烤雞皮串   RMB¥10/5串

呢度嘅烤雞皮就唔夠平時食開嗰檔燒得好食，燒嘅時間唔夠耐，所以食落一般香脆。

QQ翅    RMB¥7/串

雞翼折合折合港幣都成十蚊得兩隻，稍貴。

台灣香腸  RMB¥3/串

要喺大陸食到唔假嘅台灣腸都唔難嘅，一般燒烤店都係用呢款，好食過香港呢。

烤茄子  RMB¥7/隻

講到茄子，我以前唔食，自從食過一次燒烤茄子之後，我就愛上喇，不過呢度蒜蓉唔夠多。

香辣豆皮  RMB¥3.5/串

豆皮又係另一樣本身我唔食嘅，用豆皮包住蒜蓉、蔥等燒，脹卜卜，好好食。

不過呢度嘅豆皮一般唔夠軟熟，豆皮表面烤得較乾，裡面嘅蒜蓉太少，調味可以再重手啲。

烤娃娃菜  RMB¥2/串

通常食燒烤，我地都會點烤豆角、娃娃菜，尤其後者，容易入味，又保持到菜嘅水份，食落唔會乾，但點都係油架喇。

蜜制小饅頭 RMB¥2.5/串

有冇人好鐘意食饅頭？饅頭燒到表面香脆，搽上少量蜜糖，好正

湛江生蠔  RMB¥24/4隻

好多人都唔敢喺大陸食烤生蠔，但又有唔少鐘意喺大陸食烤生蠔。個人就唔抗拒，當然價錢太平都唔敢食…見到店員喺地下洗蠔殼嘅都唔會食…

至於我見唔到嘅事，就唔理嚕

木屋燒烤就強調生蠔唔隔夜，所以10點半後食會有半價。

整體黎講，木屋燒烤環境企理，如果朋友當中有唔鐘意坐街邊食串燒，擔心唔衛生，可以選擇呢間。

至於味道我就覺得唔算太重口味，相對我喺街邊檔食已經淡啲，價錢就真係唔貴，以上埋單 RMB¥147，喺香港唔可能發生。

如果鐘意食燒烤又鐘意坐鋪頭嘅，我覺得金稻園都唔錯，燒得幾好食，價錢差唔多，而且有小菜點。

其他深圳嘅燒烤店介紹：

【深圳一日遊】個斑馬音樂燒烤吧   http://bit.ly/2AgAEWl

木屋燒烤

地址：中興路239號外貿集團大廈1-3樓 (維景酒店附近

Follow us:

Instagram: http://bit.ly/2g3ZtuS

Facebook: http://bit.ly/2gu1fIG

Blog: http://bit.ly/ywycarol

Contact us: mrmrsfoodhk@gmail.com

由於喺華僑城文化園區搵唔到好野食，所以我地盡快去番東門搵食。 

好耐好耐冇黎過，除左跳哂舞嘅新疆串燒不變，都加入左好多新食店，基本上喺度掃街都掃到飽。

可能好多人擔心衛生嘅問題啦…但眼見比早幾年黎都乾淨左好多，個人認為，去得國內食野，擔心黎都多餘，等如早前見有個營養師教人去葵廣掃街掃得健康 計卡路里一樣，多餘。

每次黎第一檔必定係食貴哥鹵肉卷，打個底醫肚先。

貴哥鹵肉卷

以面餅包住不同材料、醬料製成，配料自選，定價RMB¥8-15，例如有鹵肉、雞柳、火腿、雞蛋、牛肉、豬耳等。

記得最初食，佢地嘅餅皮係即時做，今次黎已經係整定哂

培根百頁雞蛋卷 RMB¥13

餅皮唔係新鮮現做，味道點都爭少少，畢竟凍左…不過都保持到煙韌有咬口。

卷嘅味道就視乎選擇嘅食材，再配火腿、青瓜，醬料唔會好重口味，酸酸甜甜。 

雖然冇以前食咁正，但平平地都算係不俗嘅小食

---

Cool8 酷吧

地址：東門町美食街

 

Cool8 酷吧位置頗多， 打哂白燈，睇落算乾淨。

主要供應樽裝漸層飲料，有奶茶、檸茶、多多、果汁、拿鐵等， 冰度、甜度可以自選，  定價 RMB¥15-25。折算其實同香港飲杯野差唔多價錢 

本來店內寫住禁帶外食，咁你唔幫襯， 又阻住人個位齋食，梗係禁啦！

 咁我買左枝飲品， 再買其他野過黎食，食完自己清理好， 係基本。 店員都冇出聲， 淨係趕啲齋坐嘅人。

 

檸檬星空氣泡  RMB¥16

材料簡單到冇朋友，只有檸檬 、梳打、蝶豆花。

佢地嘅樽都幾修長，漸層效果明顯，相機食先， 之後就搖勻飲用。  

蝶豆花本身不帶味道  ，純粹係天然色素，所以呢枝其實就係有氣檸水， 但咁大枝得3片檸檬，其實冇乜味…

---

番到大陸唔食串串香、麻辣燙硬係爭咁啲野，呢間串串香喺地下，旁邊有位，但坐到爆哂，所以我地外賣左去飲品店嗰邊食。

串串香

地址：東門町美食街

串串香 RMB¥10/5串

 

材料黎黎去去嗰幾味，其實全部都係容易入味嘅食物，例如木耳、薯仔、腐皮、青瓜、豆角、娃娃菜等。

食落都幾油淋淋…而見本身味道唔係夠香濃 唔夠辣，味點入呢？

仲要見到樓上10蚊7串…

---

斗腐倌

地址：東門町美食街

同一層仲食左近入口位嗰間酸辣粉但唔係太好食，所以之後我都去另一間再食。

酸辣粉 RMB¥10

話係用左16種佐料做成嘅粉麵，心動價10蚊唔知係咪食得多香港嘅酸辣粉，我覺得呢碗味道一般啫…

薯粉食落太腍身，韌到咬都咬唔開。

點左少辣，夠辣但唔香。花生份量適中，但10蚊雞，就唔會有肉碎喇。

---

我地上左1樓，同地下嘅食店有少少唔同，不過我最印象深刻都係嗰啲炸蝎子、蜈蚣、蜘蛛、蛇…諗得出嘅都有…我覺得好恐怖，急急腳撇！

---

潘達芝士撻

地址：東門町美食街1樓

潘達芝士撻，係國內熊貓披薩嘅兄弟牌，喺微博上聽講好人氣經常見到呢隻熊貓嘅蹤影。

芝士撻一共有5種味道，分別係原味、藍莓、tiramisu、培根芝士、栗仁芝士撻，除左原味RMB¥8，其他一律定價RMB¥12。

原味芝士撻  RMB¥8

芝士撻面用可可粉做出招牌天然呆嘅熊貓臉造型，都幾呃like

撻皮有少少厚，因為唔係剛出爐，食落較腍身，帶曲奇香。芝士味比想像中突出，以國內產品以言，質素已經不俗

芝士流心程度一般，較接近半熟，口感軟綿 但折算後9蚊左右， 算係咁啦

---

重慶八哥酸辣粉

地址：深圳市東門步行街二橫路2-1號

因為喺美食街裡面食到嗰間酸辣粉比較普通，吊住條癮，所以接連食埋呢間八哥。

作為東門名物，人氣不一般，每次黎到都人頭湧湧。店面唔大，而且冇室內位置，只有門外幾張長木櫈，衛生一般啦，對住渠口食野點都唔好受

酸辣粉 RMB¥10

先買飛，再取酸辣粉，呢間明顯比美食街嗰間好食

酸辣粉煙韌得黎唔會腍滋滋，有嚼頭但唔會咬唔斷，肉碎就當然無影無蹤，但花生、榨菜絲以十蚊碗黎講都算大方

食慣香港調整過嘅口味，怕會太辣，所以只係點左少辣，辣度適中，帶麻偏酸，重口味是常識。

---

e-co

地址：東門九龍城廣場一層21號商鋪

 

e-co就喺八哥酸辣粉對面，係地鐵站奶茶旗下嘅新品牌，供應芭菲、雪糕、雞蛋仔、鮮果茶、奶茶、抹茶飲品等，價錢唔貴。

本來以我甜品控性格，係無理由唔試埋雞蛋仔同雪糕，奈何接住仲要食串燒，只好放棄，專心揀飲品。

事後睇番店家文案，形容佢地嘅雞蛋仔引爆朋友圈 (笑)，喺微信、豆瓣都有唔少好評，唔知是咪打手啦。

清新金檸 RMB¥15

鮮果茶有6款，定價 RMB¥15-19，採用新鮮萃取方式製作，都係呢種透明杯白蓋紅色心心嘅包裝，但我都係照用飲管。

而家睇番唔係好明 有橙、火龍果、芒果呢啲，我為何揀個最低成本製作嘅檸檬 (哭)，雖然有幾片檬檬，但飲落青檸味道較突出，唔會太酸 

作為鮮果茶，茶味實在太薄弱…

---

 

 

 

華僑城創意文化園區

四月份係生日月，正日當日選擇北上吃吃喝喝，早前睇過網上有啲文章分享深圳華僑城，所以第一站順便去行下。

以前好少喺深圳灣過關，因為去開嘅骨場、食店都唔喺呢個口岸。

當我落車一刻，深切體會點解國內人咁鐘意去屯門，因為車程廿分鐘內，快過我出九龍，仲要只係十幾蚊。

不過呢個口岸附近冇鐵路站，所以我地要先坐巴士去求其一個鐵路站轉車，都有少少唔方便。

悠耐•茶共有兩層 位置闊落 但冇乜用 因為冷氣不足

極品櫻花烏龍奶蓋茶 RMB¥25

最緊要有霸氣嘅名，影張靚靚地嘅相，咁我就買左了

賣相合格嘅，用上國內好流行嘅呢種杯，免飲管。

味道普普通通，櫻花味薄弱，奶蓋鹹鹹地，都夠滑身。 講奶蓋都係KOI嘅，最好飲

悠耐•茶

地址：華僑城文化創意園南區F1-104

---

最終stay左大概個零鐘，我地就離開左。

---

Follow us:

Instagram:http://http://bit.ly/2g3ZtuS

Facebook: http://bit.ly/2gu1fIG

Blog: http://bit.ly/ywycarol

Contact us: mrmrsfoodhk@gmail.com