再窮都要去旅行！

潤園四季椰子雞

用餐日期：2018/04/09

喺香港主打椰子雞嘅餐廳，只係食過四季文昌，唔算話特別喜好，相對之下，一般火鍋更啱口味。

而幾乎每次番深圳都係食啲重口味，酸辣野為主，今次就試下呢間椰子雞鼻祖、口碑較好嘅連鎖店 - 潤園四季椰子雞。

平日晚上都有唔少人等位，好在位置夠多。除左卓越INTOWN，潤園四季喺歡樂海岸、KKmall、華僑城等都有分店。

餐廳分為兩層，設室內外座位。裝潢偏東南亞風，走園林路線，但燈光偏暗

餐牌選擇唔多，主打椰子雞，連同簡單配料、煲仔飯等，價錢中上，如果好似平時打邊爐咁食法都唔平

另有幾款套餐供應，不過大部分人都係單點一份雞、少量蔬菜、煲仔飯咁就算

醬料/茶位 RMB¥6/位

配備豉油、辣椒、沙姜，唔少得可以更突出湯底鮮味嘅青桔。

竹笙椰子雞鍋 RMB¥149/隻

附上漏斗計時，5-6分鐘食得，湯底以椰汁、椰子肉製成。

原隻文昌雞整齊放於膠盒中，份量很足，配埋竹笙，價錢合理

雖然跟足時間，但雞肉食落真係唔算嫩滑部分位置仲會鞋口，勝在雞有雞味，雞皮爽脆冇油膩感。

湯底有椰子清甜味，加上少少雞嘅油份，確實係精華，點都要飲番幾碗先開波打邊爐，期後湯底一路食都唔會話太鹹

配料方面性價比唔高，主要點蔬菜為主。一來肉類價錢唔平，肥牛定價RMB¥68-88/份；二來可能肉類會影響椰子湯底嘅清甜。

豬肉丸 RMB¥20/半份、墨魚丸 RMB¥20/半份

味道冇乜特別，港式丸類。

油麥菜 RMB¥20/份、凍豆腐 RMB¥20/份

正常火鍋配料質素。

整體黎講，我對椰子雞唔係十分喜好，但偶然一次清淡都唔錯，好難餐餐麻辣鍋嘅。

多人食當然會抵啲，兩個人好難又食雞又食飯，怕肚撐。

潤園四季椰子雞

地址：福華三路與金田路交彙處卓越intown3樓

Follow us:

Instagram: http://bit.ly/2g3ZtuS

Facebook: http://bit.ly/2gu1fIG

Blog: http://bit.ly/ywycarol

Contact us: mrmrsfoodhk@gmail.com

撒椒

用餐日期：2018/05/12

晚餐原本選定左一間主打燉湯嘅餐廳想試，可惜去到先知招牌菜花甲已賣光，失望已回，決定轉場。

番到海岸城決定試下撒椒，撒椒都係一間連鎖餐廳，同屬探魚品牌，被稱為「飲食界嘅林志玲」。

因為走嘅路線針對女性顧客，幾年前曾經搞過撒嬌打折嘅活動，連wifi密碼都要抽水 "linzhiling"

餐廳裝潢幾靚，天花、牆身以花作為主要裝飾，加上燈光效果，營造所謂嘅浪漫氣氛。

晚上10點多前往餐廳，客人唔多，坐得舒適，枱面空間足夠。強調於特定時間內上菜，所以上菜速度都快。

餐牌主打魚，除左酸菜魚，仲有水煮魚、豆花魚，定價RMB¥108-128，可添加配菜。其他菜品選擇都多，以川菜為主，小炒價錢較貴

秋葵配花甲 (原價RMB¥36)

由於當日大眾點評做緊吃貨節優惠，所以成功免費兌換左一份秋葵配花甲。無端端係唔會點呢份涼菜，但免費冇理由唔試下。

花甲幾大隻，乾淨冇沙，加入切片秋葵，連埋芥茉豉油，味道唔錯喎，有興趣我諗用差唔多材料都整到

爽口小青瓜 RMB¥8

同探魚嘅青瓜一樣，唔辣，落重麻油，價錢唔貴。

經典酸菜魚 RMB¥118

高山娃娃菜 RMB¥9

米粉 RMB¥5

同食開嘅太二一樣價錢，但唔係太啱我地口味。配料方面以蔬菜類為主，價錢唔平，定價 RMB¥5-9，我地就加左娃娃菜、米粉。

碗碟都係花形，加有辣椒、芝麻，賣相唔錯。湯底較油，不宜飲用，辣度唔高，酸度不足。

酸菜魚份量偏少，比起上次食祿鼎記更少。呢度並冇列明用乜魚，見過有人話係用鱸魚，亦見過話係龍利魚片，冇去證實。

魚片薄身連皮，冇骨係基本，食落似食打邊爐嘅鯇魚片。質地唔夠滑，肉偏老往好處方面諗，就係幾有魚味

唔建議加配菜，娃娃菜、米線份量小家，得丁屎咁多極唔抵食林志玲食完都要哭哭：那麼一點點，怎麼夠吃飽飽。

圖中已經係我地夾起哂嘅份量，咁樣一殼米線要5蚊，一棵娃娃菜9蚊，真係點碗白飯4蚊好過。

鴛鴦糍粑 RMB¥12

芝麻、糯米混合，軟硬適中，煎到脆脆地，但有點油膩。

其他收費：

餐位費 RMB¥5

王老吉 RMB¥8

總結，人均消費百零蚊，同大部分食酸菜魚嘅餐廳差不多 (因為我冇點貴野)，質素普普，未必會再訪。

撒椒 

地址：深圳文心五路33號海岸城購物中心2層243號鋪

酸菜魚：

【深圳一日遊】姚酸菜魚 http://bit.ly/2F1keGg

【深圳一日遊】太二酸菜魚http://bit.ly/2HcTsvy

【深圳一日遊】老板出差 http://bit.ly/2ruCcsQ

【深圳一日遊】祿鼎記http://bit.ly/2wQRfC7

Follow us:

Instagram: http://bit.ly/2g3ZtuS

Facebook: http://bit.ly/2gu1fIG

Blog: http://bit.ly/ywycarol

Contact us: mrmrsfoodhk@gmail.com

喜茶

用餐日期：2018/06/02

密集地出新品嘅喜茶又黎喇，今次係桃桃變奏版。每到有新品，又吸引一班人打卡集郵，喜茶係有一手嘅

假日番深圳食飯，首先去左中心書城新店，呢個地方冇乜野行，有點文藝氣息，間中有展覽。

喜茶面積同車公廟店差不多，分室內外位置，以湖水綠色作主調，同過往門店一樣，幾有設計感。

假日都唔洗排隊點單，不過出品有少少慢，等幾個號碼都用左十幾分鐘，可能店員較新吧。

桃桃有兩款：芝芝桃桃、桃桃波波茶，前者係舊年已出現過嘅桃桃。

桃桃波波茶 RMB¥23

一球雲呢拿雪糕、桃子沙冰、茶底、黃金波波(珍珠)製成，同上年飲過嘅偏橙黃色嘅桃桃唔同。

新品係粉紅色，據說係加左少量天然紅肉火龍果去調色，更加少女心。

雪糕之前已經喺冰淇淋芒芒出現過，冇乜特別，係便利店都買到嘅八喜出品，同桃味唔係話特別夾。

果肉冇以前嘅桃桃咁多，沙冰底清涼解喝 ，甜度自然適中。聽過有啲人話桃酸，我呢杯冇問題，幾甜添。

珍珠普通，扎實帶淡淡甜味，其他飲品可以RMB¥2添加。

芝芝桃桃 RMB¥28

同桃桃波波茶味道冇乜分別，所以試其中一杯夠哂。面頭一層芝士奶蓋薄身，沙冰冰感唔重，少球雪糕反而更清新。

搭配金蘭茶底，比四季春更清淡，同其他水果沙冰一樣冇茶味，基本上係杯桃汁。

全店甜甜的，不過產品沒有驚豔。

配合粉紅色桃桃，亦使用全新紙袋。

喜茶嘅其他IG帖文：http://bit.ly/2AaOZpc

喜茶

地址：深圳紅荔路書城中心城金域廣場C區101近南區8號門 (地鐵少年宮站)

其他深圳嘅飲品、麵包店介紹：

【深圳一日遊】奈雪の茶 http://bit.ly/2k5ntDO

【深圳一日遊 - 歐包熱】樸悅間 http://bit.ly/2iZDyY2

【深圳一日遊】喜茶 - 超級網紅店 http://bit.ly/2iXC3ts

【深圳一日遊】維星Veones http://bit.ly/2Ki5Edk

Follow us:

Instagram: http://bit.ly/2g3ZtuS

Facebook: http://bit.ly/2gu1fIG

Blog: http://bit.ly/ywycarol

Contact us: mrmrsfoodhk@gmail.com

南京大牌檔

用餐日期：2018/05/12

遇著沒有特別安排的假期，找一、兩間深圳餐廳試試，都成為我們其中一個消遺行程。月中到訪南京大牌檔，印象不錯，值得再訪

南京大牌檔屬於深圳頗受歡迎的連鎖餐廳，於中國很多城市都有分店，供應南京特色菜、江浙菜為主。

深圳有兩家，裝潢古色古香，令人仿佛穿越到古代，菜品價格相宜，而且味道不俗，性價比高，很受本地人喜愛

南京大牌檔有兩間分店，分別在KKmall及華強九方商場，今次選擇了後者，論地方，九方商場都大，有點像金光華、購物公園。

餐廳裝潢走中國風，木枱木櫈、月亮門、燈籠等，模仿老南京街景，連同穿著古裝的店員，十足置身古代場景，跟網紅桂滿隴各有特色。

大廳基本上是四人方桌，餐廳面積很大，但客人多的話，會有一點點擠逼。

燈籠印有菜品名稱。

傳統碗筷、摺叠式餐牌都很有風味。

菜品選擇豐富，以鴨類為主，另有地道小食、飯麵，人少少起碼分幾次，先能夠將招牌菜品試清，今次兩個人點了幾款，已經投降

天王烤鴨包 RMB¥12

招牌烤鴨包一籠三隻，類似小籠包，鴨肉餡料扎實，份量十足，加上少量湯汁，味道濃郁，略嫌皮厚。

金牌烤鴨 RMB¥29

以鴨肉汁浸住烤鴨，味道基本上跟烤鴨包一樣，鴨肉不乾柴，愈吃愈滋味，配飯或粥一流，否則會鹹

地鍋小公雞 RMB¥46

以鐵鍋上，即時點火，火力挺猛。鍋中有醬炆雞，雞肉入味，不至於滑，如果雞肉豐滿，啖啖肉更好。

有點客家風味，而且有茶樹菇、薯仔等，味道濃郁，單吃可能會覺得有點重口味。

所以配搭上麵包條，口感扎實軟熟而非酥脆，沾上醬汁亦不會有油膩感，很好吃。

老牌陽春麵 RMB¥9

因為面頭一層油，湯頭非常熱，麵條幾香，雖然頗為軟身，但不會糊口。湯底鹹鹹甜甜，可惜太油

本來想點國民美齡粥，但下午居然賣哂，廿幾蚊碗粥喺國內係天文數字，好想試下啊，好多人讚架。

桂花拉糕 RMB¥12

一份四條，拉糕淡黃色，夾起已經感覺到那股煙韌。糯米糕面頭掃上桂花醬，薄薄一層，味道清甜

當甜品吃可以，不過始終有飽滯感，一件起兩件止。

整體而言，南京大牌檔菜品選擇多，價格相宣，口味地道，人均消費六、七十元，性價比很高，可以再訪。

餐牌：

南京大牌檔

地址：深圳華強北振中路九方購物中心5樓L506鋪

Follow us:

Instagram: http://bit.ly/2g3ZtuS

Facebook: http://bit.ly/2gu1fIG

Blog: http://bit.ly/ywycarol

Contact us: mrmrsfoodhk@gmail.com

海底撈

用餐日期：2018/05/01

聽過身邊朋友食過香港店話性價比唔高，加上自己都會去深圳食野，所以壓根兒冇諗過喺香港食海底撈。食過嘅人應該都知道，佢地賣嘅並非食物、出品，而係服務

雖然喺深圳有唔少分店，但喜歡海底撈嘅人係遠比想像中多，假期關係，醒目嘅當然要提前訂位，walk in的話真係花兒都謝了。

除左打電話到個別分店訂位，如果有國內手機號碼，亦可透過微信公號訂位。

當然啦，即時要等位，亦可以享用佢地嘅服務消磨時間，例如美甲，又或者食下零食吹下水，時間都好快過。

選擇位置便利嘅卓越INTOWN分店，由於有訂位，準時安排入座一行五人被安排到非常闊落嘅大枱，店員極速送上圍裙、熱毛巾。

女士會有橡根圈、戴眼鏡嘅客人會有擦眼鏡紙、手機膠袋亦係基本，一坐低就已經感受到貼心服務

店員全部自動波，個人認為做到呢個份上，已經很足夠。我地都唔係太習慣太熱情嘅招待，點到即止為佳打邊爐都係自己親手烚下烚下好，同枱要有啲空間傾下計。

唯一唔鐘意店員慣性手勢，一上菜就幫我地落哂啲配料落鍋，唔知係咪多人等位，有少少chur

另，一見個杯飲到差唔多就想加水，但…我地飲緊雪碧lol…俾佢地「整估」左幾次，我地幾乎將個杯跟身

落單用ipad，指示清晰，網上流行不少關於海底撈嘅攻略、隱藏菜單，有興趣咪試下、笑下。

自助區有水果可取，西瓜、火龍果、車厘茄、青瓜等。

調料費 RMB¥10/位

值得一讚醬料選擇巨多，豆豉、蒜泥、芝麻、牛肉醬、腐乳等，難怪有啲人會點清水湯底，然後用醬料自製湯底。

蕃茄火鍋RMB¥38 拼 牛油麻辣鍋 RMB¥60

蕃茄湯底濃郁，肯定落左好多茄膏、蕃茄製成，當然唔少得MSG (笑)，食完難免口渴。

麻辣鍋點左少辣，比較貼心可以選擇保留辣椒與否。

配料選擇豐富，肉類、海鮮、丸滑、蔬菜、麵食等齊全，分成半份/全份，人少人多喺點單方面都有彈性。

手切牛肉  RMB¥68、撈派肥牛   RMB¥20/半份

招牌蝦滑   RMB¥24/半份、翡翠墨魚滑   RMB¥13/半份

牛肉丸   RMB¥22/半份、包心蟹丸   RMB¥18/半份

魷魚鬚    RMB¥19/半份

現炸酥肉    RMB¥16/半份

血旺   RMB¥30/份

撈派魚餅    RMB¥26/份

青芛   RMB¥30/半份

蘿蔔   RMB¥6/半份、金菇  RMB¥15/半份

冬瓜、凍豆腐、老油條、豆腐皮、娃娃菜、木耳、芋頭   RMB¥10/半份

可樂、雪碧    RMB¥12/枝/1.25L

味道上冇話邊款覺得特別出色，唔差嘅，價錢方面亦唔貴，人均一百蚊都食到飽飽，性價比不錯，主要「食」服務囉，睇你享唔享受

海底撈火鍋

地址：深圳福華三路卓越世紀潮流會場L401/L402

Follow us:

Instagram:http://http://bit.ly/2g3ZtuS

Facebook: http://bit.ly/2gu1fIG

Blog: http://bit.ly/ywycarol

Contact us: mrmrsfoodhk@gmail.com

喜茶

用餐日期：2018/05/13

早個幾禮拜前睇小紅書見有人分享喜茶又有新品推出，追上黑糖鮮奶潮，非常心動

頭一星期只限於各城市黑金店先有售，直至而家其他分店都已經加入新品，貫徹品牌一向都鐘意用嘅營銷方式，第一日仲做買一送一添。

遇左一定會排長龍，所以中午就到深圳，去左三家分店，包括寶能、車公廟、世界之窗店都賣光光，唔知幾點鐘再有，打算放棄

但接近黃昏時間喺羅湖區按摩前，死不心息去到東門店又撞著有供應，真係踏破鐵鞋乜乜其實去過數間分店，最唔鐘意就係東門店，本地人同香港人都多，冇計啦，咁啱得咁橋！

而家其他飲品已經可以用微信掃QR Code落單並支付，算係消化左部分人流，但不適用於新品。（新品要排隊購買）

由排隊到下單排左35分鐘，但取茶只係十零分鐘。見有咁多人排隊，都堅持只有一個店員收銀，沖茶速度比落單快，積聚人潮

有心分流，大可以開多幾個收銀，或者搵店員喺門口一路落單。可以話呢種飢餓營銷法低手，但亦可以話幾湊效。

飲品分布蕾波波茶、奧利奧波波茶，可配鮮奶或鮮奶茶，糖度、冰度可自選，較有彈性。

為左試下分別，我地一杯點鮮奶，一杯點鮮奶茶，一杯正常糖，一杯少糖，但我覺得甜度方面冇明顯分別。

布蕾波波茶/正常冰正常糖 RMB¥19

類似喺小摘堂茶嘅炙燒波霸奶，將好薄身嘅焦糖層燒過，下面係招牌芝士奶蓋，再配鮮奶、黑糖珍珠。

提供匙更仔，可以先試焦糖配奶蓋，奶蓋係無敵，其他飲品店無法相提並論，如果焦糖層再厚身、脆啲會更好

鮮奶睇到係國內品牌，奶味冇其他用明治或者維記奶嘅咁突出，相對較淡。即使點正常糖都唔係話好香黑糖味，略為失色。

珍珠係大粒size，比一芳大粒，類似鹿角巷，口感幾有噍頭，份量唔多。

係咪好甜，我就唔覺，加上冰塊多，稍微溶化後就會啱啱好冰塊溶化前已經飲完，未至於去到底會變奶水。

奧利奧波波鮮奶茶/正常冰少糖 RMB¥19

面頭係oreo碎加芝士奶蓋，相對布蕾波波冇咁特別。鮮奶配嫣紅茶底，茶味明顯，都係一杯正常嘅珍奶。

總結：質素並唔係非飲不可，但比同類型飲品便宜，到熱潮過後都可試吖

都係嗰句，我對芝士奶蓋茶底飲品以外的，都係純粹抱集郵心態去試。

喜茶嘅其他IG帖文：http://bit.ly/2AaOZpc

喜茶 (東門店)

地址： 深圳建設路3018號1234space二樓L212鋪

其他深圳嘅飲品、麵包店介紹：

【深圳一日遊】奈雪の茶 http://bit.ly/2k5ntDO

【深圳一日遊 - 歐包熱】樸悅間 http://bit.ly/2iZDyY2

【深圳一日遊】喜茶 - 超級網紅店 http://bit.ly/2iXC3ts

【深圳一日遊】維星Veones http://bit.ly/2Ki5Edk

Follow us:

Instagram: http://bit.ly/2g3ZtuS

Facebook: http://bit.ly/2gu1fIG

Blog: http://bit.ly/ywycarol

Contact us: mrmrsfoodhk@gmail.com

The 7th day 第七天

用餐日期：2018/04/21

第七天位於海岸城，附近有Line Cafe、喜茶等網紅店，但走歐陸風格的餐廳不多，因此很容易吸引到我們注意

以「第七天」作為店名，沿於第七天是「安息日」的概念，希望客人能夠放下工作日的壓力，好好享受假期。

店內環境舒適，菜品選擇多樣，襯放假來試試早午餐也不錯。餐廳分為室內、外位置，空間感足，以白色為主調，落地玻璃窗設計，光線充足

廚房開放式，醬料、食材擺放整齊，透明度高

枱面放置小植物，確實令人放鬆。

餐牌選擇豐富，有全日早餐例如班尼迪、果昔碗、沙律、小食、意粉、漢堡、甜品等，以西餐、輕食為主，定價中上。

簡約健康碗 RMB¥52

曾經有一段時間頗流行果昔碗，網上亦有不少食譜分享，我們懶得自製，難得見這家餐廳有供應，即管一試。

健康碗有幾款，配搭不同食材，以水果為主，簡約健康碗以麥片、香蕉、藍莓、椰子片、蜂蜜、奇亞籽製作。

健康碗很足料，份量不少，賣相亦不錯吧。草莓、香蕉blend成果昔，濃稠得宜，保留水果纖維，味道酸酸甜甜

配料增加口感，不過真心，吃一碗就已經很飽肚

香煎培根松露奶油意粉配溫泉蛋 RMB¥52

主食選了意粉，配料很足，由於用上進口食材，所以整體味道還是挺不錯，接近香港人口味。

意粉軟硬適中，松露味道不會太嗆，奶油量多，非常creamy，吃到最後感覺會膩，畢竟油份有點重。

飲品方面選擇不少，除了咖啡、花茶，第七天主打新鮮果汁、酸奶，有不少營養價值高的食材例如羽衣甘藍、番石榴、青瓜、牛油果等。

蘋果蜂蜜螺旋藻 RMB¥32

飲料頗大瓶，加入螺旋藻粉，顏色呈深綠色，味道以蘋果味為主，比較香甜

餐牌：

The 7th day 第七天

地址：後海中洲控股金融中心B座二樓(蘇寧易購對面)

其他深圳嘅cafe介紹：

【深圳一日遊】Lady7 Café http://bit.ly/2v3RTLJ

【深圳一日遊】Line Friends Cafe & Store   http://bit.ly/2ibKKDB

【深圳一日遊】Dreamiya  http://bit.ly/2jtKcoT

Follow us:

Instagram: http://bit.ly/2g3ZtuS

Facebook: http://bit.ly/2gu1fIG

Blog: http://bit.ly/ywycarol

Contact us: mrmrsfoodhk@gmail.com

jí-lóu space 幾樓

用餐日期：2018/04/10

深圳有不少位於高樓嘅咖啡室，「jí-lóu space 幾樓」位於瑞思中心34樓，都屬其中一家網紅店，從窗外望出去正正就是世界之窗。

雖然稱不上良晨美景，但因為樓高，附近未有其他大廈遮擋，黃昏時間去到景色都不錯

jí-lóu space鄰近地鐵世界之窗站，出口旁邊的大廈正是，十分方便。餐廳裝潢簡約，空間不算很大。

L字型格局，有部分座位靠近大玻璃窗，有部分為二人細枱及一張長枱。

其中有三個隔開的空間，稱不上包房，但可以圍坐約五、六個人。擺放茶几、坐墊、公仔，頗舒適，但中午時間會比陽光會比較曬。

看過不少評語，表示太多人，可能我們當日並非假日，下午茶時間坐了兩小時都沒有其他客人，很自在

餐牌供應飲品、甜點例如件裝蛋糕、千層等，蛋糕價錢合理，反而我覺得飲品比較貴，咖啡、特飲、水果茶、冷泡茶定價RMB¥28-50。

百香果朱古力慕絲 RMB¥32

類似款式的蛋糕，深圳都有很多，食過幾家均用差不多製作方法。外面薄薄一層淋醬，內餡為朱古力慕絲、海綿蛋糕及覆盆子夾心。

朱古力慕絲預期之中濕潤綿密，味道香濃，混合百香果，味道酸酸甜甜。海綿蛋糕比例不多，雖然未有明顯口感，總算為蛋糕添一份層次

敗筆在於墊底的餅乾，味道有點廉價，亦不脆口，只是普通消化餅。

除此款外，其他蛋糕都用一種類似脆脆的餅底，可能會比較美味。32元人民幣而言，價格合理，跟香港食到的連鎖餅店質素差不多。

四季烏龍水果茶 RMB¥40

烏龍茶底搭配三種水果，分別為士多啤梨、菠蘿、芒果。一般水果茶於深圳賣到40元的，實在很少見，定價進取，份量不多。

水果份量適中，味道清新，沒有糖水感，士多啤梨切粒再壓碎少少，口感較特別。但因為當日天氣有點熱，飲一杯水果茶，很refreshing。

整體而言，餐廳環境舒適，甜點中規中矩，服務方面亦很好，當日我們遺下了手袋，事後再回到餐廳，店員替我們保管好，太感謝了

同名姊妹店都已經開幕了，接近會展中心站，同樣都是高樓咖啡室，位置更高，在52樓，有機會再試試

jí-lóu space幾樓 (世界之窗瑞思中心店)

地址：深圳深南大道瑞思中心A座3405室 (地鐵世界之窗站C1出口)

其他深圳高空cafe介紹：

【我在38樓看風景】KONG 空    http://bit.ly/2BuQf54

Follow us:

Instagram: http://bit.ly/2g3ZtuS

Facebook: http://bit.ly/2gu1fIG

Blog: http://bit.ly/ywycarol

Contact us: mrmrsfoodhk@gmail.com

祿鼎記

用餐日期：2018/04/21

數到深圳最受歡迎的酸菜魚，祿鼎記是其中之一，品牌於廣州起家，被譽為廣州最好吃的酸菜魚，據聞老闆好喜歡《鹿鼎記》，因此將店名如此命名。

深圳都有數間分店，近近地一試，酸菜魚質素不俗，符合廣東人口味。當日亦遇上不少香港人，難怪長期大排長龍

我們選擇了平安金融中心分店，位置很好找，很接近購物公園 (CoCo Park)，此大廈較新，暫時只有幾間餐廳，除了祿鼎記，還有為人熟悉的桂滿隴、豚王等。

祿鼎記人氣不一般，雖然5:30pm才營業，但如果想第一輪用餐，一定要5點半前到達並取票等位，特別是假期。

餐廳以紅、白為主調，採用財神作為標誌，餐牌、店內都有不少財神像，上菜時還聽到店員說恭喜發財，感覺喜慶。

店面面積大，座位一部分為梳化位、細枱為主，另有幾張長枱，所以人多起來，都要拼桌，環境一般，始終跟旁邊客人距離有點近。

廚房開放式，可以見到拋鍋、熬湯的情況。

餐牌供應川菜為主，強調「油只用一次」，分酸菜魚鍋、乾鍋、火鍋類，另有配菜、小食等。

酸菜魚以外，乾鍋、財神炒飯亦是招牌，可惜我們只有兩人，未能一一盡試。

八寶茶 RMB¥6/位

不論飲用與否，都會收取茶位費。用上八寶茶，裡面有杞子、紅棗、桂花等。

店員會用長嘴茶壺泡茶，訓練有素，很準確。

酸菜魚 RMB¥96/2條

酸菜魚定價 RMB¥48/條，稱約有一斤，單品要點兩斤起，可以併田雞。

配料以蔬菜、粉麵為主，亦有肥腸、餐肉，定價每份 RMB¥12/18/20，價格略高。

辣度不能自選，但迎合廣東人口味，屬於容易入口的類型。辣度適中，麻辣味不會持續，加有泡椒，湯底味幾上癮

魚肉份量不多，鋪滿辣椒、花椒、泡椒、酸菜。魚肉已切片去骨，吃得放心，魚肉滑嫩帶鮮味，不過連皮上。

酸菜中規中矩，但份量太少，欠大方

拉絲巴拿拿 RMB¥18

一份四粒，沾粉炸香蕉球，外脆內軟，微微拉絲效果。

抄手 RMB¥10

有約四、五粒，麻辣味重，抄手皮薄潤滑，但內餡太少。

杏汁魚湯 RMB¥10

魚湯每日新鮮熬製，可以一試，湯底呈乳白色，味道濃郁，混合杏汁味都不覺突兀

紅白 RMB¥10

好多川菜餐廳都會供應冰粉，有助解辣。店家稱紅色來自天然，非色素，因為裡面加有紅曲米、冰粉籽，另有葡萄乾、淡奶等製成。

甜度不高，其實似啫喱，但略嫌不夠冰涼。

整體而言，祿鼎記的人氣很高，酸菜魚味道對辦，符合廣東人口味，未試過都可以一試

祿鼎記

地址：深圳平安金融中心6樓N608商鋪 (地鐵購物公園站)

酸菜魚：

【深圳一日遊】姚酸菜魚 http://bit.ly/2F1keGg

【深圳一日遊】太二酸菜魚http://bit.ly/2HcTsvy

Follow us:

Instagram: http://bit.ly/2g3ZtuS

Facebook: http://bit.ly/2gu1fIG

Blog: http://bit.ly/ywycarol

Contact us: mrmrsfoodhk@gmail.com

Bon Vivant 花藝烘焙下午茶

用餐日期：2018/04/09

深圳有不少裝潢很美的花店，其中位於皇庭廣場的Bon Vivant人氣很高，每逢週末都有很多人跟閨蜜三五知己嘆茶吃甜品、打卡拍照

能夠稱得上網紅店都不簡單，平日下午茶時間都有不少客人，相信假日會更多人。

皆因花店結合cafe形式，供應手作甜點、花茶等，甜點師是台灣人，將花藝與甜品結合，顏值高之餘質素不錯

餐廳位於皇庭廣場裡面，位置方便，外觀像一間花店，行過都會留意到。近店門擺放乾燥花、鮮花或相關的手作產品。

裡面有用餐區，裝飾到小花園一般。被花草圍繞住，感覺舒適。

角落位置有三個小空間，以圍欄相隔，坐得舒適，適合四至六人。

而好多網紅店都會於店內設計一幅花牆，方便客人打卡，還自帶兩盞大燈，只要消費就可以使用。

餐牌選擇較少，只供應法式甜點、杯子蛋糕、飲品等，定價 RMB¥38-52，價錢中上，畢竟店家強調使用較優質食材。

石生花 RMB¥52

招牌蛋糕之一，賣相精緻逼真，造型就像一塊石頭，旁邊鋪上曲奇碎，模仿泥土。鏡面淋醬再明顯點，會更加美。蛋糕顏值、味道都對得住價錢

蛋糕質地非常細滑，內餡三個層次，雲呢拿慕絲香而綿密，覆盆子醬酸酸甜甜，兩者配合得很好，加上底層有海綿蛋糕，整體甜而不膩。

榛果山丘 RMB¥52

點了兩件最貴的款式，聽說是近期推出的新品，同樣地賣相精美。面頭以榛子醬、奶油忌廉、海鹽焦糖醬製成唧花。

蛋糕外層為朱古力皮、混合花生粒，基本上就是「金莎」口感。內餡先有一層香甜榛子忌廉慕絲，軟滑不甜膩

煌煌清香茶 RMB¥48

花茶有數款，有玫瑰、桂花、皇菊，還有一款名為「神秘茶」，甜點配茶最適合不過。

Bon Vivant 花藝烘焙下午茶

地址：深圳福華三路皇庭廣場L2-06號商鋪 (地鐵會展中心站)

其他深圳嘅cafe介紹：

【深圳一日遊】Dreamiya  http://bit.ly/2jtKcoT

【深圳一日遊】ANDCAFE  http://bit.ly/2EOzEhJ

【深圳一日遊】Lady7 Café http://bit.ly/2v3RTLJ

【深圳一日遊】Line Friends Cafe & Store   http://bit.ly/2ibKKDB

【我在38樓看風景】KONG 空    http://bit.ly/2BuQf54

Follow us:

Instagram: http://bit.ly/2g3ZtuS

Facebook: http://bit.ly/2gu1fIG

Blog: http://bit.ly/ywycarol

Contact us: mrmrsfoodhk@gmail.com

老板出差老壇酸菜魚

用餐日期：2018/04/10

深圳有不少主打酸菜魚的餐廳，名氣大的分分鐘要等幾個小時，值得與否見仁見智。最近試過名為「老板出差」的酸菜魚，味道不錯，可能因為位置不算便利，一般都不需要等位。

店名很有趣，意思是他們家的酸菜魚很受歡迎，很早賣完，只有老板出差，員工不用加班才有機會吃得到

餐廳位於君尚商場8樓，接近地鐵登良站，店面以黃色為主調，大部分為卡位，坐得舒適，整體感覺比較年輕

餐牌比起一般酸菜魚店，款式種類算多，採用微信下單，更加方便，無溝通誤會。

除酸菜魚外，亦有其他例如口水雞、拍青瓜等涼菜、小食等。原本見餐牌還有串燒，但店員話暫時未開始供應

熱洛神花茶 

免費自取。

酸菜魚 RMB¥98/2人小份、腐皮 RMB¥5

酸菜魚可自選辣度，分為正常辣或加辣，相對名氣店而言，比較有彈性。鍋中已有酸菜、蘿蔔片、麵條。

有需要可額外追加配菜，以蔬菜類為主，例如豆腐、娃娃菜、闊粉等。我們點了腐皮，份量不少。

賣相吸引，以菊花瓣點綴，鋪滿辣椒、花椒等，湯底以酸菜、豬骨熬製，味道濃郁，酸辣度適中，嗜辣的朋友可能要點加辣版本才滿足。

而且並不油膩，直接喝也不難受，有些客人也會泡飯吃用上新鮮鱸魚，份量足夠兩人，魚肉嫩滑無骨，亦無魚腥味。

強調酸菜都是自家製，入口爽脆無渣。蘿蔔片薄身、腐皮容易入味，麵底量足，加上我們點了白飯，吃得很飽

搶炒四季豆 RMB¥22

炒得乾身，香辣惹味。

炸雞中翼 RMB¥28

一份五隻，生炸不沾粉，好吃。

甜食方面除了糍粑，還有小饅頭、解辣一流的冰粉等。

紅糖糍粑 RMB¥16

糍粑以糯米製作，沾上黃豆粉、紅糖，外脆內軟

熱帶水果茶 RMB¥16

整體而言，這一餐人均消費一百，酸菜魚頗有水準，其他食物選擇亦多，最重要是不用排隊，期待日後正式加入串燒

老板出差老壇酸菜魚

地址：深圳中心路3019號君尚3019店8樓 (地鐵登良站)

酸菜魚：

【深圳一日遊】姚酸菜魚 http://bit.ly/2F1keGg

【深圳一日遊】太二酸菜魚http://bit.ly/2HcTsvy

Follow us:

Instagram: http://bit.ly/2g3ZtuS

Facebook: http://bit.ly/2gu1fIG

Blog: http://bit.ly/ywycarol

Contact us: mrmrsfoodhk@gmail.com

Something For

用餐日期：2018/04/09

喺網上好紅嘅something for，有好多人紹佢地家嘅牛角包，終於一試。小店位於市中心區，鋪面唔大，以白色為主調搭配藍色作細節，裝溝簡潔。

供應咖啡、可可等，兼賣幾款自家製牛角包，消費就唔高，份量偏少。

牛角包有原味、朱古力蔓越莓、草莓、香蕉、火腿芝士、牛油果等，見到店內只係剩番火腿芝士；一問之下，原來有啲款式可以即製

草莓怪獸 RMB¥28

傍晚時間當然唔係新鮮出爐，亦冇特別加熱，口感點都爭啲。將牛角包切開，唧入榛子朱古力醬 ，再夾草莓片，製作簡單。

牛角酥szie好細，好在烘焗得徹低，食落仲有少少脆，但唔夠酥，同埋性價比唔高

Blue dirty RMB¥32

呢杯係店員推薦嘅咖啡，混合泰國蝶豆花成份，所以實物有點藍，幾靚。咖啡同奶密度差不多，慢慢會融合，飲嘅時候要大口啲。

味道香醇順滑，奶淡但冇甘苦，唔喜好好咖啡嘅人都入到口

Something For

地址：深圳新華保險大廈西門民田路171-4

其他深圳嘅cafe介紹：

【深圳一日遊】ANDCAFE   http://  http://bit.ly/2EOzEhJ

【我在38樓看風景】KONG 空   http://    http://bit.ly/2BuQf54

Follow us:

Instagram: http://bit.ly/2g3ZtuS

Facebook: http://bit.ly/2gu1fIG

Blog: http://bit.ly/ywycarol

Contact us: mrmrsfoodhk@gmail.com

豆府花城

用餐日期：2018/04/10

歡樂海岸佔地很廣，建築物都幾有特色，當然唔少得香港人經常要潮聖嘅食店，例如喜茶、Lady7、椰子雞、八合里等，仲有個老翻叫三引水產，每家店鋪面積亦相對大。

加上不時舉辦大型展覽，好似之前嘅【teamlab】、而家展覽中嘅【色廊】等。我地衝住此展覽而來，順道食左餐飯。

豆府花城有數間分店，最方便應該係此店，其次係kkone店，喺網上點評唔屬於高分但見有熟食，又有甜品，即管一試。

餐廳外觀古色古香，但枱櫈都係普通茶餐廳風，非常闊落。有室內外位置，靠窗位置有湖景，其實幾舒適。

靠天然風，好在當日太陽曬得黎有少少生風，遲下熱啲就……自己諗

餐牌供應台灣菜為主，好似牛肉麵、滷肉飯、小食、台式甜品等，撇除牛肉麵，其他食物價錢唔貴。

蕃茄牛肉麵 RMB ¥56

主食中最貴，有一款睇落差唔多但冇蕃茄平十幾蚊，蠢左。牛肉麵份量偏少，用上菠菜麵。牛腩細細粒四、五件，加少量蕃茄肉，僅此而已。

湯底並唔蕃茄，茄味淡薄，亦當然冇紅燒感覺，同杯麵差唔多味精fu。

牛肉咬落好腍好散，欠噍頭，完全唔值呢個價，兌番港幣超過70蚊，難聽啲咁講，茶木都好食過佢，所以實在把鬼

三色水餃 RMB¥29

好似北方餃咁冇湯，有三款餃，各四粒，分別係菜肉餃、粟米餃、韭菜餃，唔同顏色。

size就唔細，可惜餡少得可憐，皮較厚身。味道正常，無驚無喜，12粒價錢合理。

甜品方面分豆花、黑糖冰沙、仙草、雞蛋布丁底，以芋圓、地瓜圓、紅綠豆、花豆、花生、珍珠、蜜薯、蜜芋、水果等混搭，定價RMB¥19-22。

台北仙草 (芋圓、地瓜圓、紅豆、花生、珍珠) RMB¥20

除左以上配料，仲有一球雲呢拿雪糕，以仙草墊底，芋圓、地瓜圓4粒，價錢上幾抵食。

雪糕唔會溶哂，唔係雲呢拿味，只有死甜。芋圓地瓜圓比較大粒，粒粒一樣，外型切割相信都係機製。味道非常淡薄，口感偏硬，噍膠咁。

紅豆粒果分明，甜度適中。珍珠幾煙韌，花生煮腍左，口感尚算豐富。仙草唔夠滑溜，同涼粉一樣。

對呢個甜品有點失望，純粹照編，價錢平，但味道一般

豆腐花城外表幾靚，內裡都係普通野，眼見比較多人點滷肉飯，十零蚊食得飽，我地簡直係high apru。

豆府花城 (歡樂海岸店) 

地址：深圳白石路東57號歡樂海岸曲水灣B-23 (地鐵深圳灣公園站)

其他深圳嘅芋圓甜品店介紹：

【深圳一日遊】鮮芋仙 http://bit.ly/2ELjCFg

【深圳一日遊】台北瘋豆甜品 http://bit.ly/2Hq6MdL

Follow us:

Instagram: http://bit.ly/2g3ZtuS

Facebook:http://http://bit.ly/2gu1fIG

Blog: http://bit.ly/ywycarol

Contact us: mrmrsfoodhk@gmail.com

淺蔥小唱

用餐日期：2018/04/02

難怪咁多人黎深圳鐘意到訪卓越INTOWN，呢度食肆夠集中，有齊喜茶、Lady7、探魚、八合理、海底撈，原本都想打邊爐，但去完cafe已經見到海底撈排左幾十人，哈哈。

喺附近搵緊食乜之際，被歌聲吸引住，來自淺蔥小唱呢間餐廳，會定時安排駐場歌手喺露天位置、室內輪流演唱，當然都有番咁上下好聽先吸引到人嘅

餐廳位置頗大，分三個部分，一為露天，國內嘅朋友好似唔怕熱，幾喜歡坐室外；二為室內，不過好多餐廳嘅冷氣都唔夠；三為酒廊設計，氣氛較輕鬆。

餐牌供應鍋物，例如酸菜魚、乾鍋田雞、排骨湯鍋等，另有多款主食，以川菜為主，定價還可以，唔屬於平，但亦都唔貴，喺大眾點評買嘅團購就會划算啲。

蔥哥酸菜魚 RMB¥68、白飯 RMB¥2

最近食得比較多酸菜魚，以呢份價錢最平，份量足夠兩人用，有火熱住，唔怕魚肉放涼變腥。

鍋物睇落有啲油，酸辣度中等。雖然鍋淺，但魚肉份量多，片得薄身，食落滑嫩有彈性，最緊要冇姚酸菜魚嗰種鬆拋拋嘅口感。

酸菜一般，唔及酸菜魚名店般有自家製酸菜，唔夠脆口。不過賣呢個價錢，仲有米粉墊底，都合格

辣子雞 RMB¥58

喺香港點親辣子雞都麻麻地，深圳食到嘅較對辦，味道夠濃夠鹹，花椒香香辣辣，惹味。

不過呢間嘅辣子雞令人食到好崩潰，雞肉好細碎，骨多肉少，只可以妹妹下，相當唔抵食，一路食一路呻，純粹過口癮

蒜蓉油麥菜 RMB¥26

一貫作風，夠哂油，多油就一定夠滑囉，哈。

下酒手撕雞 RMB¥32

手撕雞為中伏之選，普遍喺深圳食手撕雞比較乾鞋，仲話送酒，噍幾口都唔想吞。

野山菌炖土雞 RMB¥15

好多枱客人都有點嘅燉湯，幾足料，冇味精感。

整體消費唔高，人均一百，買團購當然會再平啲，輕輕鬆鬆聽歌食飯都可以。

淺蔥小唱

地址：深圳福華三路卓越INTOWN負一層

其他深圳酸菜魚：

【深圳一日遊】姚酸菜魚 http://bit.ly/2F1keGg

【深圳一日遊】太二酸菜魚   http://bit.ly/2HcTsvy

Follow us:

Instagram: http://bit.ly/2g3ZtuS

Facebook: http://bit.ly/2gu1fIG

Blog: http://bit.ly/ywycarol

Contact us: mrmrsfoodhk@gmail.com

Lazy Planet 懶人星球 

用餐日期：2018/04/02

懶人星球喺深圳咖啡店黎講屬於熱門名單，長期排頭幾位，去過後我都覺得名副其實。

深圳有唔少呢類型位於高樓之中嘅咖啡店，除左之前去過一間位於石廈嘅【KONG】外，此店喺環境、食物質素方面都稍勝。

懶人星球位於卓越世紀中心，熟口熟面呢，正是位於卓越INTOWN商場旁邊嘅商廈，靠近地鐵崗廈或會展中心站。

卓越世紀中心分幾座，此店屬3號樓，地下嘅勝記旁邊坐電梯上33樓便是。

有別於其他高空咖啡館，日頭係cafe，指11:30-19:30，供應咖啡、果茶，甜點。晚上會換成小酒吧風格，營業至凌晨，係截然不同嘅氣氛。

分為兩層，每層面積稍為狹小，但花左相當多心思去裝潢，吧枱位置有格調

書架、大玻璃窗，配合梳化位，坐得舒適。雖然唔屬於靚景，至少景觀遼闊。

星空 RMB¥28

以高空咖啡店而言，飲品唔算貴。其實係柚子梳打漸層飲品，唔少得會變色嘅蝶豆花成份。

梳打水比例唔多，唔會成肚氣，味道無功無過。

草莓芝士慕斯 RMB¥43

當日都係賣剩一款，相對其他款式，造型較普通，幸好味道唔錯，稱用上較優質嘅材料，只好下次回訪再試其他。

粉紅色朱古力鏡面厚薄適中，甜度稍高，裡面層次唔算多，草莓慕絲搭配奶油芝士夾心，綿密軟滑，芝士味香濃

其實同香港好多靚少少嘅連鎖餅店質素差不多，價錢貴啲，不過食埋環境囉。

而最多人關心嘅，係2樓嘅設計，呢條樓梯都有唔少網美影相，輕鬆變兩米長腿。

2樓分成6個小房間，其中三間係單人房，配備一張按摩椅，按時收費，RMB¥35/小時，不設低消。

另外三間屬於小型房間，只有布簾，可容納三至四人，日頭低消滿RMB¥150-160即可享用 (如果唔到低消又想坐房，需付RMB¥38服務費)

晚上係小酒吧形式，低消會較高，可自行查詢店家。

房間(1)

房間(2)

房間(3)

房間方便合同朋友傾下計，坐足幾粒鐘夠划算啊。我地平日黃昏前來，客人唔多，未知假日情況如何。

LazyPlanet懶人星球 

地址：深圳海田路卓越世紀中心3號樓B座3317 (地鐵崗廈/會展中心站)

其他深圳高空cafe介紹：

【我在38樓看風景】KONG 空    http://bit.ly/2BuQf54

Follow us:

Instagram: http://bit.ly/2g3ZtuS

Facebook: http://bit.ly/2gu1fIG

Blog: http://bit.ly/ywycarol

Contact us: mrmrsfoodhk@gmail.com

雲屋

用餐日期：2018/04/02

襯復活節假期最後一日，到深圳覓食，因為深圳方面並非假期，所以四圍的人不算多

最近幾喜歡到深圳車公廟站一帶，因為此站好方便，接連多條地鐵線，加上未有大型商場，以小店美食為主，好多時位於商廈、民居之中。

其中雲屋於網上評價不俗，主要供應甜點，幾有質素，環境舒適，到深圳一遊，可以加入口袋名單

好多深圳的甜品店都賣到接近香港價錢，甚至更貴，但頗有質素，加上選擇多，每個禮拜來都不成問題。

小店地址上感覺似民居，裝修成cafe，雖然屬甜品店，但鋪面唔大，主力做訂購原個蛋糕，現場亦有供應少量甜點。

店內位置不多，一張長枱、兩張梳化位、陽台一張小桌子，樓層較矮，景觀就一般，但天氣好的話，坐外面都非常舒適

當日只有我地、店員，環境寧靜，室內罕有地冷氣充足。

餐牌供應件裝蛋糕，款式不定；飲品以水果茶、奶蓋為主。

心事 RMB¥35

顧名思義是心心造型，點單後店員才將莓脆、小菊花裝飾加上。外層屬好薄的淋漿，而非死甜又硬的糖皮

內餡層次分明，牛奶白朱古力慕絲，滑溜不膩，甜度適中。檸檬蛋糕夾層札實，配合覆盆子果醬，冰冰涼涼，酸甜清新。 

用上我最喜愛的硬脆餅底，除了顏值高，亦幾有內涵。

芒果盒子蛋糕 RMB¥32

有部分款式未有於凍櫃展示，如果有興趣可向店員詢問，例如這款盒子蛋糕。 盒子蛋糕有幾種口味：芒果、草莓、榴槤等。

蛋糕底應該所有味道一樣，因為見到店員即時將果肉切粒。芒果味道幾香甜，由於冰過，所以不屬軟熟。

蛋糕一層、忌廉一層，濕潤冰涼，質素還可以，當然不及招牌件裝蛋糕出色。

還有手作曲奇，香脆十足

輕鬆坐了接近兩小時，跟朋友聚聚，幾舒適，小店還有數款幾吸引的甜點，未來一定再訪

雲屋

地址：深圳都市陽光名苑1座8樓8E (地鐵車公廟站C出口)

其他深圳嘅cafe介紹：

【我在38樓看風景】KONG 空   http:// http://bit.ly/2BuQf54

【深圳一日遊】Line Friends Cafe & Store   http://bit.ly/2ibKKDB

【深圳一日遊】Dreamiya  http://bit.ly/2jtKcoT

【深圳一日遊】ANDCAFE http://http://bit.ly/2EOzEhJ

Follow us:

Instagram: http://bit.ly/2g3ZtuS

Facebook: http://bit.ly/2gu1fIG

Blog: http://bit.ly/ywycarol

Contact us: mrmrsfoodhk@gmail.com

金稻園砂鍋粥

用餐日期：2018/02/17

金稻園分店很多，好耐之前(幾年前) 有啲報導關於餐廳嘅食物衛生，呢方面我睇得好開，亦都幫襯過好多次。其實 間間餐廳都有機會有呢啲， 爭在有冇俾人影到

餐牌主打砂鍋粥 ，以往都幾經常食， 另外亦有串燒、小炒。串燒都係比較大路嘅款式。

距離對上一次前來有一段時間 ，原來價錢調高左，性價比冇以前咁高 ，不過味道一樣

蒜蓉生蠔 RMB¥24/3隻

原裝連殼 ，一大督蒜蓉烤 正正常常。

茄子 RMB¥16

喺深圳食一條茄子16蚊人仔係貴， 一般都係十元八塊 。不過呢度嘅烤茄子幾穩定， 好似倒模咁一式一樣 。

茄肉多，加大量蒜蓉、蔥， 都係我鐘意嘅重口味

雞脆骨 RMB¥5/串、雞全翼 RMB¥9

金稻園嘅雞脆骨比較大粒、硬實， 食親都攝牙罅  

烤豆皮 RMB¥5

我地好鐘意食 最少一人兩、三串 烤得幾好食 。裡面蒜蓉夠多， 加啲芝麻、孜然粉， 幾香口！

熱狗腸 RMB¥5  

熱狗腸符，合香港人口味 ，唔係劣質腸。 

炒米粉 RMB¥28

炒得乾身 ，唔算太油淋淋。

雖然一直話貴，但其實唔叫粥都係人均百零蚊 。

睇下比較邊度囉，比較香港咪平 ，比較深圳其他連鎖燒烤店就樣樣野貴幾蚊咁

金稻園砂鍋粥

地址：福田街道水圍村269棟

其他深圳嘅燒烤店介紹：

【深圳一日遊】個斑馬音樂燒烤吧   http://bit.ly/2AgAEWl

【深圳一日遊】木屋燒烤   http://bit.ly/2Bs0LcZ

【深圳一日遊】張姐烤肥牛 http://bit.ly/2GFwoSe

Follow us:

Instagram: http://bit.ly/2g3ZtuS

Facebook: http://bit.ly/2gu1fIG

Blog: http://bit.ly/ywycarol

Contact us: mrmrsfoodhk@gmail.com

色廊展 Color Gallery

前往日期：2018/04/10

【色廊展】台北限定展覽於四月份結束，聽說曾經在網上掀起一陣打卡熱潮。其實該展覽已移師深圳歡樂海岸，將展出至6月3日，如果想近近地跟另一半或者閨蜜瘋狂拍照，不失為一個好地方

原創設計展以「顏色」為主題，以一日生活點滴作為主軸，製作15個色彩場景，體現五顏六色的生活。

每個場景都有獨有主題，例如氣球走廊、粉紅色的衣帽間、黃色早餐店等。如展覽介紹所言，15個顏色，15個房間，拍到嫑嫑的 。

歡樂海岸靠近地鐵深圳灣公園站，浴途可見有關展覽的標示，觀眾可預先於網上購票，或到現場售票處即場購票，定價 RMB¥78/位；RMB¥128/2位。

選擇平日中午12時左右前來當然是最正確的事，因為人流少，較容易影到靚相。

氣球走廊

走廊道以白色氣球佈置，氣球顏色隨燈光投影效果轉換

純白睡房

純白色雙人床、加上小道具，轉換千奇百怪的睡姿，拍出最想要的「床照」

粉紅色衣帽間

起床後到衣帽間挑選衣服，再到巨型化妝品上拍照

黃色早餐店

桌椅、傢俱、食物都是黃色的。

享受早餐之餘，有不少廚具作道具，在這裡，每個都是大廚

Monday Blue 深海地鐵

打工仔每到星期一特別憂鬱？藍色的地鐵像海洋世界般，可借助扶手、鏡子拍出照片。

黑白辦公室

享受一下用腳打字的感覺，或者將自己泡進茶杯

綠色班房

以座椅堆叠成的弧形椅牆很適合打卡，還有黑板、粉筆、粉刷，想起童年了嗎？

橘色冰果室

我的字典裡沒有減肥

紫色鳥籠花房

這個相信是少女/網美們最喜歡的場景，一整片花牆、加上鳥籠花園的座椅當然是合照勝地

閃閃金庫

以金幣為道具的佈置。

湖水藍健身房

拳擊、舉重有助擊退脂肪，還有拳套、啞鈴等道具令人更投入擺pose。

紅色招牌酒吧

酒吧牆上的塗鴉、DJ台讓人忘掉工作。

無重力太空

45度角鏡子反射出太空，這區需要脫鞋才能進入，躺在地上，照出鏡子中的倒影。

藍色球池浴堂

藍色澡堂中堆滿藍色小球，以富士山為背景，很適合大合照。這邊的浴堂需要套上膠袋或者穿上襪子才能進入。

彩虹廊道

結束展覽，為商品發售處。

這類型的裝置展覽適合喜歡拍照的朋友，雖然是收費，但價錢尚算合理一班朋友、男女朋友前來都可以瘋狂拍照，我們最後都花了個半小時才拍得完。

看過網上其他分享，假日會比較多人，聽說某些場景要排隊拍照呢；建議平日12時前或7時後進場，人會比較少

色廊展 Color Gallery

地址：深圳市南山區濱海大道2008號歡樂海岸購物中心L1層3號門 (地鐵深圳灣公園站)

展覽日期：2018/03/24 - 2018/06/03

開放時間：星期一至五 11:00-21:00；周末、假期 10:00-21:00

票價：RMB¥78/位；RMB¥128/2位；RMB¥168/3位 

Follow us:

Instagram: http://bit.ly/2g3ZtuS

Facebook: http://bit.ly/2gu1fIG

Blog: http://bit.ly/ywycarol

Contact us: mrmrsfoodhk@gmail.com

VEONES維星

用餐日期：2018/04/02

作為「不喝飲料會死星人」，平時都經常關注一啲飲品店，喺深圳巨多選擇。

黎到車公廟站一帶，當然就試埋呢間曾經網紅，VEONES維星已經開左有6、7年時間，飲品款式同其他大熱嘅茶飲店有啲唔同。

車公廟店裝潢簡約，黑、白為主，做左個窗口位，都有唔少網美打卡

除左一般嘅咖啡、奶茶、茶飲等，仲有個招牌原創嘅雪頂茶，用上新西蘭鮮奶油打成，其實即是飲品上面有層忌廉咁解。

飲品定價RMB¥15-25，喺網上比較多人飲就係紫薯、草莓鮮奶系列。

雪頂紫薯鮮奶 RMB¥18

都幾大杯，鮮奶油，冇咩特別，好在冇廉價忌廉感覺，不甜不膩。用紫薯打成類似沙冰，夠滑溜，冇碎冰。

可惜紫薯味道唔夠突出，阿Q啲諗：起碼唔假。

咸蛋黃芝士烏龍 RMB¥23/少糖

原本唔係想點呢杯，但見有咸蛋黃奶蓋兼係期間限定，點能錯過。結果…對此飲品失望，亦令我地對店家非常失望。

飲品到手時已經知瀨野，用肉眼係見唔到層奶蓋，直至打開杯蓋，先有一層幾毫米嘅泡狀物體…(好可惜，急住要搵店員問個究竟，來唔切留影。)

以每個月飲十杯八杯呢類型奶蓋嘅我地而言，都覺得好詫異。

根據店員嘅世界級回應：「由於茶沖得多了，所以奶蓋比較少」()

好驚訝…店家係對於茶、奶蓋嘅比例係冇基準？隨心所欲沖的嗎？茶多左，你咪倒左啲茶，先再落奶蓋囉…咁都要教？

於是佢最終補番一層薄薄嘅奶蓋俾我地…

暫時冇喺其他飲品店試過咸蛋黃、芝士配搭，確有咸蛋味，而且保留咸蛋黃碎，同平時飲喜茶嗰種芝士鹹香，完全唔同。

奶蓋層厚度不足，亦唔夠濃稠，只係一層泡，純粹貪新鮮，唔會再飲。

原本對呢間店都有少少期望，因為網上評語不俗…唔知係我唔好彩，定我點錯野，失望

VEONES維星

地址：深圳深南路豐盛町地下陽光街B區負一樓B1-110 (地鐵車公廟站)

Follow us:

Instagram: http://bit.ly/2g3ZtuS

Facebook: http://bit.ly/2gu1fIG

Blog: http://bit.ly/ywycarol

Contact us: mrmrsfoodhk@gmail.com

庖丁烤牛

用餐日期：2018/03/23

深圳有好多燒烤、串燒連鎖品牌，要數最熱少不了有比較多分店嘅木屋燒烤。而我地過往都幫襯過幾間其他燒烤店，例如個班馬、蠔之味、金稻園等。

金稻園係繼木屋後，感覺比較企理嘅，但最近新年去過，佢地加價後，性價比冇以前咁高，所以就另覓餐廳再試。

今次比較即興，純粹收工上黎食個飯就離開，冇特別安排下揀左朋友食過覺得可以嘅庖丁烤牛試一試。

庖丁烤牛有兩間分店，比較方便當然係近樂園路呢間，樂園路應該都係曾經好多人留低腳毛嘅地方，炒幾個小菜又一餐。

但自從多左好多新餐廳、新商場之後，我地都好少再黎。

庖丁烤牛店面亮眼，就喺海鮮街，週五晚人流唔多，店面面積大，樓底高，顯得特別闊落。裝潢以木色為主，感覺有少少似燒烤吧，一邊播啲為人熟悉嘅歌，整體乾淨企理

店面較引人注目就係呢啲幽默句子：青春就像衛生紙，看著挺多的，用著用著就不夠了。講到心坎處，哈哈

餐牌同木屋嘅款式有啲唔同，有個別食開嘅串燒呢度就冇供應。庖丁烤牛強調串燒新鮮唔隔夜，主打牛肉，所以牛串會較多，有牛仔骨、牛尾、牛肚、牛腩、牛鞭等。

另有羊肉、雞脆骨、雞翼、豬手、生蠔、貝類、蔬菜類等，部分以串為單位，有啲係全份。而比較特別係餐廳仲供應烤魚，整體價錢唔貴，人均百零蚊。

關注餐廳嘅微信會有折扣優惠，何樂而不為。番大陸食串燒，就預左重口味，特別佢地鐘意加大量蒜蓉、孜然粉，呢間同木屋感覺差不多。

刀拍黃瓜 RMB¥12

份量超多，3-4人足夠，爽脆而帶小麻，惹味

烤茄子 RMB¥8

茄子對我黎講係幾有趣嘅存在，除左烤茄子外，其餘煮法我一律唔食，哈哈。香港食條茄子平極都要廿幾三十蚊，所以喺深圳食燒烤，點少得茄子。

茄子肥大多肉，加左大量蒜蓉、辣椒粉，蒜香十足，油份點都多，但好食

蒜蓉生蠔 RMB¥24/4隻

生蠔原裝，感覺較安心。

蒜蓉豆皮 RMB¥6/2串

烤豆皮會包住蓉蓉、蔥，份量要夠大方，面頭掃少少醬油，豆皮先唔會乾。

牛小黃瓜條 RMB¥18/10串

其實即係烤牛肉，無功無過，唔好講咩牛唔牛味喇，食落唔老收貨

雞脆骨 RMB¥15/5串、香辣雞翅 RMB¥16/2串

價錢偏貴，一串4粒。雞翼就只有全翼，烤得較乾。

娃娃菜 RMB¥6/2串

避免太乾，點都會落啲油/醬油去燒，一般我地就搵筷子揸揸油先食，自我感覺良好。

烤饅頭片 RMB¥4/2串

唔夠木屋烤得好食，呢邊較乾，唔夠軟熟。

整體而言，庖丁烤牛環境不錯，客人唔會太多，幾好坐，食物味道可接受，又唔洗好似木屋咁排哂隊，可以一試

其他深圳嘅燒烤店介紹：

【深圳一日遊】個斑馬音樂燒烤吧   http://bit.ly/2AgAEWl

【深圳一日遊】木屋燒烤  http:// http://bit.ly/2Bs0LcZ

【深圳一日遊】張姐烤肥牛 http://bit.ly/2GFwoSe

庖丁烤牛

地址：深圳樂園路102號 (地鐵2號線湖貝站)

Follow us:

Instagram: hhttp://ttp://bit.ly/2g3ZtuS

Facebook: http://bit.ly/2gu1fIG

Blog: http://bit.ly/ywycarol

Contact us: mrmrsfoodhk@gmail.com