再窮都要去旅行！

Lazy Planet 懶人星球 

用餐日期：2018/04/02

懶人星球喺深圳咖啡店黎講屬於熱門名單，長期排頭幾位，去過後我都覺得名副其實。

深圳有唔少呢類型位於高樓之中嘅咖啡店，除左之前去過一間位於石廈嘅【KONG】外，此店喺環境、食物質素方面都稍勝。

懶人星球位於卓越世紀中心，熟口熟面呢，正是位於卓越INTOWN商場旁邊嘅商廈，靠近地鐵崗廈或會展中心站。

卓越世紀中心分幾座，此店屬3號樓，地下嘅勝記旁邊坐電梯上33樓便是。

有別於其他高空咖啡館，日頭係cafe，指11:30-19:30，供應咖啡、果茶，甜點。晚上會換成小酒吧風格，營業至凌晨，係截然不同嘅氣氛。

分為兩層，每層面積稍為狹小，但花左相當多心思去裝潢，吧枱位置有格調

書架、大玻璃窗，配合梳化位，坐得舒適。雖然唔屬於靚景，至少景觀遼闊。

星空 RMB¥28

以高空咖啡店而言，飲品唔算貴。其實係柚子梳打漸層飲品，唔少得會變色嘅蝶豆花成份。

梳打水比例唔多，唔會成肚氣，味道無功無過。

草莓芝士慕斯 RMB¥43

當日都係賣剩一款，相對其他款式，造型較普通，幸好味道唔錯，稱用上較優質嘅材料，只好下次回訪再試其他。

粉紅色朱古力鏡面厚薄適中，甜度稍高，裡面層次唔算多，草莓慕絲搭配奶油芝士夾心，綿密軟滑，芝士味香濃

其實同香港好多靚少少嘅連鎖餅店質素差不多，價錢貴啲，不過食埋環境囉。

而最多人關心嘅，係2樓嘅設計，呢條樓梯都有唔少網美影相，輕鬆變兩米長腿。

2樓分成6個小房間，其中三間係單人房，配備一張按摩椅，按時收費，RMB¥35/小時，不設低消。

另外三間屬於小型房間，只有布簾，可容納三至四人，日頭低消滿RMB¥150-160即可享用 (如果唔到低消又想坐房，需付RMB¥38服務費)

晚上係小酒吧形式，低消會較高，可自行查詢店家。

房間(1)

房間(2)

房間(3)

房間方便合同朋友傾下計，坐足幾粒鐘夠划算啊。我地平日黃昏前來，客人唔多，未知假日情況如何。

LazyPlanet懶人星球 

地址：深圳海田路卓越世紀中心3號樓B座3317 (地鐵崗廈/會展中心站)

其他深圳高空cafe介紹：

【我在38樓看風景】KONG 空    http://bit.ly/2BuQf54

Follow us:

Instagram: http://bit.ly/2g3ZtuS

Facebook: http://bit.ly/2gu1fIG

Blog: http://bit.ly/ywycarol

Contact us: mrmrsfoodhk@gmail.com

日暉酒店 Hotel MEZI

入住日期：2017/12/21-23

離開台中後，我地就回程往台北，喺揀酒店嘅過程都花左唔少時間，因為台北嘅酒店較台中貴一點。

接近西門町、台北車站嘅酒店，我地之前都有住過，好似捷絲旅、凱撒飯店等，曾經覺得價錢合理，但近年都漲價太多，差唔多800至1000蚊晚。

而家黎台北多左，加上捷運好方便，所以自從上次同朋友黎過，就冇特別再要求或者專注西門一帶嘅酒店。

上次住嘅樂客商旅，其實都可以，幾抵住，鄰近台大醫院站，行去捷運8分鐘左右，就算行去西門町都係15分鐘，當時book係500蚊/晚。

原本想預訂番相同嘅酒店，基本上所有網站都試過，都話滿房，唔知係咪已經俾旅遊團包左，唔再做散客生意呢。於是只好搵其他酒店。

最終咁啱得咁橋，揀左呢間日暉酒店（http://www.mezi.com.tw/），位處於樂客商旅嘅旁邊，同樣位於襄陽路。

選擇此酒店基於幾個原因：

1）房價合理，喺agoda預約，房價$500/晚，幾划算

2）位置襄陽路，鄰近台大醫院站。

3）睇過照片，見到酒店幾光猛，加上風評不錯。

由台中回程，選擇坐高鐵，一小時車程，舒適快捷。去到時仲未到check in時間，但可以先辦理手續、寄存行李，辦理入住手續迅速，無需支付按金。

酒店大堂幾有設計感，有啲似愛麗絲秘密花園嘅味道，地磚係黑、白色拼格，加上彩繪元素。唔算好大，職員有禮。

餐廳

我地大約晚上6點鐘番到酒店，房間已經安排好，預約嘅係最普通嘅、最便宜嘅房間，被安排到2樓低層。

酒廊都放有空氣清新機，感覺都幾乾淨，唔烏煙瘴氣

房間設計新穎，以黑、白作為主色，好似最近先裝修完咁。面積唔算好大，足夠打開29吋大行李箱。

大床旁邊有茶几、雪櫃，不過我唔係太喜歡有塊鏡子嘅設計，同床嘅距離太近。新款電視、燈掣等都好新淨，書枱旁邊就係洗手盤。

呢間酒店採用洗手間、浴室分離。

廁所有電子廁板，亦係自動，廁格夠闊落。

對浴室亦滿意，姑勿論用唔用得著，呢個價位都有浴缸，很不錯。

花灑係我喜歡嘅類型，高低、角度都可以調整。熱水充足，水壓夠大

供應沖涼液、洗頭水、護膚露。毛巾、地毯乾淨，有厚度，唔會話太殘，衛生ok。

風筒

用電子卡供電，所以離開時就會斷電，比較環保。（只有一張，其他卡係冇反應）

插座充足，床邊、枱邊都有，而且係三腳插，無需另帶轉插

洗手盤有塊可移動嘅鏡子，方便我呢類大近視。

睡床軟熟，被鋪乾淨滑溜，睡眠質素唔錯。

整體十分滿意日暉酒店，價錢合理，位置方便，環境不俗，職員親切，有需要都好快提供協助。

如果唔係首次黎台北玩，或者已經好熟悉路線，都推薦此酒店

日暉酒店 台北站前

地址：台灣台北市中正區襄陽路4號

Follow us:

Instagram: http://bit.ly/2g3ZtuS

Facebook: http://bit.ly/2gu1fIG

Blog:http://http://bit.ly/ywycarol

Contact us: mrmrsfoodhk@gmail.com