再窮都要去旅行！

MUJI Diner

用餐日期：2018/02/17

預訂無印酒店，每房包一份早餐，除左最大房型外，其他房型額外每份早餐要加RMB¥60。

Muji Diner對外開放，非住客亦招侍。但如果唔係住客，真係冇乜需要專程黎食餐飯

早餐由6:30-10:30am供應，呢個時間相信9成9係住客，午飯或者晚飯可能會有街外人嘅。入座時輕輕核對房號，程序未算嚴謹。

餐廳位置唔算多，我地9點半鐘落到去，過年期間依然滿房，人頭湧湧，兜左幾個圈先搵到張枱

早餐分中、西、日式，三選一份 (而事實上我見到有人係取多過一份)，另有少量麵包、水果、飲品、咖喱飯自取。

接近結束時間，我見職員都冇再refill，我地拎嘅牛角包都已經係最後一輪。

自助形式，自行搵位，餐具、點餐自取。

裝溝風格當然走無印風，客人頗多，新年期間有點人手不足，而職員都好無印風，唔夠快手快腳。

客人多，變相好多野出唔切，要即時製作，等候時間頗長單單排隊取餐已經等超過15分鐘，對早餐期望唔好太高，味道都算可以接受。

西式早餐、日式早餐

包括德國腸、沙律菜、炒蛋、煙肉，味道正正常常。

日式嘅有三文魚扒、甜蛋、豆腐、南瓜、菠菜等，三文魚扒有點老，甜蛋唔夠滑。

牛角包、巧克力可頌、小麥包

麵包自取，最受歡迎當然係牛角包，雖然唔係新鮮出爐，但都幾鬆脆又有牛油香

可頌口感一樣，入面仲有朱古力餡。食左一轉就冇哂喇。

飲品正常，有牛奶、酸奶、橙汁、冰紅茶等。

房間包括一份，另一份以60蚊人仔加配，真係普普通通，深圳有大把選擇。

吐糟：官網預訂房間，可以直接追加早餐，但入座時未有記錄低房卡取餐數，加上餐廳自由出入，變相有機會有人係冇加錢但有早餐食。

MUJI Diner

地址：皇崗路5001號深業上城一期2層240號

Follow us:

Instagram: http://bit.ly/2g3ZtuS

Facebook: http://bit.ly/2gu1fIG

Blog: http://bit.ly/ywycarol

Contact us: mrmrsfoodhk@gmail.com

Lady7 Cafe

用餐日期：2018/02/17

講到喺深圳食千層蛋糕，又點可以唔提Lady7，大家都心知肚明係LadyM的老翻吧。但因為有好多人覺得佢地嘅出品質素唔錯，所以番黎深圳玩，都可以順便食埋。

畢竟香港嘅LadyM都長期有人龍，加上地方唔夠闊落，有時又係食得幾無癮。好似海港城咁，我真係唔多願意係嗰位位置堂食。

如果較近深圳灣口岸嘅Lady7，可到歡樂海岸店，店面面積大，一共兩層，有室內外座位

不過今次人在會展中心附近按摩，所以就近近地行過去卓越in town分店，cafe面積都唔細，用白色為主調，配合雲石枱面，加上新年期間輕鬆包場，都幾舒服

見到凍櫃展示嘅千層蛋糕，基本上款式都可以喺ladym搵到，例如原味、伯爵茶、抹茶、玫瑰等都係熟口熟面，定價RMB   ¥ 28-58。

即使而家兌換率唔高，但折算後價錢都仲係比較便宜大概十零蚊。不過新春期間就收取10%服務費，平時就冇嘅，會抵啲囉。

伯爵茶千層蛋糕   RMB ¥ 48

有時喺深圳食千層，好多都好夠薄，但係太多忌廉，同食緊忌廉蛋糕冇分別，當中以Lady7真係算幾超班

一共25層，六寸高，賣相造型都同ladym有十足相似。忌廉抹得平均、綿滑，層次明顯，唔會成口cream。

入口有明顯伯爵茶香，班戟皮唔會粗糙，而且不會膩口

當然啦，要食其他口味就梗係食正貨，但如果好迷戀伯爵茶千層，又想回味，都可以喺7小姐一試嘅

至於呢個商場係咪好值得一來，我就打個問號，當然都有大家喜歡嘅喜茶、喜茶熱麥，又有lady7、園潤四季、dolls hub等。

商場就夠闊落，但店鋪選擇唔多，底層類似美食廣場，但餐廳質素都麻麻，唔會可以喺呢度spend到好多時間。

其他深圳嘅cafe介紹：

【我在38樓看風景】KONG 空    http://bit.ly/2BuQf54

【深圳一日遊】初代抹茶   http://bit.ly/2zMSQtF

【深圳一日遊】Line Friends Cafe & Store http:// http://bit.ly/2ibKKDB

【深圳一日遊】Dreamiya   http:// http://bit.ly/2jtKcoT

【深圳一日遊】ANDCAFE  http://bit.ly/2EOzEhJ

LADY 7 Cafe

地址：深圳福華三路與金田路交口卓越INTOWN購物中心一樓

Follow us:

Instagram: http://bit.ly/2g3ZtuS

Facebook:http://http://bit.ly/2gu1fIG

Blog: http://bit.ly/ywycarol

Contact us: mrmrsfoodhk@gmail.com