再窮都要去旅行！

一哥美食

用餐日期：2017/03/12

以往去澳門我地都比較「遊客mode」，去嘅、食嘅都係比較熱門嘅旅客點。最近我地去到比較頻密，所以都想一改呢個習慣，出發前都做定資料搜集，希望盡量食啲地道人介紹嘅美食。

講到澳門都不得不提水蟹粥，最出名難食嘅我就冇食過，so far之前食過幾間都唔錯。今次出發前搵左間都幾多人介紹、推薦嘅食店，打算作為last day晚餐。

一哥美食位於祐漢， 因為我地唔熟路，盡量跟住地圖行，但都覺得有少少難搵

去到附近一個街口，已經聽到火爐「冚冚聲」，可見佢地鑊氣十足。

週日八點鐘左右，客人不少，幾乎滿座，而且有唔少人等外賣，幸好有人剛埋單，我地先有位

一哥美食供應多款粥品、腸粉、小菜、炒粉麵、椒鹽菜等，定價唔貴，比較出名嘅係水蟹粥、腸粉。

一哥水蟹粥

本來佢地有碗裝嘅水蟹粥 ($73)，但我地兩個當然係眼闊肚窄地點左一窩。一上枱…真係好大窩呀 lol

面頭有大量生菜絲，粥嘅份量好多，隱約記得最後裝左成十碗…飽到我地…

水蟹唔算好大隻，有膏，但唔算係好多；蟹肉偏少、削。

一哥嘅粥底都依然係呈白色，粥底綿滑，但食落並冇想像中咁鮮甜，有少少失望。

但考慮到價錢比平時食平一半， 分分鐘夠四、五個人食， 都算係咁啦

鮮魷魚炒麵 $42

炒麵幾有鑊氣，唔會炒到好乾，食落唔油膩，調味恰當。 麵嘅份量都相當多，魷魚大大塊，好抵食！

叉燒腸 $23

腸粉皮比較厚身，一層一層咁，食落同香港酒樓嘅好唔同。

餡料亦都唔係話特別多，普普通通

炒菜心 $43

菜心油多，雖然呈嫩綠色，但食落較老、粗。（個人喜好啫，我地比較鐘意食菜心苗）

總括黎講，一哥美食定價合理，食物份量頗多。埋單連飲品$275，兩個人捧住個肚走

但可能我地期望有少少高，覺得水蟹粥冇所講咁出色。

壹燕糖

用餐日期：2017/03/12

壹燕糖位於福隆新街，係早年黎澳門幾乎必到嘅手信街，同時亦都係唔少遊客食翅嘅集中地，佔盡地理優勢。

不過近年遊客買手信都已經轉去大三巴、官也街等地方，食魚翅嘅人都比以往少，所以雖然我地黎過澳門幾次，亦都喺福隆新街影過唔少充滿懷舊味道嘅照片，但都唔知道原來有間挺有水準嘅甜品店。

壹燕糖顧名思義係以燕窩作為主打，定價親民，實行將燕窩平民化。

唔講唔知，原來老闆出生自海味世家，家族經營海味生意好多年，當中為人熟悉嘅就係附近嘅添發碗仔翅美食，所以壹燕糖取貨都係來自自家品牌，變相成本較低之餘，用料又有保證，難怪食落真材實料！

當然除左比較傳統嘅燕窩甜品，小店尚有其他特式糖水、小食，值得一試。

壹燕糖就位於福隆新街1號，門外保留街道嘅舊有風味。晚上黎到福隆新街更有味道，幾乎唔見遊客蹤影，我地都影左唔少相。

店內相當闊落，而且乾淨企理。由於時間比較夜，我地都係當日最後嘅客人。

甜品款式唔少，分燕窩系列、芒果甜品、傳統石磨糖水、中式糖水。另外有不同款式嘅小食，例如撈麵、蛋撻、豬扒包等。

椰皇燉官燕 $98

話明主打係燕窩，當然要試下佢地嘅招牌！

燕窩款式都有幾款，有椰皇、燉奶、更滋補嘅花膠燉燕窩等，價錢唔貴。燕窩可以選擇燕盞或碎燕，當然價錢有別，相差幾十蚊，豐儉由人。

一場黎到，我又唔係成日有燕窩食，當然係點燕盞，呢款椰皇燉官燕有足足一両燕窩架，相當足料！

如果選擇冰糖燉燕窩，相同價錢仲食到足二両燕窩，真係諗起都想食。

椰皇裡面滿滿係燕窩，由於原隻椰皇燉，椰子味相當強烈，老闆話仲加左椰子水、奶等材料，難怪味道咁清新！

燕窩足料唔洗講，睇番份量都真係相當抵食。喺香港食椰皇燉幾粒湯丸都六、七十蚊…

芒果腸粉 $32

芒果腸粉睇番評語都係必試系列，食過後都覺得不能錯過。

腸粉睇落已經好滑溜，而且做得相當薄身，用上椰汁製作腸粉皮，所以都帶清甜椰子味。

芒果肉雖然唔算澎湃，但微微香甜，唔會有甜水感覺，食哂都唔覺得膩。

鮑魚撈麵 (鮑汁/XO) $120

賣相好吸引！兩隻大鮑魚、撈麵、生菜，好豐富。由於我地食過晚飯，所以二人分享，份量剛好。

見我地大讚好味，老闆都解釋呢個鮑魚撈麵係佢地嘅招牌菜，由鮑魚、麵、調味等配料全部自己煮過，唔係現成貨，當中嘅誠意、功夫可想而知。

鮑魚大大隻，煮得腍身，食落爽口，鮑汁入味，唔係一般喺其他鋪頭食到嘅惹味！

麵嘅份量唔少，面頭有蝦米仔，食落唔腥。明明幾分鐘前話飽，但我同男朋友都忍唔住一口接一口。

燕窩薏米水 $25

食完鮑魚麵飲番杯薏米水，十分清涼。薏米水有利水祛水功效，啱哂女士。

總括黎講，壹燕糖嘅甜品都幾有水準，價錢合理，真材實料。如果有多幾個朋友一齊分享，可以試更多款式，特別推介椰皇燉官燕、鮑魚撈麵！

福隆新街係昔日澳門最繁華嘅街道之一，至今仍然保留舊貌，除左黎食糖水，仲可以感受下街巷獨有嘅特色。