再窮都要去旅行！

Frites

用餐日期：2017/05/04

西餐就食得多，比利時菜都係第一次食，呢間比利時啤酒屋喺港島區有四間分店，供傳統歐州美食同比利時啤酒。

當中最經典嘅菜式一定唔少得豬手、青口鍋、正宗比利時薯條。公司嘅總部都喺鰂魚涌 ，週四晚就喺呢間分店享用過滿意嘅晚餐。

食一餐飯，食物質素固然重要，但如果能夠喺舒適環境下用餐，一定會加分。Frites就係由食物、環境到服務都有相當水準。

餐廳位於濠豐大廈，交通相對其他分店冇咁便利。平日附近有唔少寫字樓上班族，所以平日都有午市套餐、早段晚市套餐供應。

到左晚上，呢邊相應靜少少，我地喜歡靜靜地同三五知己飲酒談天，就比較鐘意此分店。

裝潢明顯花過心思，參照傳統比利啤酒屋設計，用嘅係木枱木櫈，空間感足，坐得相當舒適，鐘意飲杯啤酒，亦都可以選擇坐吧枱。

原來平日下午3點至8點嘅happy hour時段，酒類一律以半價供應，$35/起就有杯啤酒，以呢個環境而言，好抵飲。單係香檳、啤酒、葡萄酒已經超過四十款，揭住menu都大開眼界。

我地入座稍遲，享用唔到呢個優惠

餐牌選擇豐富，有前菜、沙律、小食、青口、素漢堡等，主菜有意大利飯、肉腸、豬手、燒春雞、羊架、牛仔骨等，定價中上。

 Prawn and crab balls $80

先點一客小食，以攪碎嘅蝦、蟹肉炸成，配上沙律醬，係唔錯嘅佐酒小食。

份量都唔少，炸粉唔厚，蟹肉味突出口感有啲似薯波，但食多兩粒會有少少口乾。

Frties House Mussels $245/半公斤

店員介紹話，黎到Frties不得不點青口，話餐廳每月平均賣出5千公斤嘅青口，可見幾受歡迎。

一共六款口味，包括忌廉、hoegaarden啤酒、蕃茄、白酒、喇沙、地中海風味，份量可選半公斤/1公斤($395)，配薯條。

我地揀左比較穩陣嘅招牌忌廉青口，原煲上碟，賣相好吸引，味道都相當唔錯，鐘意食貝殼類嘅客人不能錯過

以蕃茄、蒜蓉、洋蔥、小蔥，加入忌廉汁煮成，半公斤份量都唔少呀，夠兩個人食。

男朋友本身對青口完全冇好感，因為一般都係雪藏貨，佢覺得好腥，平時都好少食，呢份係我第一次見佢讚好嘅青口，仲同我爭住食添

至於我，一向都好鐘意食貝殼類海鮮，有機會叫多幾個朋友一齊黎，會點1公斤

青口鍋熱辣辣，連蓋上，方便保溫。平時食得多平價雪藏青口，所以一食就知呢煲係新鮮貨，口感軟腍彈牙，完全冇腥味，吸收左濃稠適中嘅忌廉汁，唔會好膩，食完一粒接一粒。

青口而家唔係當造時節，所以size唔會好大粒，但都夠鮮甜肥美，好滿足

薯條係歐式粗薯，新鮮熱辣，配上蛋黃醬，不過不失。

配上自家製法國麵包，口感煙韌，猜想係煎過，食落香口，相對可能會有人覺得油份稍多，但我地就覺得好好食，特別係配少量忌廉汁，一流！

Tiger Prawn and Smoked Salmon Risotto $235

點左一客大蝦煙三文魚燴意大利飯，有兩隻大蝦，連同蕃茄粒、火箭菜、少量白酒煮成。

大蝦已去殼，方便客人食用，輕輕煎香過，蝦肉新鮮彈牙

意大利飯份量不少，調味微酸，唔會太creamy，所以清新不膩。裡面加入三文魚，煙燻味道唔強烈，反而俾我感覺似煮熟左嘅三文魚。

店員一直好細心，一路留意我地食到邊個stage，差唔多食完先上另一份主菜。

750g Roasted Pork Knuckle $245

我地點左想試好耐嘅招牌燒鹹豬手，配上焦糖燒雜菜，不得了，好吸引，份量足夠三至四人分享，都幾抵食啦

豬手已經起皮，豬肉亦都已經切片，方便食用。外皮燒到非常香脆，乾身唔油膩。

豬手肥厚，但肉質腍身唔韌，食落豬味突出唔羶，肉汁豐富帶咸香，相當出色

伴碟嘅係焦糖燒雜菜，同樣係加分位，因為齋食豬手可能會覺得有鹹膩，以瓜粒、薯粒可作緩衝。

Sweetheart

簡單而言就係利賓納味道~

餐廳我諗都係走中高檔路線啦，全晚播住8、90年代嘅經典英文歌，首首金曲，男朋友首首都識，好享受。"Girls just want to have fun"、"Making love out of  nothing st all"、"Right here waiting"…

因為當中有唔少個人回憶，陪佢長大嘅英文歌，佢就食歌食得好投入。當然啦，我地都有問過店員，佢話都有唔同歌單，咁啱我地呢一晚就播住熟悉嘅歌曲，令成餐飯感覺加分不少

 

環境、食物都有水準，店員服務殷勤，態度親切，加上平日晚上都比較夜嘅時間，客人唔多，佢都不時同我地傾下計。

據講餐廳週末仲有個「兒童天地」，方便一家大細嘅客人，大人享受食物，小朋友可以喺視線範圍內玩樂，諗得周到。

---

FRITES Belgium on Tap 

地址：鰂魚涌太古坊英皇道979號濠豐大廈地下

---

 

Follow us:

Instagram:http://http://bit.ly/2g3ZtuS

Facebook: http://bit.ly/2gu1fIG

Blog: http://bit.ly/ywycarol

Contact us: mrmrsfoodhk@gmail.com

Roofy Bar & Cafe

用餐日期：2017/05/08

位於山林道嘅小店集cafe同bar於一身，除左供應特色菜式，仲有多款比利時手工啤酒，最近特別係一班愛狗之人歡迎。

皆因呢度係香港少有可以帶狗狗內進嘅餐廳，店主、店員本身都有養狗狗，好有愛心，所以歡迎客人帶埋小毛孩去餐廳。

眼見狗狗一邊陪住主人，可能想食埋一份，所以店主仲安排左一款狗狗小食，等主人同毛孩可以一齊用餐。

小店位置唔多，但相當闊落，主人同毛孩都有足夠嘅空間，裝潢帶點raw味，磚牆、地板、綠色鐵皮門面都花過心思。

除左有室內座位，室外亦都提供兩張高枱，坐低食下野飲下酒都幾舒適。

當中唔少狗狗都同過小店嘅招牌 - roofy合照呢！roofy後面就係開放式廚房，抽風良好，唔會食完一陣味。

店主搜攞不少印有貓貓狗狗嘅碟，好可愛！菜單以平板電腦中嘅相簿顯示，圖文並茂，更加方便。

餐牌選擇唔算好多，但樣樣都有啲，有前菜、小食、沙律、意粉、焗飯、漢堡、扒類、甜品等，定價中上。

另外有多款飲品，例如朱古力、咖啡、奶昔、梳打等，當然唔少得一系列嘅手工啤酒。

最近仲新增優惠，週日至週三晚市時段，客人惠顧一客漢堡，加$80可於90分鐘內任飲指定生啤，幾抵架。

蒜香檸檬炒辣蝦 $110

以蝦仁加入蕃茄、煙肉粒、洋蔥等材料爆香，配以生菜包方法食用，食落惹味開胃，又減低油膩感。

蒜香牛油焗松葉蟹爪 $170

松葉蟹肉食落新鮮，唔會連著蟹殼，以蒜香牛油焗製，調味得宜，滲入蟹肉，配啤酒會係不俗嘅選擇。

炸燕麥雞翼

雞翼以燕麥包裹，加上香料，炸至金黃色，做法新鮮。炸過嘅燕麥唔會好厚身，相應冇一般炸雞翼嘅油膩感，咬落脆卜卜，但略嫌雞翼本身調味較淡。

經典漢堡 配薯條  $120

以美國特優漢堡扒8oz、蕃茄、沙律菜、芝士、雞蛋、貝果做成漢堡，份量驚人，更可按個人喜好加錢添加配料。

新鮮蕃茄、沙律菜等配料唔少得，芝士雖然已經熱溶左，但味道香濃。

漢堡扒厚身，煎得剛好，唔會過熟，保持到肉汁，口感一流。以貝果取代一般嘅漢堡包，凐韌軟腍，值得一試。

甜品有三款，我地試嘅係brownie。

Love Roofy $78

Brownie置於熱鍋上，加上綠茶雪糕，以百力枝、脆脆等作點綴，旁邊放抹茶醬嘅容器好搶鏡。

淋上抹茶醬後，食落冷熱交融，不過抹茶味道不足，濃啲更好。

玫瑰朱古力 $45

Cookies & Cream $56

玫瑰朱古力甜度適中，玫瑰味突出，味道唔會太假，朱古力味淡香，幾好飲。

曲奇奶昔打得好滑身，曲奇味重，但唔會太稠身或者太甜。

手工啤酒 $75/枝

店內供應多款手工啤酒，happy hour更有優惠價 ($50)，當中呢款啤牌啤酒呃like一流。

狗狗小食

逢週六、日供應狗狗brunch，我地就咁啱遇到有幾位熟客帶同毛孩，享用左呢set小食，狗狗見到小食超興奮呢！

Roofy係一間幾有特色嘅餐廳，試左幾款招牌都相當出色，各位狗主人可以帶埋小毛孩一試呢，除左享用食物，分分鐘可以傾下狗經。