再窮都要去旅行！

彩

用餐日期：2017/02/27

彩拉麵都算係元朗名物，一直都未試過，主要因為我地對沾麵興趣不特別大，二來又知道 彩 嘅人氣好高，要有心理準備等位先食得 

位置都真係幾隱蔽，如果唔係經常黎元朗，可能都要花時間搵。因為之前食過旁邊嘅甜品店 (HOME SWEET)，所以我地略有印象。

週一晚上7:50pm都已經有條小人龍喺店外，小店只有十一個位置，所以都有心理準備要等待一段時間。

換轉平日只有我同男朋友嘅話，相信我已經放棄左…不過約埋另外兩位朋友，就心諗，大家都想一試究竟，就點都俾啲耐性等下。

等左十幾分鐘，店員就先出黎問問客人想點邊款麵， 更容易控制時間。

一來客人需要再等候食物一坐低就有麵食，二來亦都可以節省門外客人嘅輪候時間。

彩 只供應沾麵，除左小麥麵外，每日都供應唔同味道嘅自家製麵條，我地當日就有黑胡椒、青辣椒兩種口味。

至於湯底，分別有沾麵、蝦沾麵、黑油沾麵。

最終45分鐘等待後，我地成功入座。

基本上距離師傅好近，煮麵嘅係日藉師傅。

空間唔多，但未至逼，起碼我同男朋友肉肉的，都坐得落。

小店一間，加上位置所限，以沾麵而言，定價親民。

餐牌簡單明確。

因為一行四人，所以各款湯底我地都試到，麵條則揀左黑胡椒、青辣椒。

青辣椒沾麵 $78 (已附有叉燒兩片、味玉、海苔、荀)

黑胡椒沾麵 $78

黑胡椒蝦沾麵 $83

黑胡椒黑油沾麵 $80

坐低冇耐就有麵食！

麵條、湯底分開上，麵條份量都多，感覺上多過平時食嘅拉麵。

〔青辣椒沾麵〕

麵條粗身，呈方型，口感有彈性，唔係實的的。

黑胡椒、青辣椒麵條如果配上湯底食，由於湯底味道濃烈，變相麵條味道唔會有明顯分別。

〔青辣椒麵條〕

〔黑胡椒麵條〕

湯底已附海苔、荀、京蔥，最欣賞係紫菜居然係店名「彩」，頗有心思！

原味沾麵湯底係三款當中最清淡，適合鐘意食沾麵，但又唔鐘意湯頭太重口味嘅人，即是我。

湯底質地唔算話好濃稠，依然呈湯狀態，單飲亦都唔鹹唔油膩，配上兩款麵條都唔會搶麵條風頭。

〔原味沾麵湯底〕

黑油沾麵湯底較原味湯底味道濃啲，單飲當然會比較鹹，但沾上麵條就剛好！

黑油味道濃郁，蒜香撲鼻，冇想像中咁油膩，但稍稍蓋過黑胡椒麵條嘅味道。

〔黑油沾麵湯底〕

朋友點嘅係蝦沾麵湯底，三款當中最重口味。

雖然唔會好似某啲沾麵店會擺明車馬以櫻花蝦鋪面，但飲落蝦味非常濃郁，朋友形容似有一百隻蝦喺湯入面

每口都感覺到蝦頭中嘅膏味！呢款適合重口味人士，湯底偏鹹，朋友就不停灌水喇。

不過我知道大部分人係好喜歡彩嘅蝦沾麵。

〔蝦沾麵湯底〕

叉燒兩片，雖然較薄身，但並非紙皮叉燒，肥瘦適中，肉質好腍，近似梅頭，而且入味，好食

味玉都係非常正，呈半熟狀態，流心度出色，連蛋黃都有醬油味，超滑溜，食落好滿足！

加錢嘅話都願意俾，更何況是每碗都已經有一隻！

最令我回味嘅，諗都諗唔到係隻蛋啊！

店內提供唔少日式飲品，我地揀左兩款比較特別，再加波子汽水。 

綠茶可樂、櫻花可樂、波子汽水 $18/枝

綠茶可樂冇綠茶味，較正常可樂冇咁甜，幾好飲。

櫻花味可樂冇櫻花味，但有怪味，而且甜度較高。

波子汽水唔洗評啦。

總括黎講，彩沾麵質素中上，價錢合理，80蚊有份量唔少嘅麵條，兩塊叉燒再連埋味玉，難怪位置如此隱蔽都依然咁受歡迎，長期維持人龍。

而家嘅小店好容易被傳媒/網絡力量影響，或者好容易能夠彈出，但能夠一直保持水準，先至係生意長做長有之道。

由於我唔係沾麵控，如果要我再黎排隊9個字，我就未必會喇，今次試過一次，滿足！

彩

地址：元朗建德街26號益利大廈地下14號舖

Follow us:

Instagram: http://bit.ly/2g3ZtuS

Facebook: http://bit.ly/2gu1fIG

Blog: http://bit.ly/ywycarol

Contact us: mrmrsfoodhk@gmail.com

FADO 花道葡萄牙餐廳

用餐日期：2017/02/18

花道(FADO) 位於比較早期嘅五星級酒店 - 皇都酒店M樓，曾經獲取唔少國際獎項，由知名大廚主理，大部分食材由葡國進口，客人可以一嚐正宗葡菜。

每次去澳門都會有意慾想安排食一餐葡菜，有名嘅試過，小店亦都試過，但過往經驗都唔太好，一係就餐廳食物質素一般，一係就價錢太貴。

而且葡菜好多時份量不少，假如人少，心思思想點多幾款菜，卻又食唔哂，好浪費。要數當中比較滿意嘅都係去年食嘅婆仔屋。

估唔到今次去嘅呢間花道葡葡牙餐廳都好有水準，特別咁貼地嘅價錢可以享受到美食、優質服務，值得一去！

花道(FADO) 仲供應午市餐單，兩道菜色每位$128，三道菜色每位$158，好似我地人少少又想淺嚐葡菜可以選擇午市。而且套餐不時轉換，每次去都有新鮮感啊！

我地今次就左花道(FADO)  嘅三道菜午餐：

餐廳裝潢簡約，空間感足。

我地被安排坐窗邊位置，自然光喺窗外透入，環境非常舒適。

人多嘅話仲可以預訂房間，私隱度高。

入座不久，客人都陸續開始多，所以即使係午市，都建議預約。

菜單定時轉換，可以自行參考官網，睇睇啱唔啱胃口。

餐單：(定時轉換，以官網顯示為準：https://www.hotelroyal.com.mo/tc/dining/fado )

我地選擇三道菜，收費為$158，包括餐茶。頭盤、主菜五選一，甜品則四選一。

點菜後，店員會送上餐前小吃，主要係自家製麵包。

手工麵包盤

以二人而言，份量相當豐富，印象中有四款，餐包微溫，配上牛油，差唔多係我獨力食哂。

不過見網上照片，應該之前係配上橄欖油，可惜今次我未能試到。

頭盤方面，共有五款，有沙律、菠菜湯、磨菇批等。

〔頭盤〕烤雞肉凱撒沙律

沙律份量比想像中多，烤雞肉都俾得大方，而且非常新鮮，如果沙律醬再多啲更好。

男朋友對沙律要求幾高，但都大讚好食！

〔頭盤〕磨菇菜心脆批

我點嘅頭盤係磨菇批，唔好睇少呢個批，我都以為小小一件，估唔到幾飽肚。

批中有大量磨菇，菇汁全被鎖住；批皮焗至脆身，牛油味香；菜心只選嫩葉部分，焗過後仍然嫩到我差啲以為食緊菠菜，推薦呢個！

主菜方面有較飽肚嘅意粉、飯、鱸魚，亦有輕食例如燒雞、烤豬頸肉。

〔主菜〕八爪魚飯

葡菜經常以八爪魚作為食材，但八爪魚飯我只係第一次食。

八爪魚飯雖然醬汁頗多，但食落唔會好滯，唯獨有少許偏鹹。份量適中，男士都剛好夠飽。

八爪魚份量不少，腍身得黎仍保留嚼勁，鮮味突出。

〔主菜〕脆嫩燒雞配薯片 

我點嘅燒雞份量明顯輕少，但由於頭盤豐富，感覺都係足夠；但建議男士可揀飯或意粉。

燒雞整體不過不失，肉質嫩，但唔夠滑，而且女仔食起上黎，唔係太方便。

旁邊嘅薯片，炸得好脆口，但唔會好油膩。

是日甜品款式比較普通，分別有朱古力蛋糕、芭菲、雪糕、水果，見曾經有人試過南瓜蛋糕，幾吸引，可惜碰唔上。

所以眼見當日都唔係好多客人點三道菜式，而選擇頭盤、主菜就算。

咁我地都一場黎到，即管試埋。

〔甜品〕雪梨雪糕

大概都冇人會諗到，雪梨雪糕係呈莓紅色。

個人認為比起稱為雪糕，呢兩球比較似係雪芭口感，賣相係好吸引，但味道不俗，小清新，配合少量榖物，增添口感。

〔甜品〕焦糖香草芭菲

香草味唔濃，面頭嘅焦糖有點不足，布丁軟熟，甜度適中。

飲品方面選擇較少，都係咖啡、茶，而且只供應熱飲。

〔飲品〕熱咖啡

好好飲講唔上，正常水準，但呢套杯碟令我欣賞左好一會，非常迷你，好可愛。

〔飲品〕熱檸茶

最後我見酒店餅房嘅葡式曲奇特價，仲買左幾盒番香港。

總括而言，花道(FADO)  嘅午市套餐確係非常抵食！

特別一提，部分菜式會由廚師親自喺客人面前主理，喜歡欣賞大廚烹調過程嘅，可以點相關菜式。

除左對食物有要求，用餐體驗都係重要一環，花道(FADO) 喺服務方面都有一定水平。

黎到澳門，想試正宗葡菜不妨考慮呢間喺皇都酒店內嘅花道葡萄牙餐廳。

餐廳網站：https://www.hotelroyal.com.mo/tc/dining/fado   裡面有詳細菜單及午市餐單