火鍋英雄
用餐日期:2017/10/07
雖然已經係十月,天氣仲係好熱,不過一年四季火鍋店都一樣受歡迎,位於銅鑼灣嘅火鍋英雄主打重慶火鍋,不論環境、食物、服務都很有質素,鐘意重慶鍋嘅朋友可以一試地道風味
京都廣場全棟大廈都有唔少食肆,火鍋英雄位於3樓,午市除左供應火鍋,仲有麵食、套飯,所以平日午市亦有不少上班族。
餐廳佔地頗廣,以卡座為主,座位間空間感足,以屏風相隔,可以隨時變身大枱,適合大班朋友聚會,坐得舒適
裝潢花過唔少心思,帶中國風,牆上掛左唔少字畫。枱面上已有餐具、紙巾及圍裙,更令我印象深刻係圍裙上嘅橡根圈,剛好我用得著,以免整污糟頭髮
餐牌供應多款涼菜、小食,湯底方面主打酸菜魚、田雞鍋、魚頭鍋、水雞鍋等,當然唔少得重慶麻辣鍋、花雕醉烏雞鍋等接近20款。
配料選擇多樣,定價中上,有海鮮、豬牛羊雞肉、丸餃、蔬菜、粉麵等,整體都十分有水準。
「英雄八盞」及醬料 $18/位
英雄八盞指嘅係涼菜,分別有涼拌青瓜、木耳、蓮藕粒、豆乾、四季豆、海帶、芽菜、花生,一般火鍋店淨係醬油花生都收十幾廿蚊位,個人認為呢八小碟幾有誠意呢
調料自取,陣容鼎盛,除左普通辣椒醬油蒜蓉,仲有白芝麻、榨菜末等。
二十五年陳年花雕醉烏雞鍋 拼 養生野山菌湯 $188
一上枱已經聞到好香花雕酒味,湯底非常足料,容易入口,除左有半隻烏雞,仲有紅棗、杞子、桂圓、黨參等材料,清潤滋補不油膩,缺湯水嘅我地覺得好滿意,忍唔住飲左幾碗烏雞肉多,淥完都保持嫩腍。
野生菌鍋底相對下淡,但一樣多料,裡面有大量菇菌。
本地手切肥牛頸脊 $268/小
牛頸脊即時手切,厚身起雙飛,非常新鮮,肥瘦均勻,食落牛味濃郁,嫩腍有帶嚼勁,一分錢一分貨
西班牙黑豚肉 $108
豚肉片整齊擺放,厚薄適中,唔需要淥好耐,入口爽脆不肥膩,連平時唔係太喜好豚肉嘅我都食左唔少。
新鮮鵝腸 $98
鵝腸清理乾淨,新鮮爽口,不過未至於好肥美。
手打鮮蝦滑 $68
蝦滑份量同一般火鍋店無差,食落爽口彈牙。
酥炸響鈴 $48
響鈴細細一條,比較幼身,即時炸起,入口酥脆。
鴨血 $38
鴨血一大份,入口滑溜。
秋葵 $28
平時比較少喺火鍋店見到秋葵,淥過嘅秋葵都幾入味,而且幾爽口。
四川紹粉 $28
比起薯粉,紹粉比較粗身,有啲似平時食嘅河粉,淥完之後呈半透明,食落黏身,冇薯粉咁爽,但一樣好煙韌,如果配上麻辣鍋相信會更加正。
洛神花茶、鮮蘆薈 $28/450ml
火鍋英雄環境舒適,食物質素挺高,我地點嘅配料基本上都好新鮮對辦,服務方面亦值得一讚,店員細心有禮,主動加水、換碟、走油
優惠時段 - 午市火鍋 11:30am-5pm/9pm後:8折(海鮮除外)
下午茶時段 - 麵點、涼菜:8折
火鍋英雄 Hot Pot Hero
地址:銅鑼灣駱克道491-499號京都廣場三樓
Follow us:
Instagram: http://bit.ly/2g3ZtuS
Facebook: http://bit.ly/2gu1fIG
Blog: http://bit.ly/ywycarol
Contact us: mrmrsfoodhk@gmail.com
留言列表