丸作食茶
用餐日期：2017/11/25, 12/10
下月中去台灣，本來而家想少飲台式野，準備去到大飲特飲
月尾行過，見到【丸作食茶】，原來準備開業，幾有興趣，諗住之後黎！新開張仲有9折，飲料控即試！
來自台灣嘅人氣茶店(?)，第一店選址銅鑼灣，裝潢參照台灣店，從玻璃房可以見到店員，即場製作珍珠，透明度高
店內分排隊買飛同取飲品兩條隊，剛開張，等候時間唔長，遲下有人報導的話，就唔敢講了(笑)
餐牌供應原茶、拿鐵、奶茶、抹茶、黑芝麻等特飲，定價$14-28，可加配手作奶蓋、珍珠(5款)，定價$5-6。較特別有竹炭、黑芝麻同仙人掌口味，冰、糖度可自選。
手燒焦糖奶茶 加焦糖珍珠 $23 (9折 原價$26)
甜度固定，個人認為都唔會過甜，可以接受。焦糖味突出，幾香，奶茶夠順滑。
焦糖珍珠橙黃色，唔會太甜，味道自然，幾啱我地口味。口感煙韌帶黏，又有嚼勁，似噍緊軟身嘅橡皮糖
珍珠份量大方，不過建議少冰，否則會卡住珍珠。
如果影相效果突出，一定係揀黑洞拿鐵，黑白配，型。（事後見過網上評語卻話味道一般，哈哈）
宇治抹茶拿鐵 加仙人掌珍珠 $28 (9折 原價$31)
有第一杯嘅經驗，今次點左微冰，珍珠唔會俾啲冰卡住，又怕太甜，所以點左微糖。
但唔知同奶量有冇關係，我呢杯抹茶拿鐵嘅鮮奶層好少，其他人嘅奶層有接近一半。
抹茶味道有，帶微微茶澀，不過茶粉融合得不太好，入口唔夠順滑。可能因為奶層少，跟抹茶混合後幾乎冇一絲奶味
至於仙人掌珍珠，呈紅紅地色，透透地明，份量大方，比第一杯試嘅焦糖珍珠淡得多，要好認真噍先有少少酸味，口感煙韌帶黏，又有嚼勁，會再試埋其他口味嘅珍珠。
二訪係因為上次買兩杯飲品有抽獎機會，抽中左【買一送一】優惠券，於是再黎試試其他款式。
其實佢地當日都做緊【買一送一】優惠，不過我去到時100杯限額已售完。條隊排左廿分鐘，等飲品唔洗十分鐘，涼涼地我特別好耐性，又唔覺得話等左好耐
琥珀鐵觀音+奶蓋+黑芝麻珍珠、白玉珍珠 $27
因為茶底只需14蚊，加左3樣野都係27蚊，上次拿鐵不討我歡心，加上個人鐘意茶飲，於是揀左鐵觀音底，可惜呢度嘅茶香一般
始終沖定哂，同用單個茶包沖泡，有一定嘅分別。
奶蓋並冇好似而家流行嘅茶店咁，做出可以傾斜飲嘅杯子，取飲品時問過店員，佢地話原本係冇奶蓋的， 只係見香港人幾鐘意而加入，所以並冇特製杯子。
其實大可以好似KOI咁，喺杯邊界開。不過講咁多野，我都唔建議試奶蓋
奶蓋唔厚亦都唔算稠，奶香一般，反而係非常之鹹，太鹹sick（去到底完全唔想飲，搞到我淨番啲珍珠都冇食哂）
因為上次試唔到黑芝麻珍珠，今次決定一黑一白，混搭白玉珍珠。
黑芝麻珍珠味道超濃郁，好似食緊芝麻糊，甜度適中。但比較霸道，基本上我全杯野只係飲到黑芝麻味 (但我幾鐘意的)。
至於白玉珍珠，甜甜地冇啥特別。珍珠口感係我鐘意的，煙韌有咬口
香港愈開愈多茶飲店，但要搵一家有質素嘅都唔易。
丸作食茶
地址： 銅鑼灣禮頓道138號希雲大廈地舖
Follow us:
Instagram: http://bit.ly/2g3ZtuS
Facebook: http://bit.ly/2gu1fIG
Blog: http://bit.ly/ywycarol
Contact us: mrmrsfoodhk@gmail.com
吃貨夫婦 (51)
