再窮都要去旅行！

鮨豊

用餐日期：2017/11/10

潮流與即興，連帶近年飲食文化都興起Omakase，意思是廚師發辦，最適合有選擇困難症的朋友。

據說Omakase也是日本料理的最高境界，食客食的是掌廚的經驗及對食物配搭的品味與要求。雖然不問菜單，不問做法，但隨時能食出驚喜。
今晚來到這間天后隱蔽小店，據介紹餐廳老闆自營日本海產分銷生意，餐廳食材近乎每日由日本築地空運來港，故此食材能保證高質新鮮。

小店面積唔大， 全店二十多個位置，裝潢富日本風格，以木枱為主。 既有幾個吧枱，亦有卡座，如果想直接同師傅有交流，當然係選擇坐吧枱

卡座之間用竹簾隔開，枱與枱間空間感足，唔會話你眼望我眼。

餐牌供應一款套餐，包括前菜、壽司、小食、海鮮丼、湯、甜品，定價$800/位；另外當然可以選擇廚師發板，定價$880/位，包括冷砵、前菜、壽司10件、手卷、湯及甜品。

星期五晚上黎到，吧枱位置已經全被預約，對於位置我地要求不大，坐卡位亦都冇問題。如果鐘意坐吧枱，睇住師傅製作過程，或者喜歡同師傅交流下嘅客人，建議盡早預約位置。

當晚應該係幾個熟客，似乎都經常光顧，同師傅傾得不亦樂乎。睇過餐牌後，決定同男朋友點兩份「廚師發板」就好了，不傷腦筋之餘，又充滿期待感。

前菜

松葉蟹起肉，份量不少，入口啖啖蟹鮮；鮟鱇魚肝口感有少少似鵝肝，味道香濃，加醋調味唔會好膩

壽司10貫

白松露車海老

造型好有霸氣，車海老食落爽口，有少少白松露喺面頭，配搭新鮮

秋刀魚

本來都擔心秋刀魚會有腥味，點知味道濃郁冇腥，搭配少量薑蓉，肉質富彈性，魚肉鮮嫩

鯛魚

肉質薄身較黏，魚肉透明，味道清雅，魚味唔會太濃。

赤貝

新鮮大塊，外面爽脆，貝肉軟腍，一般日本料理要食到呢種刺身，價錢都唔平

鰤魚

第一次食呢種魚，帶微紅斑紋，口感柔軟，油脂豐富。

拖羅

我地第一件食呢件，極具驚喜，油脂豐富，咬落口兩邊油脂溢出，入口即溶，令我地好回味

吞拿魚蓉手卷

卷成長形，吞拿魚蓉突出，同飯量平衡，包到最尾，唔係白飯手卷，面頭加有少量芝麻。

吞拿魚蓉軟綿而滑，芝麻好香，為魚蓉提鮮，一路食一路有魚蓉喺手卷尾部爆出，可見份量大方。

為免紫菜變腍，上枱就盡快食，非常滿足，食完一件好想再食第二件。

喜知次

生長於深海，產量唔多，屬頂級魚獲，任何做法都好食。肉質軟綿細嫩，魚味濃郁，果然係魚王

貝

入口爽脆鮮甜，不過係眾多壽司之中難免顯得冇咁亮眼。

金目鯛

屬於矜貴魚種，新鮮肥美，魚味愈嚼愈突出。

蛋

以蛋漿、魚肉、蝦肉焗製而成，驟眼睇落好似蛋糕，兩邊金黃色，口感綿密，而且味道鮮甜，非常美味

立魚湯

魚湯鮮味十足，濃郁唔腥，肉質嫩滑，裡面料多，日本豆腐唔洗講實滑溜。店員仲同我地講，湯碗裡面嘅畫花係人手繪製，價值不菲，我一路食都驚啊(笑)。

紅豆抹茶奶凍

奶凍比較厚實，奶味重，抹茶味道唔算好出。

哈蜜瓜

瓜肉汁豐富，口感軟綿，甜度天然，非常滿足。

三家村水產

用餐日期：2017/11/09

浜燒係日本沿海居民嘅飲食文化，會將捕獲嘅海產喺碼頭即燒即食，香港嘅鯉魚門最近都開左一家主打浜燒嘅日本料理， 佔地三千幾呎，每日供應多款由日本、本灣等各地引入嘅新鮮海產，以最原始嘅方法浜燒黎食。

裝潢方面，都係落足本，甚有日式風味，令人諗起日本嘅浜燒店。因為餐廳位於三家村碼頭旁，黃昏時候前往，更有機會一邊用餐，一邊睇到海景、日落景色

餐廳位於碼頭，位置闊落，近門口位置可以見到擺放魚缸同冰櫃，擺放當日新鮮運到嘅海產，菲律賓石蟹、花金鼓、池魚、日本生蠔、花竹蝦、各款貝殼類等。

客人可以親自去揀選，明碼實價，食得放心（豐儉由人）

裝潢方面花過唔少心思，用上木、竹等元素，具日式風味。人多嘅可以考慮預訂房間，更近海邊，不過我地就冇問及房間最低收費。

餐牌供應沙律、前菜、時令海產、刺身、壽司、丼飯、烏冬、燒物、炸物、甜品等，定價中上。

海膽鮮甜冇腥味，口感綿滑，夾埋脆口紫菜，連平時唔好海膽嘅我都食唔停口

帆立貝、油甘魚柔軟鮮味，基本上對呢八款刺身嘅新鮮度無需懷疑

壽司：海膽軍艦 $70/件、香蔥吞拿魚腩軍艦 $45/件、蟹籽軍艦 $35/件、黃金魷魚軍艦 $35/件

天婦羅海老卷 $160

生蠔 $40/隻

日本生蠔都幾大隻，蠔身燒到脹卜卜，軟滑多汁，鐘意食蠔嘅朋友不能錯過，定價合理

帆立貝 (浜燒) $98/隻

即時剪開左，每份依然係好大隻，一口放入，口感豐滿，貝身軟腍，不過就冇想像中鮮味相對之下，生蠔更加抵食。

中蝦 (浜燒) $168/4隻

馬刀貝 (浜燒) $118/4隻

燒油甘魚骹 $120

雖然平時唔係好鐘意食魚頭、魚骹，但十分推介呢款油甘骹，簡單鹽燒已經好香，魚骹冇細骨，而且魚肉好嫩滑，魚油豐富，完全唔乾

清酒蝴蝶蚌 $188/8隻

炸白飯魚乾 $48

岩鹽枝豆 $45