Goobne Chicken
用餐日期：2017/10/21, 10/28
Goobne Chicken係香港數一數二嘅人氣烤雞店，佢地嘅烤雞不經油炸，外層薄而香脆，雞肉嫩滑而不油膩，因此都喺短時間內開設多間分店。
其中銅鑼灣店位於登龍街，位處高層，日頭天氣好、日落、入夜景色真係幾正。餐廳佔地頗廣，相對其他分店闊落，坐得舒適。
裝潢簡約，但又有格調，特別配上大玻璃，視野廣闊，環境滿分。
餐牌選擇豐富，有鐵板雞、烤雞、年糕、部隊鍋、魚糕湯、沙律、雞蛋卷、豬肋骨等，仲有埋韓式雪冰，定價中上。
食韓國野最好都係一班人黎，一來烤雞份量多，可以分享，二來消費冇咁高。
因為呢間分店比較大，所以枱面上都一個按鈴，有需要可以按下。
蜜糖咖喱烤雞 $185
烤雞有多款口味，例如原味、韓式BBQ醬、甜辣、果味蒜香、黑椒、三重芝士等，$165-$208，部分口味可選擇雙拼，人多嘅話可以方便試多幾款。
炸雞同烤雞二選一的話，我都係毫不猶疑揀後者的，Goobne嘅烤雞強調不經油炸，反而用烤嘅方法令雞保持香脆口感，雞肉嫩滑，而且不含反式脂肪
先不講食烤雞食得健康咁誇張，至少冇炸雞咁油膩，自我感覺良好 
一份烤雞約有12件，雞件睇落勁吸引，餐廳提供手套、濕紙巾等客人食得方便點。雞皮烤至香脆，薄薄一層，完全唔會有油膩感。
雞肉咬一口，依舊嫩滑，外脆內嫩，質素確實不錯。味道方面，雞皮有香甜蜜糖味道，仔細嚼會食到咖喱味，唔會太濃烈，亦都唔會辣，相信係一般人都會喜歡嘅口味。
附上一小碟醬汁同蘿蔔，食哂一份都唔會覺得好滯
芝士炒年糕 $165
呢份都係我地幾乎每次黎都會食的，芝士炒年糕份量都幾足，裡面有麵、年糕、雞蛋、魚糕片，加入大量芝士，用鐵板上，熱辣辣。
年糕條幼身，煮到煙煙韌韌，好美味。魚糕則比較厚啲，幸好粉感都唔重。麵嘅份量唔多，兩個人分享足夠
味道方面甜甜辣辣，醬汁唔會太多，芝味濃郁，雖然價錢唔平，但確實幾好食
韓式雞蛋卷 $148
雖然只係雞蛋卷，價錢又唔平，但真係幾好食，而且都算係食過咁多間韓國野之中，比較好食嘅雞蛋卷。
煎雞蛋卷裡面有黃瓜、蘿蔔、午餐肉、芝士、紫菜呢啲材料，其實好簡單，但我試過自己做，當然冇人地做得咁好食。
外面嘅蛋都煎得唔老，略嫌乾身左少少。材料多，口感豐富，黃瓜、蘿蔔爽口。芝士份量唔多，但芝味濃郁，另外附上嘅沙律醬汁帶少少辣，可以解決雞蛋卷有啲乾嘅情況。
砂鍋魚糕湯 $150
魚糕湯定價同一般連鎖韓國野差不多，但魚糕嘅份量都幾多，而且有數款，有偏身嘅魚糕片、有餡嘅魚糕等，裡面仲有幾粒丸。
湯底清甜，唔會太鹹，飲落暖笠笠，因為只係加左幾片紅、青辣椒，辣度唔高，一般人都食到。魚糕嘅質素都唔錯，粉感唔重，亦都幾彈牙。
芒果雪奶冰 $88
一共有五隻味，紅豆牛奶、芒果、士多啤梨、綠茶、朱古力曲奇，樣樣都想試，掙扎下揀左芒果。
店員提我地，因為雪冰製作大概要15分鐘，所以最好預番少少時間，差唔多食完主菜先點，就啱啱好，好細心。
雪奶冰嘅賣相都幾吸引，外型睇落有少少似金元寶。雪冰嘅份量都好多，兩至三個人share剛好
雪糕係普通品牌，冇乜特別。芒果粒分佈平均，雖然唔係好大粒，但入口香甜，而且呢個size方便食用。
冰嘅面頭淋上大量奶漿，啖啖都有味道，亦都考慮到會唔會食食下冇味，所以喺中間都有唧到奶漿，唔會冇味。
柚子沙冰 $58、藍橙沙冰 $58
個人係非常唔建議點飲品，一來價錢唔平，二來味道真係不怎麼樣，甜度太高
呢間分店環境真係唔錯，週末客人不少，入座時限 90分鐘，上菜夠快，時間足夠有餘。
Goobne Chicken
地址：銅鑼灣登龍街18號V Point 25樓
Follow us:
Instagram: http://bit.ly/2g3ZtuS
Facebook: http://bit.ly/2gu1fIG
Blog: http://bit.ly/ywycarol
Contact us: mrmrsfoodhk@gmail.com
【深圳一日遊】初代抹茶 
吃貨夫婦 (51)
