再窮都要去旅行！

桃李溪中式概念餐廳

用餐日期：2017/07/08

早年北上消遣都仲係停留喺福田、皇崗兩邊，只係近來發現深圳灣比較方便，所以先多左去南山區。

事隔一個月終於再寫起深圳遊嘅分享，真係一直拖到人都顛了

桃李溪中式概念餐廳係男朋友喺網上見到評語不錯而提議一試的，價錢唔貴。位於購物公園，指示唔係太清晰嘅關係，我地都搵左好一陣子

餐廳裝潢簡單，以原木色為主調，如果唔係下雨天，亦可選擇坐室外，室內位置都幾多，乾淨企理，不過二人枱面積偏小。

呢間係專門做創意料理嘅餐廳，由菜名到擺盤都幾古靈精怪，餐牌主要供應湖南四川菜，偏重口味，普遍以辣為主，好啱我食

菜單唔算選擇多，有小食、沙律、小菜、燉湯、碟頭飯等， 定價RMB¥20-68。

另外供應幾款套餐，類似團購形式喺大眾點評購買優惠券，但店員表示我地都可以照點，彈性高。

作為參考呢個係6人餐內容：http://t.dianping.com/deal/23775877

六人餐  RMB¥348  (前菜1份、主菜6份、素菜2份、飲品6杯、人頭飯)

雖然一行七人，點左六人餐再額外加兩款小菜，份量都非常足夠，最後人均大概  RMB¥80

部落衝突 (秘制香辣翅根、特色薯片沙律)

本來係6隻雞脾仔，但我地有7個人，店員表示可以做多隻俾我地，哈哈。

以7隻雞脾仔圍住中間嘅甜筒，雞脾係即炸，皮脆肉嫩，食落唔乾，帶少少辣味，雞控好滿足薯片沙律冇乜特別。

炒雞可愛 (秘製醬炒雞腿肉、 鵪鶉蛋小雞)

名符其實真係幾可愛嘅，以三粒鵪鶉蛋做成雞仔樣，配合菜絲好似喺草地咁，墊底嘅係雞腿肉，炒得乾身，切得比較細粒，味道有少少似三杯雞，微微香辣，幾惹味

酸辣甜筒 (酸辣牛肉)

用牛肉加入雜豆、辣椒炒成，配上4枝甜筒。牛肉炒得香口，肉質嫩腍，酸度一般以辣為主，容易入口，後續辣勁頗強烈

椰香排骨 

個名就普普通通，但造型都幾浮誇，做法類似糖醋排骨，加人切條椰子肉炒成，配上半個椰殼上碟

甜酸度唔會好高，呢味餸反而唔係太重口味。

椰肉有咬口，但未必個個會喜歡咁硬嘅質感，最好盡快食，以免變得愈硬。排骨正常水準，不過一貫國內肉少骨多嘅問題

綠野仙蹤 (西蘭花、黑白雙菇)

店內都供應少量素菜，雜菇加入蝦仁，用上西蘭花伴碟，味道唔會差，只係油份略多

宮保雞丁

有別於一般食開嘅味道，比較濕潤，而非搶炒。雞肉用上雞胸部位，雖然唔算嫩滑，但送飯一流

有機菜花

份量都幾多呢，有雜菜、唐芹。

鮑汁雜蔬

牛油果蔬菜沙律  RMB¥36

沙律菜新鮮，加入胡麻醬，幾開胃。

椒絲魷魚 RMB¥38

推薦呢個！魷魚炸至酥脆，香口惹味，辣度適中，新鮮魷魚爽口。

梅菜扣肉 RMB¥38

呢個不對板啊，扣肉較肥膩，炆得唔夠入味，以梅菜墊底，茨汁一般。

雖然一行七人，點左六人餐再額外加兩款小菜，份量都非常足夠，口味整體都唔錯，最後人均大概  RMB¥80

桃李溪中式概念餐廳

地址：中心二路購物公園北園A區143號 (購物公園店Exit D)

Follow us:

Instagram: http://bit.ly/2g3ZtuS

Facebook: http://bit.ly/2gu1fIG

Blog: http://bit.ly/ywycarol

Contact us: mrmrsfoodhk@gmail.com

火薈中日火鍋 Flaming Pot【二訪】

用餐日期：2017/08/08

今次係我第二次黎呢間火鍋店喇，記得對上一次印象都非常好，由環境、食物質素、服務到臨走我「參觀」埋店家嘅洗手間都非常滿意

餐廳位於酒吧街果邊，以前就旺，而家大不如前，唔知係咪因為咁，呢間火鍋店客人唔算好多，所以我地都冇預約，直接walk in。

餐廳喺1樓，個人認為裝潢幾靚，相當闊落，四人枱位置充足，而且客人唔多，唔催唔趕，真心坐得舒服

亦有房間，雖設最低消費，但問過定價合理，人均消費二百左右就坐到，日後有聚會都要提議朋友黎呢度。

火鍋選擇豐富，湯底都有十幾款 $68-$298，沙嗲、麻辣、胡椒豬肚雞、冬瓜瑤柱蛤蜊、蝦兵蟹將等。配料有肉類、海鮮、刺身、自家製手打丸、餃類、一般火鍋配料、粉麵、蔬菜等，定價中上，但質素甚高。

佢地都有套餐供應，三款定價每位 $208/268/298，另收茶芥($10/位)、醬油($15/位)、加一服務費，連埋飲品人均三百起，包湯底、牛、海鮮、丸類、餃類、滑類、蔬菜、粉麵等，上次我已經試過最平果個餐，其實相當抵食兼飽肚。

三文魚 (免費)

只要like店家嘅facebook就有三文魚剌身送呢，按者有份，雖然係免費，但質素唔曳 

胡椒豬肚雞鍋 $138/半隻雞：

推介！胡椒味非常突出，裡面加有酸菜，成個湯底好惹味，頭一輪我覺得可以飲用完先打邊爐，唔會太鹹，之後加湯就唔好喇。

豬肚爽口，最正係果半隻雞，朋友們都大讚好食，因為完全唔老唔韌，非常高質，相信唔係冰鮮貨嘅質素，啖啖肉而肉嫩滑

頂級安格斯牛頸脊 $198/中

上次我食套餐，包嘅只係雪花肥牛，但質素真係唔差；今次自己點，就點左靚少少嘅牛頸脊，果然冇失望

牛肉份量唔多，肥瘦雙隔，手切雙飛，食落會比較厚身，口感一流帶嚼勁，牛味濃郁

手打雙拼丸 $78/8粒

呢度嘅丸類又係另一樣我覺得必點的，當然係揀左手打蝦丸、手打墨魚丸，真係好好食丸類十分大粒，食得出係手打貨，特別推薦蝦丸，食落啖啖蝦肉，好新鮮，係我食過最好食嘅蝦丸三甲

墨魚丸一樣正，爽口彈牙，有墨魚味，完全冇粉感。by the way，雙拼抵食過單拼其實我想講，蝦滑同墨魚滑都一樣出色，蝦味墨魚味都明顯，真材實料，留待下次人多我地再點。