再窮都要去旅行！

Uptop Bistro and Bar

用餐日期：2017/08/01

睇過N咁多個人介紹呢間餐廳推出嘅tea set，由摩天輪、櫻花到早前嘅薰衣草主題，一直都覺得非常吸引，估唔到未試到下午茶，先試晚餐，並且覺得挺有水準，性價比高，相信會回訪。

餐廳位於珀薈酒店，唔係睇人介紹真係唔知，位置唔多，裝潢冇乜特別，一般西餐廳格局，勝在位處19樓，加上落地玻璃窗，客人可以望住靚景用餐

喜歡坐戶外嘅客人亦可以喺天台用餐、飲野，環境舒適，如果天氣涼啲會係一個很好嘅選擇

餐牌會按季節時令食材轉換，今次試嘅係佢地上個月開始推出嘅【夏日鮮果薈】套餐，一共五道菜，於菜單中加入水果。

喺西餐中加入水果，聽起上黎並非不可行，但起初以為都會有點勉強，點知食落頗有驚喜，配搭得宜

夏日鮮果薈晚餐 $388/位

套餐包括頭盤、餐湯2選1、蝦肉墨汁意粉配木瓜蓉、主菜5選1、甜品3選1，於openrice平台預訂位置，晚市不論套餐定單點餐單，都有75折，真係抵食呢

鮑魚牛油果柚子熱情果沙律

初時仲以為係雜菌…囧，食落咁爽口，原來係南非網鮑片(笑)。雜菜沙律中加左蕃茄仔、甘柚、牛油果，新鮮豐富，面頭嘅熱情果沙律汁酸酸甜甜，十分開胃。

椰子紅棗清湯

餐湯可選椰子紅棗清湯 / 青蘋果西芹忌廉湯，作為中湯怪，兼平日缺乏湯水，當然毫不猶豫揀前者，食西餐可以飲到中式湯水好感動。

用上椰子肉、紅棗、杞子、豬膝等材料熬成湯，清得黎滋潤感重，女士飲一流

餐包

裡面有烘多士、麵包球、竹炭包，加上黑松露牛油，我地輕鬆食哂。

蝦肉墨汁意粉配木瓜蓉

份量唔多，每人一駐仔，面頭嘅蝦肉經白酒爆香，細細粒夠爽口。最有誠意係墨汁意粉，出街食一般都係用墨魚汁撈落意粉變成烏卒卒，但呢度嘅意粉係現成墨汁意粉，唔會食到個咀黑媽媽兼屙黑色便便。

而且做法新鮮，撇開一般嘅白酒煮、忌廉煮等，用上泰國木瓜蓉，食落甜甜地，俾多幾碟我都食得哂。

主菜有五款，主要食材係豬架、鴨胸、三文魚柳帶子、羊架、安格斯牛柳，配合鮮果薈主題，各自配上不同醬汁，例西梅汁、蜜桃砵酒汁、番石榴蓉等，非常特別，擺盤精美

煎三文魚柳及帶子配番石榴蓉

厚切三文魚皮煎至香脆，食落唔乾唔腥，輕輕用黑椒調味，已經好食到爆。帶子雖然係薄片，但烤到剛熟，新鮮爽口。

伴有用藜麥、芝士製成嘅意大利飯餅，煎到香脆好似一塊薄身薯餅，搭配番石榴蓉、柚子汁，清新不膩

澳洲安格斯牛柳配焦糖菠蘿 (+$58)

安格斯牛柳要補錢先食得，牛肉控不能錯過。牛柳先經慢煮後燒，外皮香口唔濃，肉質呈嫩紅色，有光澤，食落柔軟冇筋，簡單配以燒汁突顯肉味。

墊底嘅係厚身焦糖菠蘿，鮮甜帶牛油香，令人欲罷不能。最後連烤蘆筍我都一口清，並一邊大讚好食抵食

香橙朱古力慕絲蛋糕配香橙雪芭

甜品3選1，都係以果味為主嘅crumble、慕絲蛋糕、芝士蛋糕。

估唔到連香橙朱古力慕絲蛋糕質素都唔錯，慕絲順滑半溶狀，朱古力味香濃，蛋糕鬆軟，加上雪芭，作為全晚總結，十分滿足。

3 Citrus iced tea、Venetian sunset $78

相對食物嘅出色，飲品顯得冇乜特別啦，呢兩杯酸酸甜甜，清新解膩。 

呢段時間天氣太熱，但我地都上左天台去望望，環境真係唔錯，如果天色清，個view係幾好。

食物水準基本上由頭至尾都係讚，雖然話係精品酒店規模，服務員一律專業有禮，我地就食得好開心有興趣可以預先訂位，反正有折。

Roseate Castle

用餐日期：2017/07/31

有留意開唔同社交媒體，不難發現呢間新嘅玫瑰主題餐廳，講到主題餐廳，可能好多人都會覺得環境行先，本來我都以為只係間裝修靚靚嘅cafe，不過呢度賣嘅除左係環境，仲係食精緻嘅法國fusion菜。

餐廳位置唔算好多，最好都係先行預約。裡面佈置成城堡，以玫瑰花為主調，偏白燈光，幾幅玫瑰花牆輕鬆成為打卡熱點，地面鋪有草地，枱面放有玫瑰乾花瓶。

而較亮眼嘅當然係正中心嘅鞦韆、角落嘅「鳥籠位」，仲有轉角嘅拱門設計，用上大量玫瑰裝飾，雖稱唔上精緻，但不至於俗氣，相信大部分人都同我一樣，係被咁少女嘅裝潢吸引而來

雖然係全新嘅餐廳，不過椅背嘅舊有痕跡清晰可見，而可能尚在試業階段，店員亦比較清澀，未及時交入座後提供清水，亦未見餐巾可能遲一步穩定落黎再體驗。

平日晚上加上新開業不久，客人唔多，只有兩三枱，情侶、少女們大可以放心影相。

晚市供應套餐，包括前菜、頭盤、湯、前菜、主菜、甜品、飲品，定價 $298-528，喺旺角區而言屬頗高消費。

據店主所言，未來會陸續供應單點款式食品，到期時可按胃口決定單點還是套餐，更具彈性。

煎日本帶子配臘腸、菜莆及粟米蓉

帶子煎香兩邊，新鮮肥美，不過如果唔係睇番餐牌，都唔覺食左臘腸、菜莆同粟米蓉 (笑)

黑魚子醬雞胸

好似風乾脫水嘅雞肉咁，未至於嫩滑，但都唔乾身，純粹以黑魚子調味，不過都唔單調。

三文魚他他及薄切生牛肉片配自家製泰式汁

作為頭盤，都幾開胃，仲令我地諗起另一間位於銅鑼灣嘅法國菜餐廳呢。

餐湯：洋蔥湯、麵包

洋蔥湯係稍為唔合口味嘅一環質地稀身似中湯，飲落帶甜，食完麵包再飲湯的話，甜味更顯突出。廚師解釋謂店家用嘅係有機嘅洋蔥，做法亦有別於一般洋蔥湯。

自家製半生叉燒配米型粉、甜豉油汁 $428

喺西餐廳中見到叉燒二字都頗為驚訝，以牛肉眼做成半生叉燒嘅模樣，旁邊伴有菜心苗，用上米型意粉當成飯，賣相都幾可亂真

當然啦牛肉眼本身肥脂部位唔多，就扮唔到「半肥瘦」喇，齋食肉嘅部分會覺得比較乾身，肉質都算嫩腍，食落唔鞋口。

基本上冇乜牛肉味，主要係靠沾上用十幾種香料製成嘅甜豉油汁提升味道，確實有少少似食緊瘦叉，獨欠精粹蜜汁同脆皮。

米型意粉嘅份量唔多，但足夠飽肚。

三文魚波板糖配西班牙紅蝦、牛油果蓉、日本豉油泡沫 $528

黎呢度食野之前要調整好心理，食嘅係fusion菜、sell嘅係創意同靚料，呢道三文魚波板糖係大廚為餐廚設計嘅菜式，中規中矩，不過定價高

西班牙紅蝦聽聞係世界上最好食嘅蝦，一共兩隻，珍寶大小，食落爽甜

至於三文魚做成波板糖形狀，以芝士做出糖棍，新鮮肥美，芝士味亦甚為香濃。面頭均勻搽上牛油果蓉，睇落同芥茉都好似。

芝士蛋糕、芝麻糊燉蛋

甜品試到店家嘅招牌玫瑰花蛋糕，賣相好靚，仲用上好似「魔鏡」造型嘅碟襯托，影相期間我已經十分期待味道如何

一黑一白分別係芝士蛋糕、芝麻糊燉蛋，冇令我失望呢，而且份量大方

芝士蛋糕質地香滑，味道濃郁，特別係餅底夠厚，而且加入蜜糖，既有賣相亦有內涵

相對之下，芝麻糊略為失色，雖然係燉蛋，但芝麻味本來就突出，反正既然會蓋過蛋香，倒不如再重手啲，至於質感就唔似動L燉蛋，食落都係似芝士蛋糕。

最近沉迷芝麻味甜品嘅我就覺得芝麻味再濃更正。

胎菊金駿眉紅茶

玫瑰鐵觀音青烏龍茶

飲品選擇頗多，有咖啡、茶、朱古力、特飲等超過20款。食完主菜後，店員就送上熱茶，並提醒要焗大概十五分鐘，茶嘅味道較為濃，玫瑰、胎菊嘅味道較弱。

今次試左兩個套餐，上菜速度正常，逐道菜上，唔好當係一般西餐，食物擺盤都好精緻，對融合菜唔係太多認識，加上自行腦補過，個人認為味道方面都比想像中好，只係定價稍高。

不過我留意到嘅係下午茶時段嘅tea set收費反而唔貴，賣相幾靚，有機會再參考他人評語，再決定會否一試。

餐牌：

Roseate Castle - French Cafe & Restaurant

地址：旺角砵蘭街215號朗晴坊8樓

Follow us:

Instagram: http://bit.ly/2g3ZtuS

Facebook: http://bit.ly/2gu1fIG

Blog:http://http://bit.ly/ywycarol

Contact us: mrmrsfoodhk@gmail.com