再窮都要去旅行！

泰子妃東南亞特色餐廳

用餐日期：2017/07/06

幾時都話睇食評要睇臭味相投嘅人先有參考價值，否則好似我咁，伏到啪啪聲

呢間泰子妃評價唔錯，啲人又話正宗又話乜乜，所以我都記低左要去試。

餐廳位於寶能allcity商場，都幾近深圳灣口岸，該商場仲有喜茶、鮮芋仙等我好鐘意嘅食店

店內位置闊落，仲有室外座位，當然熱屎辣辣咪搞我。裝潢富泰式風，燈光稍暗。

餐牌款式多，一般要食嘅泰菜都有，仲有意粉、披薩等，除左咖喱、海鮮類平少少，其他定價接近香港。

另有兩款二人餐、兩款四人餐，人均RMB¥160-200。但入座時並未有供應套餐餐牌，係我地臨走見到隔離枱有先知有套餐，唔太老實。

招牌冬蔭公湯 RMB¥68/小

冬蔭公湯用瓦煲、蠟燭仔保溫，愈煲味道愈濃郁。有兩隻蝦、金菇、香茅等一般材料，份量適中，約分到4碗仔。

酸辣都突出而平衡，蝦肉爽口。係全晚唯一我認為合格嘅菜式

炸蝦餅 RMB¥52/4件

蝦餅逐件收費，兩件起，人少都唔怕食唔哂。

雖有蝦肉味道，但並冇起膠，食落鬆拋拋零嚼頭，好似我啲byebye肉咁

炭燒4頭大元貝 RMB¥38/2隻

可配蒜香或泰妃汁燒，見個名好似幾勁料，又4頭又120g隻，味道中規中矩。

元貝都算爽口，蒜蓉過多，唔苦但鹹。價錢太貴，性價比低

泰式飛天通菜 RMB¥32

貫徹國內炒菜風格，油膩感重，一般食開都係以辣子、豆醬炒，呢度嘅通菜食落唔辣唔惹味不特止，仲係帶甜…

酸辣鳳爪 RMB¥38

賣相正常，酸味太嗆，辣味欠奉，而且價錢唔平。

軟殼蟹牛油果米紙 RMB¥32

全晚最伏一定係呢份米紙，圖片賣相幾吸引，所以我地先會點。

米紙呈乳白色而非半透明狀，厚到好似A4白紙兼木乃伊。裡面有大量菜絲、蘿蔔絲、牛油果，軟殼蟹又腍又厚粉，出左咩事？食落又乾又冇鹽冇味

健康水4號 RMB¥38

健康水指嘅係detox water，共有4款，主要分別在配料有香橙、士多啤梨、奇異果、菠蘿，加入檸檬、薄荷汁、礦泉水製成。

我揀嘅係菠蘿，淡到冇朋友，仲要唔凍，根本就同餐廳提供嘅免費檸檬水一樣味道…

本來仲點左粉絲蝦煲，原來漏左單，係全晚覺得最慶幸嘅事。埋單兩人 RMB¥308，唔貴但唔好食

餐廳冷氣不足，燈光較暗，店員好似未瞓醒，食食下枱面有隻手指節大小嘅曱甴悠悠行過（我地拍死左佢）

埋完單後同店員講聲，店員微微冷笑，同隻曱甴一樣悠悠行開左 (正)

總結咁嘅價錢，喺香港求其一間泰菜都食到更好質素。

利申：唔啱我食唔等如唔啱你食；正如啱人食唔等如啱我食一樣。

泰子妃東南亞特色餐廳

地址：中心路2233號寶能太古城南區B1樓SB126室（地鐵海月A出口）

Instagram: http://bit.ly/2g3ZtuS

Facebook:http://http://bit.ly/2gu1fIG

Blog:http://http://bit.ly/ywycarol

I'm Carol 發表在痞客邦留言(0) 人氣()

奈雪の茶

用餐日期：2017/07/06

奈雪の茶 • 一杯好茶，一口軟歐包

隨住網紅喜茶嘅成功，國內都有好多唔同嘅茶飲品牌興起，奈雪の茶可算係其中比較成功，旗下仲有喜年貢茶、台蓋等品牌。「一杯好茶，一口软欧包」係品牌希望傳遞嘅概念，所以有別於眾多茶飲店，奈雪の茶除左供應飲品，仲自設餅房新鮮製作軟歐包，非常受歡迎。創辦人表示希望顧客除左記得品牌嘅茶飲，仲要記住佢地嘅麵包，因此將兩款產品都做得好有質素。假如你係「麵包控」，去到深圳不妨搵間奈雪の茶，有超過二十間分店，提供座位，以茶飲店、麵包店而言，規模不容忽視

從深圳灣口岸前往奈雪の茶海岸城分店可以坐M299號巴士，於海岸城站落車；從其他口岸出發，可選搭地鐵於后海站落車。

海岸城店很有規模，近門口位置係收銀處，任何時間都有長長人龍，右邊有麵包櫃，裡面有餅房，定時新鮮出爐麵包。雖然店內位置非常多，但由於採取自助形式，唔會有店員催趕，好多客人都會坐一段時間，情況就類似星巴克，加上人氣不一般，要搵位都有難度。我地黎過兩次，一次平日下午茶時間，人頭湧湧；另一次係週六，早上人流較少