227甜棧
用餐日期：2017/10/23
早聞呢間甜品店都有唔少人推介，其實早幾個月我都差啲成功食左，只係入座點餐後，店員突然要求調位，調位本來都好小事，不過調去廁所位，我確實有啲唔願意，於是離開左。
是日喺附近食完火鍋，唔少得來一個甜品作結，對面正正係呢間甜品店，既然唔需要等位，就俾一次機會。
一行四人，點左四款甜品，可以話係冇款好食，早知行多幾步去任何一間都應該比佢好。
甜品店由名字到裝潢都有種古色古香味道，木枱木櫈，卡位嗰邊還好，唔會太逼，其餘位置都比較密麻。
餐牌供應一般中式糖水，強調養生，有花膠、燕窩、海底椰一類嘅燉品，定價$49-69。
另有涼粉、西米露、港式嘅水果甜品，同埋唔少得幾乎每間甜品店不能缺少嘅乜圓勿圓小丸子等，價錢唔貴，大部分都係40蚊內。
椰汁紫米露 $30
本來係附紅豆，不過朋友唔想食，所以走豆。 紫米露一個字：甜到飛起
入口以為係椰汁嘅甜，後續就知其實根本係糖水味。 
彩虹綜合圓黑糖沙冰 $38
圖片睇落幾吸引的，當然只供參考都係平常事，實物冇咁靚仔咁鮮豔，但擺放整齊，諗住都唔會差得去邊。
彩虹圓分別係紅黃綠黑白紫色，強調純天然、無人造色素，實際比圖片淡色。
睇番資料先知紫色係紫心地瓜圓；黃色係地瓜圓；白色係芋圓；紅色係紅麴圓；綠色係綠茶圓、黑色係芝麻圓。
因為除左黃色嘅地瓜圓係有少少甜度，其餘全部係冇味…
又唔香又唔煙韌，口感較硬，不過唔會實。
至於黑糖冰亦係fail，點得黑糖預左會有少少甜，點會諗到係淡成咁
其餘紅豆、綠豆係正常野，冇啥可評。
自選養生花仙草涼粉 $36
除左固定款式，甜品自由度大，可以自選糖水底、糖水、配料，糖水底有仙草、豆花、沙冰等，糖水可選黑糖/薑汁黑糖/微糖黑豆漿。
配料方面選擇豐富，有紫米、蓮子、雪耳、小丸子、手工芋圓地瓜圓、龍眼肉等，選兩款$30，選四款$36。
我地揀左綠茶凍、杞子龍眼肉、黑糖寒天凍、手工芋圓
黑豆漿用黑豆石磨而成，冇加色素，所以顏色睇落會灰灰地，飲落唔會太甜，有少許豆味，係全晚唯一合格的。
仙草涼粉、綠茶凍、寒天凍完全冇味，養生養生都唔洗淡成咁…
而且份量相當少，比起固定款式，唔抵食。 講仙草，康瑞真係贏左9條街…
雪糕紅豆綠茶布甸 $38
呢款甜品都係見有唔少人介紹過，所以點埋試試。雪糕可選雲呢拿、紅豆、綠茶口味。
綠茶布甸好似切芒果咁，顏色好淡，裡面仲有紅豆、小丸子，墊底嘅係牛奶冰。
布甸一入口，媽啊，我食緊咩…係苦的！
冇綠茶味不特止，仲要係苦澀的，明明見有人話茶味好重，咁我都唔知水準係咪唔穩定到咁了。
布甸嘅口感還可以，雖然比較乾，但都唔硬；配少少底下嘅牛奶冰食會冇咁苦。
牛奶冰甜度適中，小丸子一啲都唔煙韌，最好食係個雲呢拿雪糕(笑)。
四樣野，四樣都係唔好食的，變相令我地又好懷念鮮芋仙，就算同康瑞都爭幾皮，唔知係我脷胎太厚，味覺失靈
227甜棧
地址：太子花園街246號地下B舖
Follow us:
Instagram: http://bit.ly/2g3ZtuS
Facebook: http://bit.ly/2gu1fIG
Blog: http://bit.ly/ywycarol
Contact us: mrmrsfoodhk@gmail.com
吃貨夫婦 (51)
