再窮都要去旅行！

唐風卷

用餐日期：2018/03/30

黎到廈門第一餐，就由當地朋友帶我地急忙食個午飯，畢竟坐左四小時高鐵連地鐵，大家都餓了

朋友推薦可試呢間【唐風卷】，睇番都屬於廈門嘅人氣餐廳，同另一間好受歡迎嘅牛油果大師係同一老板。

位於中山路嘅分店鋪面不大，裝潢、環境一般般，平日都有不少本地人用餐。可能當日比較熱，冷氣不足，就難免感覺有啲悶熱

餐牌供應手握卷物為主，少量刺身、涼拌等，款式唔算好多，唔算平價，卷物定價 RMB¥28-42，一份約有八件。

本以為要食得飽要點很多，不過實際還好，始終件件都有舊飯。 

中華海藻 RMB¥8

招牌蟹柳沙律 RMB¥22

青瓜絲份量不多，加埋炸天婦羅粉口感尚算豐富。但其實近似材料都會用於卷物上，感覺重複了，不必點

蟹柳黑天使卷 RMB¥28

有蟹柳、黑芝麻再包住天婦羅炸粉，其實食唔出係乜，反正就係幾脆口。

特製三文魚卷 RMB¥38

一份8件，面頭有好細片三文魚，加埋蟹籽、芝士、千島醬，連埋炸物，有少少香辣。

虞姬卷 RMB¥38

賣相不怎麼樣，係一款熱烤壽司，入面有三文魚、雞肉、天婦羅炸粉，以同音「魚雞卷」取名，比較飽肚。

牛油果綠龍捲 RMB¥42

唐風卷嘅招牌，以牛油果配搭壽司，感覺牛油果都係廈門老是常出現嘅食材，無論餐廳定飲品店，好多時都會見到牛油果蹤影。

蟹籽、牛油果、蟹柳、炸蝦、青瓜，加左牛油果嘅壽司味道唔難接受，而且咁多材料放入口，都分唔到邊種打邊種

唐風卷以卷物作主打，每款變化唔多，口感、味道其實款款差不多，幸好一行五人點多幾款，不至於太單一。

桂花黃魚羹 RMB¥38/大

另一項招牌菜，五人分享淺嚐，賣相都幾靚。裡面加有嫩腍嘅黃魚片、蛋花、玉子豆腐，湯羹濃稠適中，入口順滑，不錯飲

牛油果特飲 RMB¥18、芒果特飲 RMB¥12

飲品好細杯，可能加左奶或者乳酪，質地稠身，味道唔會太濃，鐘唔鐘意就見仁見智

事後睇番好多呢間餐廳嘅評語，先知真係好受歡迎，原來好多本地人都覺得性價比高…

因為第一次黎廈門，先知道原來當地嘅消費水平同深圳其實差不多。

唐風卷(中山路霞溪店) 

地址：霞溪路103號106鋪(思明電影院)

Follow us:

Instagram: http://bit.ly/2g3ZtuS

Facebook:http://bit.ly/2gu1fIG

Blog: http://bit.ly/ywycarol

Contact us: mrmrsfoodhk@gmail.com

廈門之旅

前往日期：2018/03/30-04/01

短暫嘅復活節假期，並無外遊打算，但因為之前喺ig認識左廈門嘅朋友，聽到佢嘅分享，我都有少少興趣。

假期坐飛機，消費會比較高，於是我地好突然地決定試下去廈門玩幾日

交通

除左飛機可達，較平嘅交通方法，當然係到深圳坐高鐵，高鐵車程終3個半鐘，經Ctrip訂來回500蚊左右。

比較接近市區應該選廈門站為終點站，可惜當日廈門站嘅車票賣哂。我地唯有退而求其次選廈門北站，會多花大約35分鐘轉地鐵到鎮海路站。

友人好有心，向我地詳細介紹左攻略，旅遊貼士加上我地只係短短留幾日，所以喺行程上都冇太多編排，比較隨心。

住宿

住宿方面，廈門有不少酒店，價格合理，而大部分更加沿海，會睇到海景添；但我地今次一行三人，選擇住民宿，會比較方便划算點，空間亦會大啲。

當然啦，預訂民宿有喺風險、安全門題都要自己衡量。以Airbnb為例，我地都係揀啲評價比較好嘅屋主，事前都有溝通過。

問過友人，第一次去廈門嘅話，可以選擇中山路/思明區嘅民宿，交通方便，距離景點都唔遠。

呢間民宿位於思明區，可住四人嘅兩房單位，收費每晚約$600/晚，我地入住兩晚，連同清潔費就大概$1400/2晚，性價比幾高。

民宿鄰近鎮海路地鐵站，步行5-8分鐘可達，位於鴻圖大廈附近，據朋友所言，呢區都比較安全民宿晚上時間大閘會上鎖，需拍卡出入。唯一要挑剔係，走廊燈好暗

經微信聯絡到房東，佢回覆都非常迅速，到埗後，房東就提供左入住資訊、詳細樓層、大門密碼等

三房兩廳兩廁單位，但其中一間房，房東拎左黎做雜物房，所以可容納四人，額外入住嘅人就要加錢嘅。

廚房有簡單廚具，但我地都用唔著，所以冇乜所謂。

客廳設計比較簡單，空間感足，有個小露台。我地住嘅樓層較矮，就冇乜景色可言，但同行人士如果要吸煙，就喺露台解決，唔好整污糟間屋。

電視係用小米盒子，接收唔到本地電視台。全屋wifi接收良好。

房東都細心，供應左汽水、水、茶具，仲可借用相機腳架、即影即有相機（自備相紙）。

個人衛生物品：膠拖鞋、一次性拖鞋、牙膏、牙刷、沖涼液、洗頭水。（始終毛巾比較貼身，需要自備都合理）

兩個房間都唔細，十分舒適，一個主人房連套廁，另一客房，兩邊都有冷氣、暖氣、掛衣籃等

整體廁所衛生狀況良好，熱水爐儲水式，有足夠熱水、水壓；但冬天入住，就唔建議同時使用兩廁嘅熱水爐，可能會遇上時冷時熱嘅問題。

總括而言，民宿實際同圖片顯示一樣，地毯、梳化、床、浴簾等，都係無印良品出品，風格簡單，3日2夜都住得舒適

好滿意今次訂嘅民宿，適合家庭、朋友，價錢合理，都推薦俾會去廈門嘅朋友。由於我地第一次使用Airbnb，呢次之行，確係添加左不少信心

有興趣可用呢條link註冊airbnb戶口，訂房滿$550，即可減$290：http://www.airbnb.com.hk/c/pccwl （你成功預訂房間及完成旅程後，我會獲得$145旅行基金）

Follow us:

Instagram: http://bit.ly/2g3ZtuS

Facebook: http://bit.ly/2gu1fIG

Blog: http://bit.ly/ywycarol

Contact us: mrmrsfoodhk@gmail.com