去年12月首次到訪台中,當時係用飛行里數兌換機票,行程包括台北、台中,事後我同另一半都愛上台中呢個地方

剛巧遇上廉航機票優惠,於是相隔10個月,決定再訪,今次一共逗留7天。


由於上次出入都係台北機場,所以今次都係我地第一次降落台中,機場規模比想像中細好多好多,商鋪唔多,都係銀行、電訊商,冇乜選擇,一眼望哂。

兌錢後,我地先購買交通卡、電話卡。(作為參考,一卡通 NT100/張,需額外充值;電話卡係中華電信 NT500/7日/無限數據,全程接收良好

住過台中公園後,我地都覺得唔算太方便,純粹係比較近火車站,離其他區有一定距離,晚上冇公車後,想要外出行街或者食野,都要的士來回,唔夠划算。

所以今次揀選嘅酒店,位於一中商圈,離一中街同中友百貨比較近,變相想食宵夜都方便啲,行都行到去。

一向我地去旅遊都係以「食」為主,留喺酒店嘅時間唔多,所以喺酒店安排上,唔想花費太多,今次入住6晚,只係$2120,都相當划算了。

當時以agoda價錢最優惠 http://bit.ly/2zhcxaa;酒店官網:http://boxdesignhotels.com/


博客創意旅店

地址:台灣台中市北區錦新街40號

入住日期:2018/10/19-10/25

酒店位於一中西門町,地理位置不錯,我地由台中機場坐9號公車,於【中友百貨】落車。大約需時55分鐘,中途無需換乘。

喺台中公車只需要用一卡通/悠遊卡,上/下車拍卡,首10公里免費,所以車費非常便宜。

公車:NT16/位;時間:55分鐘;車站:中友百貨

酒店門面幾亮眼,透明落地玻璃加上橙、黃色設計,好容易就見到。

2033393216.jpg

大堂:

大堂空間感足,出入嘅住客都比較年輕,有幾張梳化可以休息,提供咖啡機。

酒店要喺下午3點後先可以check in (退房時間為早上11點)。預訂時已付全數,無需另付按金。

早到嘅客人可以先辦手續,然後寄存行李,職員會安排好房間。

711549678.jpg

877636431.jpg

1711974180.jpg

2108993637.jpg

客房:

我地入住7樓嘅客房,一張大床、城景。房間四四正正,一眼望哂。

房間有所謂太空主題,兩邊牆紙都有圖案,裝潢算係青年旅舍格局。地毯算乾淨,並無蚊蟲。

905882022.jpg

酒店整體光線唔算好充足,不過都未知於黑漆漆,可能我個人比較喜歡大白燈。

電視、空調:空調可自由控制,反應夠快

1532868447.jpg

雙人床:唔會太窄,起碼我地身型大件,都唔會好逼,床褥偏硬身少少。

枕頭按一貫習慣,需要兩個叠加使用,第一晚要求,職員表示用哂,並稱要NT50先可提供。第二日再問,最終都係提供左多一個枕頭俾我地,感激。

1086919772.jpg

呢間房嘅洗手間同浴室有一道牆相隔,呢個設計我地冇問題,上廁所嘅人可以同沖涼嘅人分開進行

不過我睇過網上圖片,某啲房間只係用玻璃門分隔。

浴室:

我對浴室嘅要求只有一個,水壓同熱水要充足,完成一日行程,無非想舒舒服服沖個涼舒壓緩。

浴室夠闊落,水壓正常,如果可以再大啲更好,熱水都充足,無需等候,而且一直供應,唔會斷斷續續

水流得切,唔會有積水。浴室內只係有個毛巾架,最好就裝番啲掛鈎啦

347016349.jpg

716502786.jpg

牙刷、牙膏有供應,未見浴帽。沖涼液、洗頭水二合一枝 (無乜所謂,反正我帶自己的)

2084810852.jpg

毛巾:毛巾都唔會太殘舊,不過我地都係自備。

風筒:掛牆式風筒,放喺洗手間裡面,唔可以隨便走動,對於長頭髮嘅女生可能會有啲不便。幸好風力夠強,唔需要企喺度太耐。

1008850229.jpg

酒店wifi:有供應無線網絡,無需密碼,不過由於電話卡係無限上網,所以我地全程無用過wifi,未知速度如何。

房卡:入住時只提供一張房卡,拔卡就無電供應,可以另外向職員拎多一張,方便跟同行朋友分開活動。

我地對酒店要求唔高,入住6天,感覺都算係咁,價格相宜,350蚊左右一晚,我都收貨嘅。

又近一中商圈,夜晚肚餓喺樓下都有小食。附近有全家,亦都有7仔,夠哂方便。

房間隔音唔算一級好,感覺牆身好近隔離房門,所以間中都會聽到聲音。咁呢樣視乎運氣啦,我地都係中途有一晚瞓得唔係咁好,其餘時間都係睡眠充足。

其實房間都有幾個掛鈎位置,不過有需要就記得帶衣架啦。

呢間酒店有背包客床位,所以2樓會有公共空間,有雪櫃、微波爐、浴室之類。


Follow us:

Instagram: http://bit.ly/2g3ZtuS

Facebook: http://bit.ly/2gu1fIG

Blog: http://bit.ly/ywycarol

Contact us: mrmrsfoodhk@gmail.com

文章標籤
創作者介紹
創作者 I'm Carol 的頭像
I'm Carol

再窮都要去旅行!

I'm Carol 發表在 痞客邦 留言(0) 人氣()