餃掂手工餃子雲吞專門店
用餐日期：2017/04/16
男朋友喺附近番工，佢話呢間嘅餃子味道唔錯，所以成日都黎食。佢曾經外賣過番黎俾我食，但我覺得味道麻麻，可能唔係即食，點都爭少少。
趁有個復活節假過黎一試，有唔少人都會比較美味餃子同呢間餃掂，個人就認為係兩個唔同嘅方向、賣點，視乎個人口味。
餃掂就喺界限街，鋪面都幾闊落，雖然例牌要搭枱，但都唔會好逼狹。
裝潢有陣國內味道，特別係用上圓形彩色膠椅，牆上掛有兩篇老闆嘅分享文，「銷售賣什麼？」、「何謂牛嚼牡丹？」。
透明玻璃大窗內可以見到師傅包餃，都算係對自己衛生有多少信心。 我最欣賞係佢地嘅冷氣充足，熱屎辣辣入到去，都好快cool down番自己
同美味餃唔同，美味餃坐得逼啲，而且油煙味相當勁。
餐單選擇豐富，除有招牌松茸餃、芝士、韮菜豬肉、雲耳椰菜豬肉、大白菜豬肉、粟米豬肉、菜心豬肉、芫茜豬肉餃等，可選湯或煎餃。
除左松茸餃價錢較貴之外，其他餃子定價都合理，大概 $35-$46，視乎湯/煎。另有蒸餃、雲吞、麵食、小食等。
枱上有各式醬料，以及醃蘿蔔，一試店家嘅菜脯，驟眼睇都同美味餃嘅9成相似但個人認為美味餃嘅辣菜甫更好食，爽口夠辣。
回味手拍青瓜 $16
份量唔多，但味道不俗，特別係當日都幾熱，食幾舊清涼青瓜，爽口
青瓜調味唔重手，店員話加少少麻醬更好食。
至尊松茸餃 配 狀元九鼎湯 $65/8隻
男朋友推薦我試松茸餃，跟店家嘅粉葛湯，餃子、湯分開上。
湯底強調絕無味精，材料主要有粉葛、鯪魚、鰂魚、蘿蔔、赤小豆等。飲落味道相當清淡，近乎冇味，少鹽少油，適合追求健康嘅人。
個人唔係好鐘意太淡、冇乜味嘅湯，同埋呢碗唔係太熱，但作為湯怪，我都飲哂。比起美味餃嘅野葛菜湯真係淡好多，不過近年都飲落得出佢地有味精感。
餃子8粒，大小適中，睇得出餡料相當飽滿。
餃皮唔會好厚，松茸味道突出，帶起豬肉嘅鮮味，唔係好多肥肉，食落完全唔會覺得鹹，配合埋個湯，成件事都好清淡
餃子餡即使沾上湯食，依然較乾身
男朋友就話鐘意佢味道較天然，我食開重口味野就真係覺得健康過龍 (笑)
所以都沾上店家嘅松露醬食，冇咁dry。有同事好喜歡呢個醬，買過番屋企食架。
粟米豬肉餃 拼 韮菜豬肉餃 $42/10隻
同樣地都配上一碗葛湯，但我見對面嘅客人並非湯另上，唔知係咪我地點松茸，就順便呢碗都另上。
粟米餃口感有少少唔同，味道唔錯，豬肉一樣都唔係醃得好勁，都係清淡。
平時我就唔太喜歡食韮菜，呢度嘅韮菜餃味道唔強烈，我都食到。
自家製山楂雪梨水 $15/杯
材料有山楂片、雪梨、甘草等，雖然有雪梨，但飲落完全唔甜，可能因為山楂片中和。
唔係特別推介，不過天氣熱飲落都幾解渴嘅。
整體黎講，我覺得餃掂嘅餃子如大家所言，少鹽少油冇味精，所以都有一班捧埸客，當日都keep住有人流，而且有好多人買外賣生餃呢！
呢度嘅服務、環境都比美味餃好。如果喜歡清淡，想出街食飯都感覺健康啲，都推薦你黎一試。
男朋友就好鐘意呢度嘅餃子。我食得較重口味，則覺得太清淡，狂加醬油調味
全球首創(?)
每年純利百份之三十捐俾慈善機構(?)
餃掂手工餃子雲吞專門店
地址：太子界限街30號地下
Follow us:
Instagram: http://bit.ly/2g3ZtuS
Facebook: http://bit.ly/2gu1fIG
Blog: http://bit.ly/ywycarol
Contact us: mrmrsfoodhk@gmail.com
吃貨夫婦 (51)
