再窮都要去旅行！

鼎王麻辣鍋

用餐日期：2017/12/19

雖然喺香港都搵到唔少台式火鍋店，但一般價錢都唔平，質素又未如理想。難得去到台灣，點都要搵餐麻辣鍋試試。

早幾年黎台灣經常聽到鼎王、無老鍋，不過當時試左後者，事實上兩間係同一集團，而家問香港人食咩麻辣鍋，十個有九個都答無老鍋

關於早年鼎王、無老鍋嘅食品安全爭議，可以去維基睇下，好詳盡的。不過都已經係數年前嘅事，相信有媒體報導後，情況已經有轉。

今次之行，一共喺台中停留4日，原本只係安排左燒肉同火鍋各一次，不過第三日喺夜市只係掃街，冇正經坐低食飯，所以未食飽。

喺台北去到宵夜時間，不論火鍋定燒肉都有好多選擇，但台中感覺上冇咁多，向住麻辣火鍋方向搵，原來好多都收得幾早，最終揀左鼎王。

台中鼎王有3間分店，其中兩家營業到凌晨兩點半，有一家更加開到早上六點，啱哂一眾夜鬼

我地由台中公園坐的士10分鐘到北區分店，約NT155，冇事冇幹唔想排隊等位，其實夜少少食野係幾爽的。

呢間分店面積非常大，有卡座、大枱，樓底高，空間感足，一邊食野仲會聽到流水聲，幾舒適。其實喺環境、餐牌、價錢、味道、服務同我去過嘅無老鍋相近。

價錢喺台灣我諗都算中等價吧，平過佢嘅有大把，貴嘅亦大有鍋在。由於我地已經食左野兼只有兩人，就唔係點左好多款式。 

麻辣鍋 NT108/位

每枱最低消費NT650，鍋底以人頭計算，每個人都要俾，可選酸菜白肉鍋或者麻辣鍋，收費NT108/位，相拼加錢。

湯底已包鴨血、豆腐任添，我地點左少辣，辣度溫和，唔會好似川式火鍋咁，見到大量花椒、辣椒，味道係香辣不麻，唔會太油膩。

添加嘅湯底都一樣係麻辣湯，唔會愈食愈淡。豆腐非常入味，鴨血好大件，又夠滑溜，我地都添加左幾轉。

配料有肉類、內臟、手打丸、餃滑、海鮮、蔬菜、麵食等，海鮮類有草蝦、墨魚片、鯛魚片、蟹管肉等，部分款式有相拼，但蟹管肉只有單點。 

而自助區有白飯任食，食麻辣野如果配個「靚仔」都係正正子的。

特選去骨鮮牛 NT360

擺放整齊，一卷卷咁，約有15、6片，畢竟唔係任食，質素都唔會太差。牛肉切成薄片，脂肪均勻，肥瘦相隔，牛味係有，但麻辣湯底就點都會有少少蓋過牛味。牛肉薄而腍身，唔會乾柴

嚴選草蝦 NT289/8隻

冇諗住過質素咁一般，唔推薦草蝦，size又唔係大隻，蝦肉未至於霉，但感覺係唔新鮮，唔爽

蟹管肉 NT160

呢個反而幾唔錯，蟹肉幾好肉地，我諗有廿零粒，口感爽彈，亦都唔貴

品蟹滑膏 NT99/特價

用上花枝、旗魚、豬雞肉、蟹管肉等做成，價錢都反映質素，蟹味唔濃，都係花枝口感，膠質唔重，偏腍，純粹價錢唔貴。

干貝滑 NT278

有比較普通嘅墨魚滑啊、蝦滑，我地點左較少見嘅干貝滑。用上花枝、干貝製成，有明顯瑤柱口感同味道，但都係唔夠彈牙。 

娃娃菜 NT100

烏龍茶 NT70

散點同吃到飽，除左喺食物質素上，環境同服務都係最大差異，鼎王始終係精品鍋，環境舒適，出哂名服務好，上菜整個90度鞠躬。

因為地喺夜市食完野先黎，就唔係點左好多野，埋單連加一，消費NT1729，人均二百多港幣，可以接受啦。環境服務係吃到飽不能比較的，臨走前仲幫我地叫的士。

鼎王麻辣鍋

地址： 北區漢口路四段385號